بخش 3 - گردش در شهر مرغدین

مرغدین اور اسکی اونچی عمارتیں (واہ واہ) ہیں ، میں اس عظیم مقام کے بارے میں کیا کہوں ۔

اس کے رہنے والے شیریں گفتار ایسے جیسے ان کی باتیں شربت کی طرح میٹھی ہوں ۔ وہ لوگ حسین و جمیل، نرم خصلت والے اور سادہ لباس پہننے والے تھے ۔

ان کی سوچ حصول اشیاء کے سلسلے میں کسی دکھ درد کی حامل نہیں ۔ وہ سورج کے کیمیا کے رازوں سے واقف ہیں ۔

جس کسی کو سونے چاندی کی خواہش ہوتی ہے وہ سورج کی روشنی سے حاصل کر لیتا ہے ، جیسے ہم شور پانی سے نمک حاصل کر لیتے ہیں ۔

یہاں علم و ہنر کا مقصد دوسروں کی خدمت کرنا ہے ۔ لوگ کام کو زر (دولت) میں نہیں تولتے ۔

یہاں کوئی شخص دینار اور درہم (کرنسی کے نظام) سے واقف نہیں ہے ۔ وہاں کے حرم (کعبہ) میں ان بتوں (دینار و درہم) کا کوئی دخل نہیں ہے ۔

ان کی طبیعت پر مشینوں کا دیو یعنی بھوت غالب نہیں ہے ۔ یہاں کے آسمان مشینوں کے دھووَں سے تاریک نہیں ہیں ۔

یہاں کا کسان جفاکش ہے اور اس کے گھر میں چراغ روشن ہے ۔ وہ زمینداروں کی لوٹ کھسوٹ اور ان کے ظلم سے محفوظ ہے ۔

ان کی کاشتکاری میں ندی کے پانی کے جھگڑے نہیں ہوتے اور فصل کسی کی شرکت کے بغیر اس کی اپنی ہے ۔ پیداوار میں کوئی اور حصے دار نہیں ۔

اس جہان میں نہ تو کوئی لشکر ہے اور نہ کوئی فوج ہے اور نہ یہاں کوئی دوسروں کا خون بہا کر روزی کماتا ہے ۔

مرغدین میں فن تحریر اور جھوٹی شہرت کی خاطر قلم کو کوئی فروغ حاصل نہیں ہے ۔

نہ تو یہاں کے بازاروں میں بے کاروں کی نعرہ بازی ہے اور نہ بھکاریوں کی کانوں کو دکھ پہنچانے والی آوازیں ہیں ۔

یہاں نہ تو کوئی سائل ہے اور نہ کوئی محروم ہے ۔ یہاں نہ کوئی غلام ہے نہ کوئی آقا ہے نہ کوئی حاکم ہے اور نہ کوئی محکوم

سائل اور محروم ہونا تو اللہ کی تقدیر ہے اور حاکم یا محکوم ہونا بھی اللہ کی تقدیر ہے ۔

خدا کے سوا تقدیر کا کوئی اور خالق نہیں ہے ۔

اگر ایک تقدیر سے تیرا جگر خون ہو جاتا ہے تو تو اللہ تعالیٰ سے ایک اور تقدیر کی خواہش کر ۔

اگر تو ایک نئی تقدیر چاہتا ہے تو یہ جائز ہے کیونکہ حق تعالیٰ کی تقدیروں کی کوئی انتہا نہیں ہے ۔

اہل زمین نے تو اپنی خودی کی نقدی ہار دی ہے یہی وجہ ہے کہ وہ تقدیر کے نکتہ کو نہ سمجھ سکے ۔

اس تقدیر کی گہری رمز ایک بات میں پوشیدہ ہے وہ یہ کہ اگر تو بدل جائے تو تقدیر بھی بدل جاتی ہے ۔

تو اگرخاک ہو جائے تو تجھے ہوا کی نذر کر دجائے گا (تو اڑ جائے گا) اگر تو پتھر بن جائے گا تو تجھے وہ شیشے پر مارے گی (شیشہ توڑنے کا کام لیا جائے گا ) ۔

کیا تو شبنم ہے تو تیری تقدیر میں نیچے گرنا ہے ۔ اگر تو سمندر ہے تو بقا (ہمیشہ رہنا) تیری تقدیر ہے ۔

تو ہر لمحہ وہی لات و منات (بت ) بناتا رہتا ہے ۔ اے فانی انسان تو بتوں سے بقا کی خواہش رکھتا ہے ۔

جب تک خود سے موافقت نہ کر تیرا ایمان رہے گا، تیرے افکار تیرا قید خانہ بنے رہیں گے ۔

