غزل شمارهٔ 48

(اے میرے محبوب) میرے اس بے چین دل کو (اپنے حسن کے جلووَں ) کی کشمکش سے ذرا بھی فراغت نہ دے ۔ اور اپنی ان پیچیدہ زلفوں میں ایک دو شکن پیدا کر دے تاکہ میں ان زلفوں کے پیچ و خم سے باہر نہ آ سکوں ۔

تیرے (حسن کے جلووَں کے باعث) میرے سینے میں تجلی کی ایسی چمک پیدا ہوئی ہے کہ اسکے (دیدار) کے لیے میں نے چاند اور سورج کو بھی انتظار کی تکلیف میں ڈال رکھا ہے (چاند اور سورج بھی میرے دل کی تجلیات دیکھنے کے تمنائی ہیں ) ۔

(محبوب) کی صورت کا نظارہ کرنے کی آرزو نے دنیا میں بت گری کی رسم پیدا کر دی ہے ۔ (لوگوں نے محبوب کے مجسمے تراش لیے ہیں ) ۔ (یہ ان کا قصور نہیں ) سچی بات تو یہ ہے کہ عشق دیدار کی مشتاق جان کو ہمیشہ دھوکا دیا ہی کرتا ہے ۔ (محبوب سامنے نہ سہی، اس کا خیالی مجسمہ ہی دل کے بہلانے کے لیے کافی ہے) ۔

(تو اگر سامنے ہو) تو میں اطمینانِ قلب اور آسودگی کے لیے کوئی نغمہ چھیڑ دوں ۔ سبزہ زار کے پرندے کو پھر سے سبزہ زار کے سپرد کر دے ۔ (میرا دل غیر کی محبت میں جکڑا ہوا ہے اسے پھر سے حقیقت آشنا کر دے ۔ )

اے خدا تو نے مجھے بلند فکر بنایا ہے تو میرے پاؤں کی زنجیر کھول کر مجھے آزاد کر دے تا کہ میں کسی کا محتاج نہ رہوں اور تیرا پیغام بھی بخوبی دوسروں تک پہنچا سکوں اور میں تیرے عطا کردہ اس موٹے کپڑے کے لباس کے بدلے میں بادشاہ کے ایرانہ و شاہانہ لباس کو ترک کر کے غریبوں کو ان کے شاہانہ طور طریقے سکھاؤں ۔

اگر (فرہاد) نے کسی پتھر یا پہاڑ پر (نہر کھودنے کے لیے) تیشہ چلایا تھا تو یہ کونسا بڑا کام تھا ۔ عشق میں ایسی قوت ہے کہ پورا پہاڑی سلسلہ اپنے کندھوں پر اٹھا لیتا ہے ۔