غزل شمارهٔ 18

آسمان تک رسائی حاصل کرنے والی عقل پر ترکوں کی طرح شبخون مارنا ہی اچھا ہے یعنی اسے عشق کے آگے سرنگوں کرنا ضروری ہے کیونکہ دردِ عشق کا ایک ذرہ عظیم فلسفی افلاطون کے علم سے کہیں بڑھ کر ہے ۔

کل مے خانے میں ایک کم سن ساقی نے مجھے محبت کے راز بتائے ۔ اس نے مجھ سے کہا کہ جو آنسو تو غم عشق میں پیتا ہے وہ گلابی رنگ کی شراب سے کہیں بہتر ہے ۔

ایسا فقر جو تلوار اٹھائے بغیر سینکڑوں دلوں پر فتح پا لیتا ہے وہ ایران کے بادشاہ دارا کی شوکت اور فریدون کی عظمت سے بہتر ہے ۔

اگر تو شراب کشید کرنے والے مندر میں آئے (یعنی کسی صاحب فکر کی محفل میں اگر تو آئے) تو اپنے مقاصد اور حوصلے بلند رکھنا کیونکہ نام نہاد صوفیوں کی خانقاہوں میں تو خیالی باتیں اور جادوگری کے کمال ہوتے ہیں جبکہ مردِ حق کی بارگاہ میں حق پرستی کا ذکر ہوتا ہے ۔

ہماری اس بہتی ہوئی ندی میں طوفان کے احسان کے بغیر اگر ایک موج بھی بلند ہو جائے تو وہ موج دریائے جیحوں کی موج سے بہتر ہے ۔ مطلب یہ کہ دوسرے کے زیر بار احسان ہونے سے خودی پر ضرب آتی ہے ۔ دوسروں کے احسان اٹھا کر ندی کو سمندر بنانے سے بہتر ہے اپنی ہمت سے اس میں ہلکی پھلکی لہریں پیدا کی جائیں ۔

وہ سیلاب (عشق کا طوفان) جسے تو لے کر آیا ہے اس کی شہر میں گنجائش نہیں ہے ۔ جس عشق کا تذکرہ تو کر رہا ہے یہ گھر برباد کرنے والا ہے اس سے صحرا ہی بہتر ہے ۔ جس شاعری کا تو تذکرہ کر رہا ہے اسے دنیا دار سمجھنے سے قاصر ہیں ۔

غزل گو اقبال کو کافر نہیں کہا جا سکتا کیونکہ اس کے پیغام میں کوئی ایسی بات نہیں کہ اس پر کفر کا فتویٰ لگایا جائے ۔ پھر بھی یہی بہتر ہے کہ وہ مدرسے سے باہر ہی رہے ۔ کیونکہ اس کے دماغ میں عشق کا جنون بھرا ہوا ہے اور عشق کی بات اہل ِ مدرسہ کیا جانیں ۔