غزل شمارهٔ 5

اے خدا! تو ہمارے مٹھی بھر خاکی جسم میں سینکڑوں طرح کی فریادیں بلند کرتا ہے ۔ دوسروں سے کم ملنے کی عادت رکھنے کے باوجود تو ہماری جان سے زیادہ نزدیک ہے ۔ یعنی شہ رگ سے بھی زیادہ قریب ہے ۔ میری آہ و زاری یہ ثابت کرتی ہے کہ تو مجھ سے واقعی بہت قریب ہے ۔

صبا کے دوش پر تو چھپ کر باغ میں آتا ہے اور پھولوں کی بکھری ہوئی خوشبو اور بند کلیوں میں گھل مل جاتا ہے ۔ پھولوں کے حسن اور کلیوں کی خوشبو میں تیرے ہی جلوے نمایاں ہیں ۔

اے خدا! اہل مغرب تیری عظمت سے بے خبر ہو چکے ہیں اور اہل مشرق افسانوں کی مانند خیالات کی دنیا میں گم ہیں یعنی حقیقت سے دور ہو چکے ہیں اور سراب کے پیچھے بھاگ رہے ہیں ۔

جس شخص کو دنیا پر حکمرانی کا جنون ہو اور وہ دنیا کو تیری غلامی سے چھڑا کر اپنا غلام بنانا چاہتا ہے اس کے اس پاگل پن اور جنون کی تسکین کے لیے ایسا چنگیزی نشتر چلا کہ اس کے دل و دماغ سے یہ خیال باطن فاسد خون کی طرح بہہ جائے اور وہ یہ بات سمجھ لے کہ اصل حکمرانی تو اللہ ہی کو زیبا ہے ۔

اے خدا! میں تیرا ایسا غلام ہوں جو کسی قسم کی زنجیروں میں نہیں جکڑا ہوا ۔ ہو سکتا ہے کہ زمانے کے اطوار مجھے تجھ سے باغی کر دیں ۔ ایسے میں تو اپنے اس بل کھائے ہوئے گیسووَں کو میری گردن کے گرد لپیٹ دے تاکہ میں کسی وقت بھی تیری غلامی سے دور نہ جا سکوں ۔

میں تو نالہ و فریاد کے سوا کچھ نہیں جانتا ۔ لوگ تو یہ کہتے ہیں کہ میں غزل پڑھ رہا ہوں ۔ یہ کیا چیز ہے جو تو شبنم کی طرح میرے سینے پر گرا رہا ہے (لوگ مجھے شاعر سمجھ رہے ہیں حالانکہ میں تو تیرا الہامی پیغام لوگوں کو پہنچا رہا ہوں کیونکہ یہی ایسا طریقہ ہے جس سے میں لوگوں کے دلوں تک اپنی آواز پہنچا سکتا ہوں ) ۔