غزل شمارهٔ 22

اس بزم ِ جہاں میں ساقی رہے اور نہ ہی میکش اس کا کام شراب و ساقی سے گزر گیا ہے ۔ ایسا دوست اب کہاں ہے کہ میں بچی ہوئی شراب اس کے جام میں انڈیل دوں ۔ مجھے تو کوئی اپنے اسلاف کی پیروی کرنے والا نظر نہیں آتا ۔

ایسا میکش جو جامِ زریں میں میٹھا زہر پی رہا ہے ۔ وہ میرے مٹی کے پیالے سے زہر کے اثر کو زائل کرنے والی شراب کب پئے گا ۔

میری مٹی سے تو عشق کی چنگاریاں پھوٹ رہی ہیں ۔ میں انہیں کہاں پھینکوں اور ان سے کس کو جلاؤں ۔ اے خدا تو نے میرے جسم میں یہ شررِ عشق پیدا کر کے اچھا نہیں کیا ۔

تہذیب مغرب نے علم و دانش کے چشموں کو آلودہ کر دیا ہے ۔ ارسطو اور افلاطون کے پیروکار اپنے افکارِ پریشاں سے دماغوں کو تو روشن کر رہے ہیں لیکن دلوں میں تاریکیاں پھیلا رہے ہیں ۔

اہل مغرب کے افکار نے اس جہاں کے دل کو اس قدر آلودہ کر دیا ہے کہ ہر کوئی فریاد کر رہا ہے کہ میں آلودہ ہو گیا ہوں ۔ مجھے اس زہر سے نجات دلاوَ ۔ عقل ماتم کناں ہے کہ میرے پاس اس زہر کا کوئی تریاق نہیں ہے اور نہ ہی منتر جنتر پڑھنے والا ہے جو مغرب کے باطل افکار سے لوگوں کو نجات دلا دے ۔

ملا ، درویش ، سلطان اور درباری سبھی اپنے اپنے کاروبار کو فروغ دینے میں مصروف کار ہیں ۔ اور اس مقصد کے لیے وہ فریب اور منافقت سے کام لے رہے ہیں ۔

اس بازارِ جہاں میں جہاں اچھی چیز کو پرکھنے والی آنکھ بیمار اور بے نور ہے ۔ میرا نگینہ جب انہیں چمک دمک دکھاتا ہے تو ذلیل و خوار ہوتا ہے کیونکہ لوگوں کی نظر اصل چیز پرکھنے کی صلاحیت سے بے بہرہ ہے ۔ میرے پیغام کی قدر و قیمت سے وہ آگاہ نہیں ہیں ۔