بخش 8 - نمودار می‌شود روح ناصر خسرو علوی و غزلی مستانه سرائیده غائب می‌شود

جب تو نے اپنے ہاتھ کو تلوار اور قلم کے گھوڑوں کا سوار بنا لیا ہے تو پھر اگر تیرے جسم کا گھوڑا لنگڑا ہے یا عرن کا شکار ہے تو تو کوئی غم نہ کرے ۔

شمشیر کی نوک اور قلم کی نوک ہی سے ہنر پیدا ہوتا ہے اور اے بھائی (ہنر اس طرح پیدا ہوتا ہے ) جس طرح آگ روشی اور نارون کی لکڑی سے آگ پیدا ہوتی ہے ۔

اگر کسی بے دین کے ہاتھ میں قلم اور تلوار آ جائے تو تو اسے بے ہنری سمجھ، اس لیے کہ جب دین ہی نہیں ہے تو پھر نہ تو قلم ہی کی کوئی قدر و قیمت ہے اور نہ لوہے ہی کی کوئی قیمت ہے ۔

دین کو عظمت و عزت دانا آدمی کو ملی جبکہ نادان انسان اس کی ذلت و خواری کا باعث بنا ۔ نادان کے سامنے دین کی کچھ ایسی ہی صورت ہے جیسے گائے کے آگے چنبیلی کی ۔ (گھاس پھوس کھانے والی گائے کو چنبیلی کی کیا قدر و قیمت ہو سکتی ہے) ۔

اس قدرر کے کپڑے کی طرح جس کے نصف سے حضرت الیاس کا کرتہ بنتا ہے اور دوسرے نصف سے یہودی کا کفن بنتا ہے ۔

وہ افغانی جوان جس نے کئی سلطنتیں پیدا کیں (وجود میں لایا) پھر وہ پہاڑ اور بے آب و گیاہ بیابانوں کی طرف واپس چلا گیا ۔

اس نے اپنے پہاڑ میں آگ بھڑکائی تھی ۔ تو (زندہ رود) مجھے یہ بتا کہ اس میں سے وہ زمانے کی میعار ، پرکھ پر پورا اترا اور باہر آیا ہے یا اسی میں جل کے رہ گیا ہے ۔

دنیا کی دوسری قو میں بھائی چارے میں سرگرم ہیں جبکہ افغانی بھائی، بھائی سے لڑ رہا ہے ۔

ان کی زندگی ہی سے مشرق کی زندگی ہے، اس کا تو دس سالہ بچہ بھی (لشکر کی قیادت کر سکتا ہے) جنگجو ہے ۔

خود سے بے خبر اس افغانی نے خود کو کھو دیا ہے اور اس نے اپنی صلاحیتوں کو پہچانا ہی نہیں ۔

وہ دل رکھتا ہے یعنی صاحب دل تو ہے لیکن دل سے غافل ہے ۔ گویا افغانی افراد کے جسم، جسم سے اور دل دل سےجدا ہیں ۔

اس مسافر کو منزل تک کا راستہ نہیں ملتا، وہ اپنی جان حقیقی زندگی کے مقاصد سے آگاہ نہیں ہے ۔

اس افغان شناس یعنی افغانیوں کی ذہنیت سے آگاہ شاعر نے جو کچھ بھی دیکھتا ہے وہ بے خوف و خطر کہہ ڈالتا ہے، بڑی اچھی بات کی ہے (شاعر سے مراد خوش حال خان خٹک ہے) ۔

وہ (خٹک) افغانی قوم کا دانشمند حکیم بھی ہے اور اس کی بیماری کا معالج بھی ہے ۔

اس (خٹک) نے قوم کا راز دیکھا اور اسے بیباکی کے ساتھ بیان کر دیا ۔ اس نے سچی بات رندانہ شوخی سے کہہ ڈالی ۔ (وہ بات یہ ہے کہ) ۔

اگر ایک آزاد افغان کو کوئی اونٹ مل جائے جس پر قیمتی سامان، ساز اور موتیوں کا ڈھیر ہو ۔

