غزل شمارهٔ 23

میری نوا سے تو مجھ پر قیامت کا سماں گزر گیا ہے ۔ اور کسی کو اس کی خبر بھی نہیں ( میں نے اپنے نغمات خون جگر سے تحریر کیے ہیں ۔ اور انہیں عشق کی موسیقی سے سجایا ہے ۔ لیکن اہل بزم ان نغمات کے ظاہری پہلووَں سے تو با خبر ہیں لیکن انہیں ان نغمات میں پوشیدہ پیغام کی خبر نہیں ہے) ۔

(کارکنانِ قضا و قدر) نے میری فطرت میں عشق کو بلند فکر سے ملایا ہے (میرا عشق صاحب عقل بھی ہے) ۔ میرا کام تو ہمیشہ نامکمل ہی رہتا ہے ۔ یہ چاند کی طرح نہیں جو کبھی بڑھ جاتا ہے اور کبھی کم ہو جاتا ہے ۔ عشق ہمیشہ بڑھتا ہی رہتا ہے ۔

فریاد نہ کر، اپنے ہونٹ بند کر لے اور ہجر کا درد برداشت کرنے کی ہمت پیدا کر ۔ کیونکہ عشق جب آہ و فریاد کرتا ہے تو یوں لگتا ہے کہ اسے اپنے جنوں کی خبر نہیں (عشق میں تو رضائے محبوب ہی کو اہمیت حاصل ہے) ۔

شعلہ بن کر جو تنکا راستے میں آئے اسے جلا کر راکھ کر دے ۔ کیونکہ خاکی انسانوں کے لیے زندگی کے گھر میں داخل ہونے کا اور کوئی راستہ موجود نہیں ہے ۔

تو ایک نر شاہین ہے گھر کے پالتو پرندوں کے ساتھ میل جول اختیار کرنا تیرے لیے اچھا نہیں ۔ اٹھ اپنے بازو اور پر کھول ۔ کیونکہ تیری پرواز کم بلند نہیں ہے ۔ تو سب پرندوں سے اونچی پرواز کا مالک ہے) ۔

شاعر محفل وجود میں جگنو کی مانند چمک رہا ہے ۔ اس کے بازووَں اور پروں میں کبھی روشنی ہوتی ہے اور کبھی نہیں ہوتی ۔ (شاعری کا وجدان کبھی طاری ہوتا ہے اور کبھی نہیں ہوتا) ۔

اقبال نے اس غزل میں خودی کے احوال کو ظاہر کیا ہے ۔ کیونکہ یہ نیا نیا کافر ہے اسے مندر کے دستور عبادت سے آگاہ نہیں ہے (نئے کافر سے مراد یہ ہے کہ اقبال بزم صوفیاء میں نیا نیا وارد ہوا ہے ۔ اسے صوفیوں کے طور طریقوں کی خبر نہیں ) ۔