بخش 9 - پیغام سلطان شهید به رود کاویری: در حقیقت حیات و مرگ و شهادت

اے دریائے کاویری ذرا آہستہ چل ، شاید تو مسلسل چلتے رہنے سے تھک گیا ہے ۔

تو مدتوں سے پہاڑوں میں رو رہا ہے اور تو نے اپنے راستے کو اپنی پلکوں سے کھودا ہے ۔

اے کاویری تو مجھے جیحون اور فرات جیسے دریاؤں سے بھی زیادہ عزیز ہے ۔ اے کہ دکن کے لیے تیرا پانی آب حیات ہے ۔

آہ و شہر جو کبھی تیری آغوش میں تھا ، اس شہر کا شیریں جلووَں والا حسن تیرے پانی ہی کے باعث تھا ۔ مراد سرنگا پٹنم شہر ہے جو سلطان کا دارالحکومت تھا ۔

اگرچہ تو بوڑھا ہو گیا ہے لیکن تیرا شباب ابھی تک برقرار ہے ۔ تیرا پیچ و تاب اور تیرا رنگ و آب اسی طرح ہے ۔

تیری موج نے موتی کے ایک دانے کے سوا کچھ پیدا نہیں کیا ۔ خدا کرے تیرا طرہ ابد تک شوریدہ رہے ۔

اے دریا تیری لہروں کا ساز زندگی کا سوز پیدا کر رہا ہے ۔ کیا تو جانتا ہے کہ یہ پیغام کس کی طرف سے ہے

یہ وہ شخص ہے جس کی سطوت و شان کا تو طواف کرتا رہا ہے اوراس کی سلطنت کا آئینہ دار رہا ہے ۔

وہ جس کی تدبیر نے بہت سے صحرا کو بہشت بنا دیا ۔ وہ ہستی (ٹیپو) جس نے اپنے خون سے اپنا نقش تحریر کیا ۔

وہ کہ جس کی خاک ہزاروں آرزووں کا مرجع ہے ۔ تیری لہروں میں بیقراری اسی کے خون سے ہے ۔

وہ (عظیم انسان ٹیپو) کہ جس کی گفتار پورے طور پر کردار تھی، اس وقت جب مشرق سویا ہوا تھا وہ بیدار تھا ۔

اے کہ میں اور تو (کاویری) دونوں زندگی کی ندی کی لہریں ہیں ۔ یہ کائنات ہر لمحہ بدلتی رہتی ہے ۔

زندگی ہر لمحے کا انقلاب ہے ۔ اس لیے کہ وہ ہر پل ایک نئے عالم کے سراغ میں لگی رہتی ہے ۔

ہر وجود کا تانا بانا رفت و بود (ماضی) سے ہے، یہ سارا ذوق نمود اسی رفت و بود ہی سے ہے یعنی کائنات کا وجود ہی فنا پر قائم ہے ۔

راستے بھی مسافروں کی طرف سفر میں رہتے ہیں ، ہر جگہ سفر پوشیدہ اور حضر (قیام) ظاہر ہے ۔

قافلہ، اونٹنی اور بیابان اور کھجور کا درخت جس کو بھی تم دیکھو گے وہ کوچ کے درد کے باعث رو رہا ہو گا ۔

چمن میں پھول ایک پل کا مہمان ہوتا ہے ۔ اس کا رنگ اور اس کی چمک دمک ایک پل کا امتحان ہے ۔

موسم گل کیا ہے یہ ماتم بھی ہے اور پینے پلانے کا عالم بھی ہے ۔ غنچہ اس کی آغوش میں ہوتا ہے اور پھول کی نعش اس کے کندھوں پر ہوتی ہے ۔

میں نے لالہ کے پھول سے کہا کہ تو تھوڑی دیر کے لیے مزید جل ۔ وہ بولا کہ شاید تو ابھی تک ہمارے راز سے آگا ہ نہیں ہے ۔

خس و خاشاک ہی سے وجود کی تعمیر ہے ۔ نمود کی سزا حسرت کے سوا او رکیا ہے

کیا تو بقا و فنا کی سرائے (دنیا ) میں آنا چاہتا ہے ، نہ آ ۔ کیا تو عدم سے وجود کی طرف آنا چاہتا ہے نہ آ ۔

