غزل شمارهٔ 34

مجھے گھر کی آرزو ہے اور نہ منزل کی ۔ میں تو ہر شہر میں ایک اجنبی کی طرح گزرتا ہوں اور راستے میں بھٹک رہا ہوں (اہل عشق کا کوئی ٹھکانہ نہیں ہوتا) ۔

علی الصبح میرے جسم کی راکھ نے نرم و لطیف ہوا سے کہا کہ اس صحرا کی ہوا سے میری چنگاریاں بجھ گئی ہیں ۔

اے باد صبا مجھ پر آہستہ آہستہ چل اور مجھے پریشان نہ کر ۔ کیونکہ میں تو اس راستے سے گزرے ہوئے کسی کارواں کے سوز کی یادگار ہوں ۔ (کارواں گزرنے کے بعد ماحول پر جو اداسی چھا جاتی ہے) ۔

میری آنکھوں سے شبنم کی طرح آنسو نیچے جا گرے ۔ جب مجھے یہ معلوم ہوا کہ میں بھی خاک ہوں اور ابھی ایک مسافر کی مانند ہوں ۔ یعنی میں بھی فانی ہوں ۔

میرے کانوں میں میرے دل کا یہ نغمہ پہنچا کہ اس زمانے کی ندی میرے چشموں کے پانیوں کا ایک سلسلہ ہے ۔ یعنی یہ زمانہ یہ کائنات انسان ہی کے لیے تخلیق کی گئی ہے ۔

(دل کا یہ کہنا ہے) کہ ابتدائے آفرینش کہ کہانی میری ہی سابقہ چمک دمک ہے اور ابد میرے انتظار کے ذوق و شوق کے باعث ہے ۔ مطلب یہ کہ میں ازل سے ہوں اور ابد تک رہوں گا ۔

اس مٹھی بھر خاک (دل) سے ڈرنے کی ضرورت نہیں ۔ تیری جان کی قسم میری کوئی حد نہیں میں تو ایک لامحدود چیز ہوں ۔