غزل شمارهٔ 47

ہر کسی کی دوستی سے علیحدگی اختیار کر لے اور صرف آشنائے خدا کی صحبت اختیار کر ۔ کیونکہ اس کے سوا تیرا کوئی دوست نہیں ہو سکتا ۔ خدا سے خودی طلب کر اور خودی کے ذریعے خدا طلب کر ۔

صرف ابرو اور آنکھوں کے اشارے کوئی کرشمہ نہیں دکھاتے ۔ عقل، دل اور نگاہ کے لیے علیحدہ علیحدہ جلوے طلب کر ۔

عشق کائنات کی صراحی پی جانے کا نام ہے (پوری کائنات زیر کر لینے کا مسلک ہے) جام جہاں نما تلاش نہ کر بلکہ جہاں کو فتح کرنے والا ہاتھ طلب کر ۔

مسافروں کے پاؤں ننگے ہیں اور راستہ پر خار ہے ۔ اپنے مقام پر بخیر و عافیت پہنچنے کے لیے خدا کی تسلیم و رضا کی سواری طلب کر ۔

جب فقر اوج کمال تک پہنچ جاتا ہے وہ شہنشاہی کے لیے راہنما بن جاتا ہے ۔ اس لیے ایران کے مشہور بادشاہ قیقباد کا تخت فقر کے بوریے کے نیچے طلب کر ۔ وہ شہنشاہی طلب کر جو فقیری میں حاصل ہوتی ہے ۔

آگے غور کر کہ زندگی کسی عالم کی طرف رواں دواں ہے جو کچھ ہو چکا ہے اس کا خیال ترک کر دے اور تیری جو انتہا ہے اسے طلب کر ۔

اگر زمانے کے آلام و مصائب تجھ میں بانسری کی طرح فریاد پیدا کر رہے ہیں تو میری شراب کے پیالے کو ہاتھ سے گرا دے اور مومیا سے علاج طلب کر ۔ (تیرے آلام و مصائب کا حل قرآن مجید میں موجود ہے ، مومیا سے مراد قرآن مجید ہے) ۔