غزل شمارهٔ 8

اے خدا اہل کفر اور اہل ایمان دونوں پر اپنی رحمت عام نچھاور کر اور اپنے چودھویں کے چاند جیسے چہرے سے نقاب ہٹا دے ۔ کیونکہ تیری رحمت تو ہر ایک کے لیے ہے ۔ جب تیرے چہرے کے انوار و تجلیات مومن دیکھے گا تو اس کا ایمان اور مضبوط ہو گا اور جب اسے کافر دیکھیں گے تو یقینا تجھ پر ایمان لے آئیں گے

اقبال خدا سے التجا کرتے ہیں کہ پرانا گیت پھر سے گا اور شراب کی گردش کو تیز کر دے ۔ کیونکہ موجودہ زمانے نے لوگوں کو عشق خدا سے بیگانہ کر دیا ہے ۔ پھر ہماری محفل میں اپنے پیالے کی آگ کا اثر دیکھ ۔ پرانے گیت اور شراب سے مراد اپنے آبا و اجداد کی اقدار ہیں ۔

تو اپنی زلفوں کے جال کندھوں پر پھیلا کر شکار کے لیے باغ میں جانے کی تکلیف کر رہا ہے تو اپنے مکان کی چھت پر بیٹھے ہوئے پرندے کا شکار کیوں نہیں کرتا ۔ تیرے عاشق کب سے تیری نگاہِ ناز کا تیر کھانے کو تیار بیٹھے ہیں ۔

عراق کی ریت انتظار کر رہی ہے اور حجاز کے کھیت پیاسے ہیں ۔ کوفہ و شام کو پھر سے خونِ حسین کی ضرورت ہے ۔ حق کی آواز بلند کرنے والے کی ضرورت ہے ۔

عشق کسی راہبر کے کندھوں کا محتاج نہیں ہوتا ۔ وہ اپنا راستہ خود بناتا ہے ۔ عشق کسی اور کے ہاتھ میں اپنی لگا م بھی نہیں دیتا ۔

میں نے بت خانے کے در پر جا کر بے خبری میں آہ و فریاد کی پھر کہیں جا کر مجھے اپنے صحیح مقام اور راستے کا پتہ چلا ۔ مطلب یہ کہ برسوں دنیا کی غلامی کے بعد معلوم ہوا کہ اصل آقا تو اللہ ہی ہے جس کی غلامی پر فخر کیا جا سکتا ہے ۔

اس پرندے کو دیکھ جو کاروانِ بہار کی آمد کی خوشخبری اس کے آنے سے پہلے دے دیتا ہے ۔ پنجرے میں بند وہ پرندہ بہار کی آمد کا پیغام دے رہا ہے ۔ یہاں شاعر اپنے آپ کو پنجرے میں بند پرندے کی طرح محسوس کر رہا ہے کیونکہ ہندوستان پر انگریز حکمران تھے اور آنے والے حالات دنیا میں تبدیلیوں کا اشارہ دے رہے تھے