غزل شمارهٔ 24

میرے میکدے کی شراب میں ایرانی افکار و خیالات نہیں پائے جاتے ۔ میری اس عجمی صراحی یعنی فارسی شاعری میں جو شراب ہے وہ میرے جگر کا لہو ہے ( میں نے یہ خیالات کسی سے مستعار نہیں لیے) ۔

انسان وجود کی تلاش میں دریا کی موج کی طرح تڑپ رہا ہے ۔ اور ابھی تک وہ کمر تک عدم کے درمیان ہے (اسے وجود کی تلاش ہے ۔ لیکن وجودِ مطلق تو اللہ کی ذات ہے ۔ انسان جتنی بھی ریاضت کر لے انسان ہی رہے گا ۔ البتہ انسان خدا کا مظہری وجود بننے کا اہل ہو سکتا ہے) ۔

آ کہ ہم باہم مل کر حضرت ابراہیم خلیل اللہ کی طرح اس کائنات کے جادو کو توڑ ڈالیں ۔ کیونکہ تیرے (اللہ) کے سوا اس دنیا میں جو کچھ بھی دیکھا ہے وہ بت ہی ہیں (اللہ کے سوا کسی بھی چیز کی کوئی حیثیت نہیں ) ۔

اے انسان! اگر تو اس کائنات کے سینے میں (پوشیدہ) رازوں کی تہ تک نہ جاے گا تو پھر اپنی نگاہ کو نظارہَ ظاہری تک محدود رکھنا بھی ظلم ہے ۔

صحیح راستہ تلاش نہ کر سکنا بھی ایک قسم کی لذت رکھتا ہے ۔ مجھے خوشی ہے کہ ہماری منزل دور اور ٹیڑھے راستوں پر مشتمل ہے ۔

اے محبوب! میں نے جب تیرے دیدار کی تمنا کی تو تو نے ایک ادائے دلبرانہ سے نگاہیں چرا لیں ۔ لیکن اس کا مجھے یہ فائدہ بھی ہوا کہ تیرے ناز و ادا کا نظارہ کرنے کا موقع مل گیا ۔ یہ تغافل ہر وقت کی توجہ اور التفات سے کہیں بہتر ہے ۔

یہ بات سچ ہے کہ مجھے بت خانہَ ہند میں پرورش کیا گیا ۔ لیکن اس بت خانہ میں رہتے ہوئے بھی میرے ہونٹوں سے جو بات بھی نکلی وہ حرم کے اصولوں کے عین مطابق تھی ۔