بخش 2 - برآمدن انجم‌شناس مریخی از رصدگاه

ایک بوڑھا آدمی جس کی داڑھی برف کی مانند سفید تھی اور جس نے برسوں حصولِ علم و حکمت میں گزارے تھے ۔

وہ مغرب (یورپ) کے داناؤں کی طرح تیز فہم تھا اور اس کا لباس یورپ کے عیسائی پادریوں جیسا تھا ۔

وہ خاصی عمر کا تھا اور اس کا قد سرو کی مانند بلند تھا اور اس کا چہرہ مرو شہر کے ترکوں کی طرح چمک رہا تھا ۔

وہ ہر علم کے رسم و راہ سے واقف تھا ۔ اس کی آنکھوں سے اس کی گہری فکر نمایاں تھی ۔

اس نے ہمیں (رومی و زندہ رود) دیکھا تو وہ پھول کی طرح کھل اٹھا ۔ بہت خوش ہوا اس نے نصیر الدین طوسی اور عمر خیام کی زبان (فارسی ) میں بات کی ۔

وہ بولا مٹی کا مجسمہ جو دلائل و مقدار کا اسیر ہے ، وہ نچلے اور اونچے مقام سے باہر آ گیا ہے ۔

اس نے اپنی مٹی ، خاک کو ہوائی جہاز کے بغیر ہی پرواز دی ہے ۔ زمینی آدمی نے ساکن کو حرکت کرنیوالے کی خوبی (وصف) عطا کی ہے ۔

اس کی زبان اور اس کی سوجھ بوجھ (فہم) ندی کے پانی کی طرح رواں تھی ۔ میں (زندہ رود) تو اس کی گفتار سے حیرت میں ڈوب گیا (حیران رہ گیا) ۔

اور سوچنے لگا کہ یہ خواب ہے یا جادوگری کہ ایک مریخی کے لبوں پر فارسی زبان ہے ۔

اس نے کہا کہ (حضرت محمد) مصطفی کے دور میں اہل مریخ میں سے ایک مرد باصفا تھا ۔

اس نے جہان پر اپنی جہاں بیں آنکھ کھولی اور خطہ آدم زمین کی سیر پر اپنے دل کو تیار کیا ۔

اس نے وجود (کائنات) کی فضاؤں میں پر کھولے، یہاں تک کہ وہ حجاز (مکہ و مدینہ کا علاقہ) کے صحرا میں جا اترا ۔

اس نے مشرق و مغرب میں جو کچھ دیکھا اسے لکھ لیا ۔ اس کا نقش (تحریر) باغ بہشت سے بھی زیادہ رنگین تھا ۔

میں بھی ایران اور یورپ میں گیا ہوں ۔ میں ملک دریائے نیل یعنی مصر اور دریائے گنگا (ہندوستان) میں پھرا ہوں ۔

میں نے امریکہ، جاپا ن اور چین کے ملک بھی دیکھے ہیں میں نے یہ سفر زمین کی دھاتوں کی تحقیق کے لیے کیا تھا ۔

میں زمین کے شب و روز کی خبر رکھتا ہوں (آگاہ ہوں ) میں نے اس (زمین) یعنی دنیا کے بحر و بر کا سفر کیا ہے ۔

آدم کے ہنگامے میری نگاہوں کے سامنے ہیں ، اگرچہ انسان ہمارے کام سے ناواقف ہیں ۔

میں افلاک سے ہوں یعنی میرا تعلق آسمان سے ہے ۔ جبکہ میرا ساتھی زمین سے ہے ، اگرچہ وہ انگور کی شراب تو نہیں پیتا پھر بھی وہ بہت خوش ،مست رہتا ہے ۔

وہ ایک بے پروا آزاد انسان ہے ۔ اس کا نام زندہ رود ہے اس کی مستی کائنات کے نظارے کی وجہ سے ہے ۔

ہم جو تمہارے شہر میں اترے ہیں اگرچہ ہمارا تعلق جہان سے ہے لیکن ہم جہان سے آزاد ہیں ۔

ہم نئے نئے جلووں کی تلاش میں نکلے ہیں ۔ تم تھوڑی دیر کے لیے ہمارے راستے کے ساتھی بن جاوَ یعنی ہماری رہنمائی کرو ۔

یہ مرغدینِ برخیا کا گردونواح ہے ۔ برخیا ہمارے مورثِ اعلیٰ کا نام ہے ۔

فرزمرز وہ جو برائی کا حکم دینے والا ہے وہ ایک روز برخیا کے پاس بہشت میں گیا تا کہ شیطان کی طرح ہمارے برخیا کو بہکائے ۔

(فرزمرز ان سے) کہنے لگا تو یہاں کس لیے آرام کر رہا ہے تو ساری عمر خدا کا محکوم رہا ہے ۔

تیرے اس مقام سے بڑھ کر (بہتر) ایک اور مقام ہے جس کے سامنے یہ جنت (تیرا مقام) ایک لمحہ کی بہار ہے ۔

وہ جہاں ہر جہان سے کہیں اونچا اور بلند ہے ۔ وہ جہاں تو لامکاں سے بھی بڑھ کر بالاتر ہے ۔

اس جہان کی تو یزداں (خدا) کو بھی خبر نہیں ہے ۔ میں نے تو اس سے زیادہ آزاد جہان کہیں اور نہیں دیکھا ۔

ٍمطلب: اس جہان کے نظام میں خدا کا کوئی دخل نہ ہے اور نہ وہاں کوئی (آسمانی کتاب ہے اور نہ کوئی رسول ہے اور نہ کوئی جبرئیل) ۔

نہ اس کے اندرکوئی طواف ہے اور نہ کسی کو سجدہ کرنا ہے ۔ نہ کوئی دعا ہے اور نہ کوئی درود ہی ہے ۔

برخیا نے کہا اے جادوگر یہاں سے اٹھ جا اور اس جہان میں جا کر اپنا نقش جما ۔

چونکہ ہمارے ابوالآبا برخیا (شیطان) فرزمرز کے دھوکے میں نہیں آئے اس لیے حق تعالیٰ نے ایک اور قسم کا جہان ہمارے سپرد کر دیا ۔

اب تم خدا کے اس عطا کردہ ملک کی سیر کرو اور شہر مرغدین اور اس کے رہ و رسم دیکھو ۔