غزل شمارهٔ 54

میں نے آہ و زاری کے لیے لبوں کو وا نہیں کیا ۔ کیونکہ یہاں آہ و زاری کا کسی پر کوئی اثر نہیں ہوتا ۔ اس لیے دل کا غم نہ کہنا ہی بہتر ہے کیونکہ ہر شخص کے پاس اس کے سننے کا حوصلہ بھی تو نہیں ہوتا ۔

مسجد کیا اور مندر کیا ، ہر جگہ (اے خدا) لوگ تجھ سے شناسائی کی باتیں کر رہے ہیں ۔ ہر کوئی تیری معرفت کا دعویدار ہے ۔ لیکن ان میں کوئی بھی (ملا اورپنڈٹ)تیرے اور میرے درمیان راز کی باتیں نہیں جانتا ۔

یہ حالت بھی دیکھنے والی نہیں کہ یہاں (شعلہَ عشق) ہماری دنیا پر کبھی ایک نظر ڈالتا ہے اور کبھی نہیں ۔ منزل سلوک میں سالک پر بسط و قبض کی حالت طاری ہوتی ہے ۔ کبھی تو اس کی نظر سماعت سے بھی آگے جا سکتی ہے اور کبھی اسے اپنی بھی خبر نہیں ہوتی ۔

اے محبوب! تو ہماری آنکھوں کے راستے سے ہمارے دل میں داخل ہو ا ۔ مگر اس طرح کی نگاہوں کو خبر تک نہ ہوئی (اور دل پر تیری محبت نے قبضہ جما لیا) ۔

میرے پاس جو نگینہ (دل) ہے وہ کسی جوہری کی نظر سے نہیں گزرا ۔ اسے میں اب تیرے سپرد کرتا ہوں کہ یہ دنیا تو اس کی پہچان سے عاری ہے (کیونکہ اس دل کی اصل قدر و قیمت سے تو ہی آگا ہ ہے) ۔

عقل کو جلا بخشش والی شراب کا پیالہ جو اہلِ یورپ نے مجھے دیا ہے بلاشبہ سورج کی حیثیت رکھتا ہے لیکن اس میں صبح پیدا کرنے کی صلاحیت نہیں ۔ اہلِ مغرب کے علم و دانش میں روشنی تو بہت ہے لیکن اس سے دل تاریک ہو جاتے ہیں (ان کا علم خدا سے دور لے جاتا ہے ۔ روح مرجھا جاتی ہے) ۔