زندہ رود: فارسی شاعری کا ایک جاوداں دریا

اس پروجیکٹ کی بنیاد ایک ذاتی تجربے اور شدید ضرورت کے احساس کے تحت رکھی گئی۔ ہمارے بانی، مخدوم حسان لاہوری نے جب زندگی میں باقاعدہ فارسی سیکھنا اور اساتذہ سے اقبال کے فارسی کلام کا سبقاً سبقاً مطالعہ شروع کیا، تو انہیں شدت سے احساس ہوا کہ ایک ابتدائی طالب علم کے لیے فارسی شاعری کو درست صوتی آہنگ، وزن، تلفظ اور حقیقی مفہوم کے ساتھ پڑھنا اور سمجھنا کس قدر دشوار ہے۔ یہ امر حیرت انگیز ہونے کے ساتھ ساتھ افسوسناک بھی تھا کہ علامہ اقبال کے اردو کلام کی تو بہترین آڈیو ریکارڈنگز موجود تھیں، لیکن ان کے فارسی کلام کی کوئی مکمل ریکارڈنگ پوری دنیا، حتیٰ کہ ایران میں بھی دستیاب نہ تھی، ہاں چیدہ چیدہ نظمیں ضرور میسر تھیں۔

اس کمی کو محسوس کرتے ہوئے انہوں نے فیصلہ کیا کہ ایک ادارے کی شکل میں اس مشکل کو آسان کرنے کا بیڑا اٹھایا جائے۔ اس کا ابتدائی مقصد تو یہ تھا کہ اقبال کے مکمل فارسی کلام کو ریکارڈ کیا جائے، لیکن پھر وقت گزرنے کے ساتھ ساتھ پراجیکٹ میں وسعت آتی گئی اور دیگر اہداف بھی اس میں شامل ہوتے چلے گئے۔ تاہم، ان تمام اہداف کا بنیادی مقصد ہمیشہ ایک ہی رہا کہ فارسی شاعری کے اس سفر میں جن مشکلات کا سامنا انہیں بطور طالب علم خود کرنا پڑا، آئندہ کسی بھی نوجوان کو ان دشواریوں سے نہ گزرنا پڑے۔