اور اگر تو آ ہی جاتا ہے تو پھر چنگاری کی طرح خود سے مت گزر کسی کھلیان کی تلاش میں آوارہ ہو جا، نکل جا ۔

اگر تجھ میں سورج کی طرح چمک اور گرمی ہے تو پھر تو آسما نوں کی وسعتوں میں پاؤں رکھ عمل سے ۔

پہاڑ اور پرندہ اور باغ و صحرا سب کو جلا دے بلکہ مچھلیوں کو سمندر کی تہہ میں جلا ڈال ۔

اگر تیرا سینہ تیر کھانے کے قابل ہے تو پھر تو دنیا میں شاہیں کی طرح زندگی بسر کر اور شاہیں بن کر مر ۔

زندگی پیش کر دینے سے ہی اس کی بقا ہے اس لیے طویل زندگی نہیں مانگی ۔

زندگی کے لیے رسم و دین اور مسلک کیا چیز ہے شیر کا ایک پل بھیڑ کے سو سال (زندہ رہنے ) سے بہتر ہے(یہ فقرہ ٹیپو نے اپنی شہادت کے وقت کہا تھا ۔ ) یعنی شیر بن کر رہو اور شیر ہی کی طرح مرو ۔

زندگی میں استحکام تسلیم و رضا سے پیدا ہوتا ہے اور موت تو نیرنگ و طلسم اور کیمیا ہے ۔ (تسلیم و رضا سے مراد ہے انسان کا اللہ کی رضا میں اپنی مرضی کو فنا کر دینا اور اس کی رضا کے مطابق زندگی بسر کرنا) ۔

بندہ حق شیر ہے جب کہ موت اس کے لیے ہرن ہے ۔ اس کی سینکڑوں مقامات میں سے موت ایک مقام ہے ۔

وہ مرد کامل (بندہ حق) موت پر اس طرح جھپٹتا ہے جس طرح شاہین کبوتر پر جھپٹتا ہے ۔

(نفس کا )غلام موت کے خوف سے ہر وقت مرتا ہے اور موت کے ڈر سے اس کی زندگی اس پر حرام ہو جاتی ہے ۔

جبکہ بندہ آزاد کی شان ہی اور ہے ۔ موت اسے ایک نئی جان دیتی ہے یعنی جہاد میں شہادت پا کر وہ حیات جاوید پا لیتا ہے ۔

بندہ آزاد اپنی فکر کرتا ہے ۔ موت کے بارے میں نہیں سوچتا یا فکر نہیں کرتا ۔ آزاد لوگوں کی موت ایک پل سے زیادہ کی نہیں ہوتی ۔

اس موت سے گزر جا جو قبر سے موافقت کرتی ہے ۔ یہ یا اس قسم کی موت تو چرندوں ، پرندوں اور درندوں کی موت ہے ۔

مرد مومن خدائے پاک سے اس موت کی آرزو رکھتا ہے جو اسے مٹی سے اٹھا لے ۔

وہ دوسری موت کیا ہے، وہ راہ شوق کی انتہا ہے ۔ اور شوق کے ہنگامہ میں آخری تکبیر ہے (جہاد میں اللہ اکبر کہہ کر جان کی قربا نی دینا عشق و محبت کی آخری منزل ہے ۔ )

اگرچہ مرد مومن کے لیے ہر موت شکر کی طرح شیریں ہے لیکن حضرت علی مرتضی ٰعلیہ السلام کے فرزند (امام حسین علیہ السلام جنھوں نے باطل قوت سے ٹکرا کر کربلا میں شہادت پائی ) کی موت کچھ اور ہی چیز ہے ۔

دنیا کے بادشاہوں کی جنگ محض لوٹ مار کے لیے ہوتی ہے جبکہ مومن کی جنگ سنت پیغمبر ہے ۔

مومن کی جنگ کیا ہے وہ محبوب حقیقی کی طرف ہجرت کرنا ہے اور دنیا چھوڑ دینا اور دوست کے کوچے کی طرف جانا ہے ۔

وہ ذات گرامی (رسول اللہ ﷺ) کہ جس نے قوموں کو عشق کی بات بتائی انھوں نے جنگ (جہاد) کو اسلام کی رہبانیت کہا ہے ۔

یہ جو حضورنے فرمایا ہے اس نکتہ کو شہید کے سوا اور کوئی نہیں سمجھتا ۔