غزل شمارهٔ 23

اے ساقی میرے جگر پر نم آلود شعلہ پھینک ۔ یعنی مجھے شراب عشق پلا کر میرے اس مٹھی بھر جسم میں اپنے عشق کا شور قیامت بر پا کر دے ۔

میرے جدِ امجد آدم نے گندم کا ایک دانہ کھا کر مجھے جنت سے زمین پر پھینک دیا تھا ۔ اے ساقی اب تو مجھے اپنی شراب معرفت کا ایک گھونٹ پلا کر آسمانوں کے اس پار پھینک دے ۔

جذبہَ عشق جو کہ اس زمانے میں بے زور اور بے وقعت ہو چکا ہے تو اسے اور شہ زوری کی شراب پلا دے اور اس شراب کی تلجھٹ دانش کے پیمانہ میں ڈال دے تاکہ وہ بھی عشق سے آشنا ہو جائے ۔

اس دور کی حکمت اور فلسفہ نے مجھے آرام طلب کر دیا ہے اے میرے خضر تو یہ بوجھ میرے سے اتار دے ۔

عقل کی صراحی شراب کی حدت سے نہیں پگھلتی ۔ تو اپنے عشوہ و غمزہ سے اسے عشق آشنا کر دے یا مجھے اس عقل سے نجات دے دے کیونکہ عقل سے خدا کی پہچان نہیں ہو سکتی ۔

تیری محفل پر ابھی تک خوف اور امید کی کشمکش طاری ہے ۔ اے خدا! تو اہلِ محفل کو آسمانوں کی گردش سے بے خبر کر دے (یعنی انہیں بے یقینی کی کیفیت سے نکال کر اپنے عشق کی دولت سے مالامال کر دے) ۔

خزاں میں بھی بہار لالہ و گل لائی جا سکتی ہے؛ ہماری شاخ کہن پر انگور کا خون ڈال کر اسے سرسبز کر دیجیے (انگور کو بارآور کرنے کے لیے اس کی جڑوں میں خون ڈالا جاتا ہے)۔

ترجمہ: میاں عبدالرشید