غزل شمارهٔ 26

میرے بے قابو دل نے (جس کا ایمان پختہ نہیں تھا) نورِ ایمان کے ساتھ ارتکاب کفر کیا ہے ۔ اسی وجہ سے میری حالت یہ ہے کہ میں سجدہ ریز تو خدا کے حضور ہوں لیکن غلامی بتوں کی کر رہا ہوں ۔ میرا دل خدا پر ایمان لانے کے باوجود دنیا کی آلائشوں سے پاک نہیں ہے ۔

عبادت گزار اپنی عبادت و ریاضت ترازو میں تولتا ہے یعنی تسبیح کے دانوں پر شمار کر کے سمجھتا ہے کہ اس عبادت کے بدلے اسے جنت ملے گی ۔ قیامت کے روز جب اعمال کا حساب ہو گا تو اسے دنیا میں خدا سے سوداگری کرنے کے عوض کچھ نہ ملے گا ۔

انسان زمین و آسمان اپنی خواہش کے مطابق دیکھنا چاہتا ہے، حالانکہ اس کا مالک و مختار تو اللہ ہے ۔ انسان کی حیثیت تو راستے کی گرد کی مانند ہے اس کی یہ حیثیت کہ کائنات کے حاکم کا مقابلہ کرے ۔

انسان کی کیفیت تو یہ ہے کہ کبھی وہ حق کی حمایت پر آمادہ ہوتا ہے اور کبھی حق کی مخالفت پر کمر بستہ ہو جاتا ہے ۔ اس میں ثابت قدمی مفقود ہوتی ہے اور کبھی ایسا بھی ہوتا ہے کہ وہ حضرت علی کی طرح بہادری کے جوہر دکھاتا ہے اور کبھی خیبر کے یہودیوں کی طرح حق کے خلاف آواز بلند کرتا ہے ۔

ایسا شخص جو ثابت قدم نہیں وہ ایسے جوہر کی مانند ہے جو بے رنگ ہے، لیکن اس بے رنگی کے باوجود اس میں سے رنگ اور عجائبات برآمد ہو رہے ہیں ۔ یہ شخص ایسے کلیم کی مانند ہے جو ایک طرف تو خدا سے ہم کلام ہے اور دوسری طرح ساحری میں بھی ملوث ہے ۔ یہ دورنگی آج کے دور کے مسلمانوں میں عام ہے ۔

ایسے شخص کی دور اندیش نگاہ نے عقل و جنون کا ذوق عطا کیا لیکن ساتھ ہی ساتھ اس جنون کے خاتمہ کے لیے اس کی رگوں میں نشتر بھی چلاتا رہتا ہے وہ عقل کو جنون آشنا بھی کرتا ہے اور پھر اسے ختم کرنے کی چالیں بھی سوچتا رہتا ہے ۔

ایسی دو رخی چال رکھنے والا آرام طلب اور سست رو اپنے آپ کو کیسے پہچان سکتا ہے ۔ جس نے ہزاروں سال سے بت گری اور بت پرستی کو اپنا رکھا ہوا اسے اپنے تخلیق کار کی کیا خبر ہو سکتی ہے