تو اس کی پست ہمتی کچھ ایسی ہے کہ وہ موتیوں کے اس ڈھیر میں سے اونٹ کی گھنٹی ہی سے خوش ہو جائے گا ۔

ہماری فطرت میں جو تب و تاب ہے وہ دل کی وجہ سے ہے ۔ انسان کے جسم کی بیداری بھی، نیند بھی دل کے بیدار ہونے یا نیند میں ہونے ہی کی وجہ سے ہے

جسم، دل کی موت سے بدل جاتا ہے (اس کی حالت بدل جاتی ہے) اس کے مسامات میں پسینہ خون بن جاتا ہے ۔

دل کے بگاڑ کے باعث جسم بیکار ہے، بیکار ہے ۔ لہذا تو آنکھیں دل پر جما اور دل کے سوا اور کسی چیز پر نہ لپٹ ۔ (تمام توجہ دل کی طرف کر ) ۔ علامہ ہی کے بقول دل مردہ نہیں ہے اسے زندہ کر دوبارہ کہ یہی ہے امتوں کے مرض کہن کا چارا

ایشیا مٹی اور پانی کا ایک جسم ہے اور ملت افغان اس جسم میں ایک دل ہے ۔

اس قوم کے بگاڑ، فساد سے ایشیا کا بگاڑ ہے اور اس کی خوشحالی ایشیا کی خوشحالی ہے

جب تک دل آزاد ہے جسم بھی آزاد رہے گا ورنہ جسم کی حیثیت اس تنکے کی سی ہے جو ہوا کے راستے میں پڑا ہو (ہوا اسے اڑا کر لے جاتی ہے ) ۔

جسم کی طرح دل بھی آئین کا پابند ہے ۔ بغض و کینہ سے دل مر جاتا ہے اور دین سے دل زندہ ہوتا ہے ۔

دین کی قوت مقام وحدت سے ہے ۔ اگر وحدت وجود میں آ جائے تو وہ ملت بن جاتی ہے ۔

مشرق نے مغرب کی پیروی کر کے خود کو بھلا دیا ہے ۔ حالانکہ مشرقی قوموں کو مغرب پر تنقید کرنی چاہیے تھی ۔

یورپ والوں کی قوت بینڈ باجے اور گانے بجانے سے نہیں ہے اور نہ اس قوت کا باعث وہاں کی بے پردہ لڑکیوں کا رقص ہے ۔

نہ یہ سرخ چہرہ محبوبوں کے جادو کی وجہ سے ہے اور نہ ان حسینوں کی ننگی پنڈلیوں اور کٹی ہوئی زلفیں ہیں ۔

اس کا استحال (قوت) لادینی کی وجہ سے نہیں ہے اور نہ اس کی ترقی لاطینی رسم الخط کے باعث ہے ۔

یورپ والوں کی قوت کا باعث ان کا علم و فن ہے اور ان کا چراغ اسی آگ سے روشن ہے ۔

ان کی حکمت، لباس کی شکل و صورت اور انداز کے سبب نہیں اور پگڑی علم و ہنر کی راہ میں رکاوٹ نہیں ہے ۔

اے ناز و ادا والے جوان علم و ہنر کے لیے مغز چاہیے نہ کہ انگریزوں کا لباس کہ ہمارے ہیں ۔

اس راہ (حصول علم و ہنر) میں صرف نگاہ کی ضرورت ہے ۔ اس کے لیے اس ٹوپی یا اس ٹوپی کی ضرورت نہیں ہے ۔

اگر تیری فکر باسلیقہ و با ہنر ہے تو کافی ہے اور اگر تیری طبیعت تیز عقل والی ہے تو (حصول علم وہنر کے لیے) کافی ہے ۔

جب کوئی (شخص) کئی راتیں چراغ کا دھواں کھاتا ہے تو وہ علم و ہنر اور حکمت کا سراغ پا لیتا ہے ۔

علم و حکمت کی سلطنت کی کوئی بھی حد بندی نہیں کر سکا ۔ یہ مسلسل جہاد کے بغیر ہاتھ نہیں آتی ۔

