غزل شمارهٔ 5

میں اس بہانے سے محفل میں کوئی اپنا محرم ڈھونڈتا ہوں ۔ غزل چھیڑ کے دوست کا پیغام سناتا ہوں ۔

اس خلوت میں جہاں سخن حجاب بن جاتا ہے میں دل کی بات نگاہ کی زبان سے کہتا ہوں ۔

تیرے چہرے پر پڑنے کے لیے اسے پاک کر رہا ہوں نگاہ شوق کو آنسووَں کی ندی میں دھو رہا ہوں ۔

اگرچہ کلی کی طرح میرے کام میں گرہ پڑی ہوئی ہے مگر سورج کی جلوہ گاہ کی چاہ مجھے کھینچتی ہے (جدوجہد کے بغیر کوئی سالک کامیاب نہیں ہو سکتا اگر راہ میں دشواری پیدا ہو جائے تو سالک کو ہمت سے کام لینا چاہیے) ۔

موج کی طرح میرے وجود کی بنت ایک بے پرواہ طغیانی سے ہے یہ گمان مت کر کہ میں اس سمندر میں کسی ساحل کا متلاشی ہوں ۔

اس کے اور میرے بیچ اور نظر کا تعلق ہے (یعنی نظر آنکھ میں رہتی ہے) کہ انتہائی دوری میں بھی اس کے ساتھ رہتا ہوں ۔ (وہ ہر جگہ موجود ہے) نحن اقرب الیہ من حبل الورید ، ترجمہ: ہم انسان سے اس کی رگ جان سے بھی زیادہ قریب ہیں۔

میری آنکھ کے پردے پر اس نے ایک اور ہی دنیا کی تصویر کھینچ دی ہے ۔ میں ایک شعبدہ باز کے ہاتھوں جادو میں گرفتار ہوں (مطلب یہ کہ کائنات کا وجود حقیقی نہیں ہے بلکہ فریب ہے کائنات دکھائی تو دیتی ہے لیکن دراصل موجود نہیں ہے ۔

میں اس کے بند گنبد میں نہیں سماتا ۔ میں اس بوڑھے آسمان کے پہلو میں خار کی طرح کھٹکتا ہوں ۔ نوٹ: اقبال کا فلسفہ یہ ہے کہ مومن اس کائنات میں نہیں سما سکتا کیونکہ وہ زمان و مکان سے بالاتر ہوتا ہے ۔ وہ آسمان کے پہلو میں کانٹے کی طرح کھٹکتا ہے وہ طلسم زمان و مکان کو باطل کر سکتا ہے یعنی مومن میں یہ طاقت ہے کہ وہ اس کائنات کو مسخر کر سکتا ہے ۔

پرواز کا مزہ مجھے آشیانے میں نہیں بیٹھنے دیتا کبھی پھولوں کی ٹہنی پر ہوں کبھی ندی کے کنارے پر ۔ (مومن، عاشق) کو کسی لمحہ قرار نہیں ہوتا وہ ایک حالت میں زندگی بسر نہیں کر سکتا ۔ اس کی زندگی میں ہر وقت انقلاب رونما ہوتا رہتا ہے ۔