غزل شمارهٔ 32

ابھی تک راہِ طلب میں میرا بوجھ کیچڑ میں پھنسا ہوا ہے ۔ مطلب یہ کہ دل میں طلب تو ہے لیکن سامانِ سفر موجود نہیں ۔ کیونکہ میں تو کارواں ، سامانِ سفر اور منزل کے تصورات میں ہی الجھا ہوا ہوں ۔ حالانکہ منزلِ عشق کے لیے مادی اسباب کی ضرورت ہی نہیں ہوتی ۔

نگاہِ عشق کی وہ بجلی کہاں ہے جو میرے گھر کے سازو سامان کو جلا کر خاکستر کر دے ۔ میرا معاملہ تو ابھی تک کھیت اور اس کی پیداوار تک محدود ہے ۔ یعنی میں ابھی تک مادی فائدے کے بارے میں سوچ سے باہر نہیں نکل سکا ۔ میری تمنا ہے کہ میرے محبوب کی نگاہِ کرم سے میرے افکار کو نیا رنگ مل جائے ۔

اے خدا! اس ناتجربہ کار ملاح کی کشتی کو ایک بار پھر طوفان کے حوالے کر دے کیونکہ موت کے خوف سے میری نظر ابھی تک ساحل پر جمی ہوئی ہے ۔

راہ عشق میں تڑپتے رہنا اور منزل مقصود تک نہ پہنچنے میں عجیب طرح کی لذت پائی جاتی ہے ۔ وہ شخص بہت خوش نصیب ہے جو جلوہَ محبوب دیکھے بغیر ابھی تک محمل کے پیچھے پیچھے چلا آ رہا ہے ۔ یعنی وصل محبوب اس کے شوق اور مہمیز کر رہا ہے ۔

وہ شخص کہ جس نے اپنے آپ کو دونوں جہاں سے برتر نہیں سمجھا ۔ وہ شخص اس جہان فانی کے فریب میں ابھی تک مبتلا ہے یعنی اس فانی دنیا کی رنگینیوں میں گم ہو کر رہ گیا ہے ۔

اے میری نگاہِ شوق ! تیری تسلی محبوب کے ایک جلوہ سے نہیں ہوتی ۔ اب میں اپنے دل کی اس خلش کو کہاں لے جاؤں (جو بار بار محبوب کے جلووَں کے لیے مجھے بیتاب رکھتی ہے) ۔

اپنے محبوب کے سامنے میں نے اپنی داستانِ عشق بیان کی تو وہ طویل سے طویل ہوتی چلی گئی، اسکے باوجود میں یہ محسوس کرتا ہوں کہ میں نے جو کچھ بھی اپنے محبوب سے کہا وہ بہت کم تھا ۔ کیونکہ میرے دل کی اصل بات تو ابھی تک دل ہی میں ہے ۔