غزل شمارهٔ 7

میں نے اپنی دردمند اور دل پذیر آواز یعنی شاعری کے ذریعے زندگی کی شراب کا مٹکا دنیا کے لیے کھول دیا ہے یعنی جذبہَ عشق ان لوگوں تک پہنچا دیا ہے جو اس سے آشنا نہیں تھے ۔

اے خدا! تو نے ایک بے نوا کے لیے اس دنیا کا دروازہ بھی کھول دیا جس کی تمنا بھی ابھی کسی دل میں پیدا نہیں ہوئی تھی ۔

اے خدا! تو اپنی سرمئی آنکھ کے ساتھ میرے دل اور جگر میں اُتر گیا ہے ۔ وہ سرمئی آنکھ کتنی خوبصورت ہے جس نے ایک تیر سے دو شکار کر لیے ۔

تو نے اے خدا میری نگاہ نارسا کو اپنے جلووں کی کیسی بہار سے آشنا کر دیا ہے کہ میں باغوں اور سبزہ زاروں میں اس چکور کی طرح فریاد کر رہا ہوں جس نے ابھی ابھی بولنا سیکھا ہو ۔

یہ بات عجیب نہیں کہ ایک مملکت میں دو بادشاہ نہیں سما سکتے ۔ عجیب یہ ہے کہ ایک فقیر دونوں جہانوں میں نہیں سما سکتا ۔ دراصل صاحبِ فقیر کے لیے دونوں جہانوں کی وسعت بھی کم ہوتی ہے ۔