بخش 1 - اهل مریخ

میں (زندہ رود) نے کچھ دیر کے لیے پانی میں اپنی آنکھ بند کی اور کچھ دیر کے لیے اپنے آپ سے دور ہو گیا ۔

پھر میں اس جہان (فلک زہرہ) سے دوسرے جہان کی طرف اپنا سامانِ سفر لے گیا ۔ اس جہان کا زمان و مکان کچھ اور طرح کا تھا ۔

ہمارا سورج اس (نئے جہان ) کے آفاق تک پہنچا اور وہاں اس نے نئی قسم کے دن رات پیدا کئے (وہاں کے دن رات مختلف تھے) ۔

یہاں (فلک مریخ میں ) بدن، روح کے طور طریقوں سے بیگانہ ہے ۔ وہ زمان میں رہتے ہوئے بھی زمان سے بیگانہ ہے (نا آشنا) ہے ۔

ہماری جان ہر طرح کے سوز سے موافقت اختیار کر لیتی ہے ۔ اور جو بھی دن آئے اس کا وقت خوشی میں گزر جاتا ہے ۔

وہ (ہماری جان) وقت گزرنے سے پرانی نہیں ہو جاتی ، بلکہ دن اس کے نور سے دنیا کو چمکا دیتے ہیں ۔

دن اور رات کی مسلسل گردش اسی طرح ہے تو اس کی سیر کر کیونکہ ہر جہان اسی سے ہے ۔

وہاں ایک سبزہ زار تھا جس میں اونچی رصدگاہ تھی ، جس کی دوربین ثریا کو کمند لیے ہوئے تھی ۔

میں سوچنے لگا کہ یہ جگہ نو سبز آسمانوں کی خلوت گاہ ہے یا پھر یہ ہماری زمین کا ماحول ہے ۔

کبھی تو میں اس کی وسعت کا کنارہ تلاش کرتا اور کبھی میں آسمان کی فضا کی طرف دیکھتا ۔

پیر روم جو اہل نظر کے مرشد ہیں کہنے لگے کہ (حیران ہونے کی کوئی ضرورت نہیں ) یہ مریخ ہے اس کا عالم دیکھ ۔

یہ بھی ہماری دنیا ہی کی طرح رنگ و بو کا طلسم ہے اور اس میں بھی شہر، آبادی اور مکان و محل موجود ہیں ۔

اس کے باشندے اہل یورپ کی طرح ذوفنون اور جسم و جان سے متعلق علوم میں ہم سے بڑھے ہوئے ہیں ۔

یہ لوگ زمان و مکان پر قوت و قدرت رکھنے والے ہیں ، اس لیے کہ وہ فضا کے علم میں ہم سے زیادہ ماہر ہیں ۔

یہ لوگ فضا کے وجود پر کچھ اس طرح لپٹے ہوئے ہیں کہ وہ اس کے ہر پیچ و خم سے باخبر ہو چکے ہیں ۔

اہل زمین کا دل تو بدن کی زنجیر میں جکڑا ہوا ہے لیکن اس جہان میں بدن دل کے زیر اثر ہے ۔ (یہاں کے باشندوں کے بدن دل کی قید میں ہیں ) ۔

جب کوئی دل بدن کو اپنی منزل بنا لیتا ہے تو وہ جو چاہتا ہے بدن کے ساتھ کرتا ہے ۔

مستی اور ذوق و سرور جان کے حکم سے ہے، جسم کے لیے غیب اور حضور بھی جان ہی کے حکم سے ہے ۔

ہمارے جہان میں وجود کے دو حصے (ایک جان اور دوسرا تن ہے ۔ ) ایک نظر نہیں آتا اور دوسرا نظر آتا ہے ۔ روح نظر نہیں آتی جسم نظر آتا ہے ۔

اہل زمین خاکیوں کے لیے جان اور جسم کا تعلق پرندے اور پنجرے کی طرح ہے (پرندہ پنجرے میں قید ہو ) روح جسم میں قید ہے جب کہ اہل مریخ کی فکر صرف ایک ہے او ریک اندیشی ہے ۔

جب وہاں کسی کا روز فراق آ جاتا ہے تو وہ سوز فراق سے اور زیادہ چست ہو جاتا ہے ۔

موت سے ایک دو روز پہلے ہی وہ دوسروں ، لوگوں کے سامنے موت کا اعلان کر دیتا ہے ۔

ان کی جان جسم کی پروردہ (پالی ہوئی) نہیں ہے اس لیے وہ بدن کی اتنی عادی نہیں ہے ۔

جسم کو اپنے اندر گھسیٹ لینا ہی ان کے نزدیک موت ہے ۔

اے زندہ رود یہ بات تیری فکر (سمجھ) سے کہیں بلند ہے ۔ کیونکہ تیری (اہل زمین کی) جان تو بدن کی محکوم ہے ۔

یہاں دو ایک لمحوں کے لیے اپنا سامان سفر کھول لینا چاہیے یعنی ٹھہرنا چاہیے خدا تعالیٰ نے اس قسم کا موقع کسی اور کو نہیں دیا ۔