غزل شمارهٔ 30

سرمایہ دار مزدوروں کی سخت محنت سے خالص ہیرا بنا رہا ہے (مزدور کا خون چوس چوس کر دولت مند ہوتا جا رہا ہے ) گاؤں کے خداؤں کے جبر سے کسانوں کے کھیت اُجڑ گئے ہیں (وہ خود وڈیرے عیش و عشرت کی زندگی گزار رہے ہیں ) اس لیے بدل دو ۔ الٹا دو ۔ تبدیلی، اے تبدیلی ۔

شہر کے شیخ (عالم یا فقیہہ) کی تسبیح (دکھاوے کی عبادت) کے دھوکے میں آ کر سینکڑوں مومن اس کے جال میں پھنسے ہوئے ہیں ، اور سادہ دل کافروں کے لیے برہمن بھی زنار کا حربہ استعمال کرتا رہتا ہے (مذہبی پیشوا، ہر مذہب کے اپنے معصوم پیروکاروں کو بے تحاشا لوٹتے رہتے ہیں ) ۔ اس لیے ۔ زمانے کو بدل دو ۔ الٹا دو ۔ تبدیلی، اے تبدیلی ۔

امیر اور بادشاہ چوسر سے دلچسپی رکھتے ہیں ان کے کھیل کے پانسے دغل ہیں ۔ امرا ء اور حکمران کمزوروں ، بے کسوں اور محکوموں کو قابو میں لانے کے لیے کئی حربے استعمال کرتے ہیں ۔ اس لیے بدل دو ۔ الٹا دو ۔ انقلاب، اے انقلاب ۔

واعظ نے مسجد میں ڈیرے ڈال رکھے ہیں اور اس کا بیٹا، مدرسے میں جدید علوم کی تعلیم حاصل کر رہا ہے ۔ وہ بڑھاپے میں ایک بچے کی طرح ہے اور بیٹا عین جوانی میں بوڑھا ہے ۔ (واعظ مسجد کی چار دیواری میں مقید ہے ۔ باہر کے حالات سے بے خبر ہے ) جبکہ بیٹا فرنگی علوم سیکھ کر دین سے دور ہوتا جا رہا ہے ۔ اس لیے، بدل دو ۔ سب کچھ الٹ دو ۔ تبدیلی ۔ اے تبدیلی ۔

اے مسلمانو! عصر جدید کے علوم فنون کے فتنوں سے فریاد کرو (بچو) کیونکہ ان علوم کی وجہ سے شیطان سستا ہو گیا ہے اور خدا کا ملنا محال ہے ۔ اس لیے ۔ بدل دو ۔ سب کچھ الٹا دو ۔ تبدیلی، اے تبدیلی ۔

اہلِ مغرب (کے علوم و فنون) کے باعث ایسا زمانہ آ گیا ہے کہ باطل بھی شوخی میں آ کر حق کی گھات میں بیٹھا ہوا ہے ۔ اس کی مثال تو یہ ہے کہ آج چمگادڑ (باوجود اس بات کے کہ اسے دن کے وقت کچھ دکھائی نہیں دیتا) سورج پر شب خون مار رہی ہے ۔

عیسائیوں نے (گرجا گھر) مریم کے بیٹے (عیسیٰ) کو پھانسی چڑھا دیا(عیسائی اپنے مذہب سے دور ہو گئے) اور ادھر حضرت محمد ﷺ قرآن لے کر کعبہ سے چلے گئے (مسلمان اپنے دین سے بے خبر ہو گئے ۔ تہذب نو نے تمام مذاہب کے پیروکاروں کو گمراہ کر دیا ہے ۔ اس لیے بدل دو ۔ الٹا دو ۔ تبدیلی، اے تبدیلی ۔

میں نے موجودہ زمانے کے ساغروں میں ایسی زہریلی شراب دیکھی ہے کہ اس کے زہر کے اثر سے زہریلے سانپ بھی تڑپ رہے ہیں ۔ (دنیا کے میکدے میں غارت گر تہذیب شراب ملتی ہے ۔ جو سانپ کی طرح روح کو ڈس کر اسے مردہ کر دیتی ہے ۔ ) ۔ اس لیے، بدل دو ۔ الٹا دو ۔ تبدیلی، اے تبدیلی ۔

(ان تمام حالات کے باوجود جن کا تذکرہ مذکورہ اشعار میں کیا جا چکا ہے نا امید ہونے کی ضرورت نہیں ) کیونکہ بعض اوقات کارکنان قضا و قدر کمزور لوگوں کو شیروں جیسی قوت و ہمت عطا کر دیتے ہیں ۔ اس لیے ہو سکتا ہے کہ پانی کے بلبلے سے ایسا شعلہ نمودار ہو جو اپنی ضوفشانی سے نظامِ حیات کی تاریکیوں کو دور کر دے ۔ اس لیے، بدل دو ۔ سب کچھ الٹا دو ۔ تبدیلی، اے تبدیلی ۔