غزل شمارهٔ 46

میں نے اس بارے میں شریعت کی رو سے تحقیق نہیں کی ۔ سوائے اس کے کہ عشق سے انکار کرنے والا کافر اور آتش پرست ہے ۔ اقبال کہتے ہیں کہ عشق کے بغیر مسلمان صحیح مسلمان نہیں بن سکتا ۔ صرف عقل پر بھروسہ کر کے سچائی کی پہچان ممکن نہیں ۔ عشق کے بغیر شریعت کی بہت سے باتیں ایک معمہ نظر آتی ہیں ۔

یہ خاک کے پتلے اگر اپنے مقام سے آگاہ ہو جائیں اور خدا مسافران حرم کو اپنا مقام پہچان لینے کی توفیق بھی عطا کر دے تو ان پر یہ حقیقت عیاں ہو جائے گی کہ ایک کعبہ ان کے اندر بھی موجود ہے جو ان کا دل ہے (اس دل کو پاکیزہ کرنے کی ضرورت ہے) ۔

مجھے طریق راہ کی تلاش نہیں ، میں تو اپنا ہمسفر ڈھونڈ رہا ہوں ۔ کیونکہ دانش مندوں نے کیا خوب کہا ہے کہ پہلے ہمسفر اور پھر راستہ ۔ کیونکہ راستے کی مشکلات میں ایک سچا ہمسفر ہی کام آ سکتا ہے) ۔

(یورپ کے دانا نے دنیا کو ہر طرح سے گمراہ کیا ہے) اب وہ اس گناہ کی تلافی میں مصروف ہے ۔ اس طرح کی وہ عقیق کے پیالے میں شراب کے جوش اور دلکشی میں زیادہ اضافہ کر رہا ہے (اہلِ یورپ نے اپنی تہذیب کی تباہ کاریوں کو چھپانے کے لیے اس تہذیب میں اور زیادہ دلکشی اور چکاچوند پیدا کر دی ہے تا کہ لوگ اس روشنی میں چھپے اندھیرے کو نہ دیکھ سکیں ۔

ایسی جہالت کی دولت ہزارہا درجے بہتر ہے اس دانش سے جس کی دل تصدیق نہ کرتا ہو ۔

اگر عقل کی بھول بھلیوں میں ایک قسم کا مزا بھی ہے لیکن سادہ دل لوگوں کا ایمان مشکل نکتوں اور رمز کی باتوں سے بہتر ہے ۔

میں نے کلام اور فلسفہ کے حروف دل کی تختی سے دھو ڈالے ہیں اور اپنے ضمیر کو تحقیق کے نشتروں سے کھول دیا ہے ۔ تا کہ میں حقیقت کی منزل پا لوں ۔

میں بادشاہ کے آستانہ سے الگ یا دور ہو گیا ہوں ۔ میں کافر نہیں ہوں کہ بے اختیار و بے طاقت خدا کی پوجا کرتا رہوں ۔