ترک خود کو بھول چکے ہیں اور اہل یورپ کی شراب میں مست ہیں ۔ انھوں نے فرنگیوں کے ہاتھ سے میٹھا زہر کھایا ہے یعنی زہر پی لیا ہے ۔

چونکہ انھوں نے عراق کا تریاق ہاتھ سے دے دیا ہے اس لیے اب ان کے بارے میں سوائے اس کے اور کیا کہا سکتا ہوں کہ خدا ہی ان کا دوست یعنی محافظ ہو ۔

فرنگ، یورپ کاغلام اپنی بے جا نمود کے لیے اہل مغرب سے رقص و سرود لے لیا ہے ۔

انھوں نے اپنی جان کی نقدی کھیل میں ہار دی ہے ۔ چونکہ علم مشکل ہے اس لیے اس نے لہو و لعب ہی سے موافقت کر لی ہے ۔

وہ اپنی تن آسانی کے سبب آسان چیز کو اپنا لیتا ہے ۔ اس کی فطرت آسان ہی کو قبول کر لیتی ہے ۔ (وہ علم و حکمت کے بجائے کھیل تماشے میں مست ہے ) ۔

اس پرانی دنیا میں آسانی تلاش کرنا اس بات کی دلیل ہے کہ جان بدن سے نکل چکی ہے ۔

کیا تجھے علم ہے کہ فرنگی تہذیب کیا ہےاس کی دنیا میں رنگوں کی دو سو جنتیں ہیں ۔

اس تہذیب کے جلووں نے کئی خاندان جلا ڈالے ہیں (انسانیت کے باغ کی) کئی شاخیں اور پتے اور آشیانے جلا ڈالے ہیں ۔

اس تہذیب فرنگ کا ظاہر تو چمکدار اور دلفریب ہے ۔ اس تہذیب کو دیکھنے والے کا دل کمزور ہو جاتا ہے ۔ اور وہ نگاہ کا غلام بن جاتا ہے ۔

آنکھ (ان جلووں کو ) دیکھتی ہے اور دل سینے میں لرزتا ہے وہ اس بت خانے کے آگے سر نگوں ہو جاتا ہے ۔

کوئی جانتا نہیں کہ مشرق کی تقدیر کیا ہے ۔ اس ظاہر پر دل لگانے والے کی تدبیر کیا یعنی بچنے کی کیا تدبیر ہو سکتی ہے ۔

مشرق کی تقدیر بدلنے پر جس کو قدرت حاصل ہے وہ (ایران کے بادشاہ) رضا شاہ پہلوی اور (افغانستان کے بادشاہ) نادر شاہ کا ارادہ اور تدبر ہے ۔

پہلوی ایران کے قدیم بادشاہ قباد کے تخت کا وارث ہے ۔ جس کے ناخنوں نے ایران کی گرہ کو کھولا ۔

نادر جو درانیوں کا سرمایہ ہے ، اس نے ملت اسلامیہ کا نظام قائم کیا ہے۔

ترجمہ: میاں عبدالرشید

وہ نادر شاہ دین اور وطن کے غم میں نڈھال ہے ۔ اس کا لشکر اس کے پہاڑوں سے باہر آیا ۔

وہ (نادر شاہ) سپاہی بھی ہے ، سپاہ گر ہے اور سالار بھی ہے ۔ وہ دشمنوں کے لیے فولاد کی طرح سخت جب کہ دوستوں اپنوں کے ساتھ ریشم کی طرح نرم ۔

میں اس پر قربان جاوَں جس نے خود کو دیکھ لیا ہے اور عصر حاضر کو صحیح طرح جا نچا پرکھا ہے ۔ جو اپنی مخفی صلاحیتوں اور قوتوں سے آگاہ ہے اور عصر حاضر کی روح کو بھی پہچان لیا ہے ۔

اہل مغرب کے طور طریقے جادوگروں کے سے ہیں ۔ اپنے سوا کسی اور پر بھروسا کرنا کافری ہے ۔

(اے زندہ رود) تو ہندو اور ہندوستان کے بارے میں کچھ کہہ ، وہ ہندوستان جس کے ایک تنکے کے برابر بھی بوستان کی قدروقیمت نہیں ہے (دنیا کا عظیم ملک ہے) ۔

