غزل شمارهٔ 5

یہ جہاں اس دل کو قرار پہنچانے والے محبوب (خالق کائنات) کا ایسا پیغام رساں ہے جو کبھی ایک جگہ ٹھہرتا نہیں ۔ ہر وقت سرگرمِ سفر رہتا ہے ۔ یہ جہاں کیسا زبردست قاصد ہے کہ جو سر تا پا پیغام ہی پیغام ہے (زمانہ ہر لمحہ نئے پیغامات لے کر آتا ہے) ۔

(اے انسان) یہ بات کبھی نہ سوچ کہ جلوہَ دوست تیری قسمت میں نہیں ہے ۔ اس مقصد کے لیے تو آرزو کا سچا ہونا ضروری ہے (عشق کی سچی لگن تجھے دوست کے جلووں سے شناسا کر دے گی) لیکن تیرے سینے میں جو آرزو ہے وہ بھی خام ہے ۔

میں یہ بات تسلیم کرتا ہوں کہ تو شاہین کی طرح بلند پرواز ہے ۔ اور تجھے شکار کرنا آسان نہیں ۔ لیکن تو عقل کے پروں سے محو پرواز ہے ۔ اس لیے تجھے عشق کا شکاری، شکار کر سکتا ہے عشق کے آگے عقل بے کار ہے ۔ اگر تو یہ سمجھتا ہے کہ تو اپنی عقل کے بل بوتے پر کسی کے قابو میں نہیں آئے گا تو یہ تیری غلط فہمی ہے ۔ اب بھی وقت ہے ہوش سے کام لے کیونکہ عشق اپنا جال بچھانے والا ہے جو بڑا تجربہ کار ہے اور عقل شکاری ہے ۔

جہاں تک اس مشتِ خاک کی رسائی ہے جبرئیل فرشتہ وہاں تک نہیں پہنچ سکتا ۔ اس کا بلند نام اس وجہ سے ہے کہ وہ آسمان کی چھت پر رہتا ہے (ورنہ وہ اہلِ زمین سے کم تر مقام کا مالک ہے ۔ یہ بات واقعہ معراج سے بھی ثابت ہے جب جبرئیل سدرہ سے آگے نہ جا سکا تھا) ۔

اے انسان! تو سالوں کے شمار کی قید میں ہے اور اسی لیے بقا کے جوہر سے خالی ہے ۔ تجھے معلوم ہونا چاہیے کہ زندگی زمانے کے جادوکو توڑنے سے بقا حاصل کرے گی ۔ جس نے زمانے کے طلسم کو توڑ دیا وہ امر ہو گیا ۔

مغرب کے علم و دانش کے بارے میں میری رائے یہی ہے کہ اس کی آہ و فریاد میں لذت تو ہے لیکن وہ فکری نگاہ سے محروم ہے ۔ اس لیے اس کا حقیقت تک پہنچنا ممکن نہیں ۔

مجھے ہلال (مسلمان) اور صلیب (عیسائیوں ) کی آویزش سے اس کے سوا اور کوئی خدشہ نہیں کہ ان دونوں کی چپقلش سے کہیں دنیا میں کوئی نیا فتنہ نمودار نہ ہو جائے ۔ اگر یہ دونوں قو میں آپس میں دست و گریبان رہیں گی تو دنیا میں بے و تہی یا اشتراکیت کی صورت میں نئی قوت ابھر سکتی ہے جو دونوں کے لیے نقصان دہ ہو ۔