غزل شمارهٔ 57

میں تمہارے باغ کی روش پر لالہ کے پھول کے چراغ کی طرح جل رہا ہوں ۔ اے عجم کے نوجوانو مجھے اپنی اور تمہاری جان کی قسم ہے کہ میں ہر وقت تمہارے مستقبل کے بارے میں سوچتا رہتا ہوں ۔

میری سوچ نے زندگی کے ضمیر کے دریا میں بہت غوطے لگائے ہیں تب کہیں جا کر مجھے تمہارے پوشیدہ خیالات (قوم کے نوجوانوں کے مسائل اور ان کا حل ) معلوم ہوئے ہیں ۔

میں نے سورج اور چاند کا مشاہدہ کیا حتیٰ کہ میری نگاہ پرواز پروین سے بھی آگے نکل گئی ۔ میں نے کافی سوچ بچار کے بعد تمہارے کافرستان میں کعبہ کی بنیاد رکھ دی ہے ۔

تا کہ اس کی نوک اور تیز ہو جائے اس لیے میں نے اسے لپیٹ لیا ۔ یعنی اس شعلہ آشفتہ کو ادھر ادھر سے لپیٹ کر اکھٹا کر دیا ۔ وہ شعلہ جو تمہارے بیابان میں اب تک آوارہ تھا ۔ اے عجم کے نوجوانو میں نے تمہارے پراگندہ خیالات کو یکجا کر کے ایک صحیح نقطہ پر مرکوز کر دیا ہے ۔

وہ لعل کا ٹکڑا جو میں نے تمہارے بدخشاں (قدیم اسلامی علوم ) سے حاصل کیا؛ اسے میں نے فکر رنگیں کی صورت خالی ہاتھ مشرقیوں کی نظر کر دیا ہے۔

ترجمہ: میاں عبدالرشید

وہ مرد آ رہا ہے جو غلاموں کی زنجیریں توڑ کر انہیں آزادی دلائے گا ۔ میں نے تمہارے قید خانہ کی دیوار کے روشن دان سے اسے دیکھا ہے ۔

اے مٹی اور پانی کے بنے ہوئے لوگو (بے سوز اجسام والو) آوَ اور میرے گرد حلقہ بناوَ ۔ میری صحبت میں آ کر مٹی میں آگ پیدا کرنے کا فن سیکھو ۔ اور اپنے مردہ اجسام میں سوز و گداز پیدا کر کے اسے زندگی عطا کر دو ۔ میں اپنے سینے میں جو آگ رکھتا ہوں وہ میں نے تمہارے اسلاف سے لی ہے ۔