اب اس کی مسجدوں میں مومنانہ ہنگامے مٹ چکے ہیں ۔ اور اس کے مندروں میں آگ بجھ گئی ہے ۔

وہ ہندوستان جس کے لیے ہم نے اپنا دل خون کر لیا ہے، وہ ہندوستان جس کی یاد کو ہم نے اپنے دل میں پالا پوسا ہے ۔

تو (زندہ رود) ہمارے غم ہی سے اس (ہندوستان) کے غم کا اندازہ کر کے ۔ اس عاشق کو نہ پہچاننے والے معشوق پر افسوس ہے ۔

اہل ہند فرنگی قانون کے منکر ہو گئے ہیں ۔ اب فرنگ کا سحر و جادو ان پر اثر نہیں کر رہا ۔

غیروں کا آئین روح کے لیے بھاری بوجھ ہے ، اگرچہ غیر کا آئین آسمان ہی سے کیوں نہ آیا ہو ۔

جب آدمی مٹی سے تخلیق ہوتا ہے تو اس کا وجود ایک دل کا حامل ہوتا ہے ۔ اور دل میں ایک آرزو پیدا ہوتی ہے ۔

گناہوں کی لذت چکھنا اس کا کام ہے ۔ اپنے سوا کسی اور کو نہ دیکھنا اس کا کام ہے ۔

کیونکہ گناہ کے بغیر خودی ہاتھ نہیں آتی اور جب تک خودی ہاتھ نہ آئے تو آدمی کے ہاتھ میں صرف شکست ہی آتی ہے ۔

تو (زندہ رود) نے میرے شہر اور دیار، مزار کی زیارت کی ہے اور اپنی آنکھوں کو میرے مزار پر عقیدت کے طور پر ملا بھی ہے ۔

تو حدود کائنات کا شناسا ہے ؛ کیا تو نے دکن میں زندگی کے اثار دیکھے ہیں۔

ترجمہ: میاں عبدالرشید

میں نے دکن میں اپنی آنکھوں سے آنسووں کے بیج بو دیے ہیں اب اس چمن کی مٹی سے لالہ کے پھول اگتے ہیں ۔

دریائے کاویری جو ہر وقت سفر میں ہے ، رواں ہے، میں نے اس کی جان میں ایک نیا شور دیکھا ہے ۔

اے (زندہ رود) تجھے قدرت کی طرف سے دل کو روشن کرنے والا کلام عطا ہوا ہے ۔ میں تیرے آنسووَں کی تپش سے ابھی تک جل رہا ہوں ۔

راز سے آگاہ مردوں کے ناخنوں نے کھرچ کھرچ کر (محنت و کاوش سے ) ساز کی رگوں سے خو ن کی ندی نکالی ہے ۔

وہ نوا (شاعری) جو تیری جان سے باہر آتی ہے (اٹھ رہی ہے) اس نے ہر سینے کو سوز دروں عطا کیا ہے ۔

میں حضور نبی کریم کے حضور میں رہا ہوں ۔ وہ ذات گرامی کہ جن کے بغیر زندگی کے راستے طے نہیں ہوتے ۔

اگرچہ وہاں کسی کو بات کرنے کی جرات نہیں اور وہاں روح کو حضور کے دیدار کے سوا اور کوئی کام نہیں ہوتا ۔

چونکہ میں تیرے اشعار کی گرمی میں جلا ہوا تھا ، میری زبان پر تیرے افکار آ گئے ۔

حضور نے فرمایا یہ شعر جو تو پڑھ رہا ہے کس کا ہے ، اس میں زندگی کے ہنگامے موجود ہیں ۔

اب تو اسی سوز کے ساتھ جو جان سے موافقت رکھتا ہے ، میری طرف سے دریائے کاویری تک یہ دو ایک باتیں پہنچا دے یعنی وہاں کے لوگوں تک پہنچا دے ۔

دنیا میں بھی تو زندہ رود (ندی) ہے اور وہ بھی زندہ ندی ہے ۔ سرود کے اندر سرود خوب رہے گا ۔