تیرا یہ نظریہ کہ تقدیر کچھ ایسی ہے کہ محنت کرنے سے خزانہ ہاتھ نہیں آتا یعنی بغیر محنت کے خزانہ ہاتھ آ جاتا ہے یہ تقدیر ہے ۔ تیرا یہ نظریہ غلط اور نقصان دہ ہے ۔

اے بے خبر انسان اگر دین کی اصل یہی ہے تو اس سے ایک محتاج دن بدن محتاج تر ہوتا جائے گا ۔

اس دین پر افسوس ہے جو تجھے سلائے رکھتا ہے بلکہ تجھے گہری نیند میں مسلسل سلائے رکھتا ہے ۔

کیا یہ سحر اور جادو ہے یا یہ دین ہے کیا یہ افیون کی گولی ہے یا دین ہے

کیا تو پہچانتا ہے کہ طبع نقطہ رس کہاں سے ہے مٹی کے حجرے یعنی انسانی بدن میں یہ حور کہاں سے آ گئی ہے

حکیموں ، فلسفیوں کی فکر کی قوت کہاں ہے اور کلیموں کے ذکر کی طاقت کہاں سے ہے

یہ دل اور اس کی واردات کس کی طرف سے ہیں اس کے یہ فنون اور معجزے کہاں سے ہیں

کیا تجھ میں گرمی گفتار ہے تو یہ تجھ سے نہیں ہے ۔ کیا تجھ میں کردار کا شعلہ ہے تو یہ بھی تجھ سے نہیں ۔

یہ سب فطرت کی بہار کا فیض ہے اور فطرت کی اصل پروردگار فطرت سے ہے ۔

زندگانی کیا ہے یہ موتیوں کی کان ہے تو تو اس کا صرف امانت دار ہے اور اس کا مالک کوئی اور ہے ۔

ایک مرد حق کے لیے طبع روشن اس کی آبرو ہے اور خلق خدا کی خدمت اس کا مقصد ہے (یہ سب کیفیات خدا کی عطا کردہ ہیں ) ۔

خدمت خلق پیغمبری کا طور طریقہ ہے ۔ خدمت کی اجرت یا اس کا صلہ مانگنا یا طلب کرنا سوداگری ہے ۔

اسی طرح یہ ہوا اور مٹی اور بادل یہ باغ اور سبزہ زار اور محل اور گلی کوچے اور سنگ وخشت ۔

جن کے بارے میں تو کہتا ہے کہ یہ سب کچھ ہماری متاع ہے ۔ تو اے نادان انسان یہ سب خدا کی ملکیت ہے ۔

تو خدا کی زمین کو اپنی زمین سمجھتا ہے تو پھر ذرا یہ تو بتا کہ آیہ لا تفسدو کی تفسیر (شرح) کیا ہے ۔

آدم کی اولاد (انسان) نے شیطنت سے دل لگا لیا ہے ۔ میں نے تو شیطنت ، ابلیسی میں فساد کے سوا اور کچھ نہیں دیکھا ۔

کوئی شخص کسی دوسرے کی امانت کو اپنی ذات کے لیے استعمال نہیں لاتا ۔ وہ انسان بڑا خوش بخت ہے جو خدا کی ملکیت کو خدا کے سپرد کرتا ہے ۔

تو نے وہ چیز اڑا لی ہے جو تیری اپنی نہیں ہے ۔ مجھے تیرے اس کام کا دکھ ہے کہ یہ تیری شان کے شایان نہیں ہے (تیرے لائق نہیں ) ۔

اگر تو کسی چیز کا مالک ہے تو اس پر تیرا حق جتا نا مناسب ہے لیکن اگر تو نہیں ہے تو خود بتا کہ یہ کیسے مناسب ہے ۔

تو اللہ تعالیٰ کی ملکیت اللہ تعالیٰ کو واپس کر دے تا کہ تیرے کام کی الجھنیں دور ہو جائیں ۔

آسمان کے نیچے (زمین پر) یہ محتاجی اور مسکینی کیوں ہے اسکی وجہ یہی ہے کہ اس مولا کا جو کچھ ہے اسے تو اپنی ملکیت قرار دیتا ہے ۔

وہ بندہ جو اپنے مادی اور جسمانی فائدوں سے باہر نہیں وہ خود ہی اپنے شیشے کو اپنے پتھر سے توڑ دیتا ہے ۔

تو جو منزل اور راستے میں فرق سے بے خبر ہے ۔ سمجھ لے کہ ہر شے کی قیمت نگاہ یعنی خریدار سے ہوتی ہے ۔

گوہر جب تک تیری متاع ہے تو وہ گوہر ہے ورنہ وہ ایسا پتھر ہے جس کی قیمت ایک دمڑی بھی نہیں ۔

تو اسے ایک نئے انداز سے دیکھ ۔ جب تو ایسا کرے گا تو یہ جہان ہی بدل جائے گا ۔ یہ زمین اور آسمان بدل جائیں گے ۔