بخش 7 - حرکت به کاخ سلاطین مشرق: نادر، ابدالی، سلطان شهید

بھرتری ہری کی آواز (بات) میری جان (دل) میں اتر گئی ( میں بہت متاثر ہوا) اس کی نوا سے میں مست ہو گیا ۔

رومی بولے دل کی آنکھ بیدار ہی اچھی ہے ۔ تو(زندہ رود) اپنے افکار کے چکر سے باہر نکل ۔

تو درویشوں کی محفل سے گزر آیا ہے ۔ اب ذرا سلاطین کے محل بھی دیکھ لے ۔

یہاں مشرق کے بادشاہ جو ایران، افغانستا ن اور دکن کا دبدبہ و شان تھے یہاں انجمن آرا ہیں ۔

یہ نادر ہے جو اتحاد کی رمز سے آگاہ ہے اس نے مسلمانوں کو محبت و دوستی کا پیغام دیا ۔

یہ احمد شاہ ابدالی ہے جس کا وجود عظمت کا نشان ہے، اس نے افغانیوں کو ایک ملت کی بنیاد سے آگاہ کیا (سب مسلمان متحد ہوں ) ۔

یہ محبت کے شہیدوں کا امام ہے، ہند اور چین اور روم و شام کی آبرو ہے (مراد ٹیپو سلطان) ۔

اس (ٹیپو) کا نام سورج اور چاند سے بھی زیادہ روشن ہے ۔ اس کی قبر کی مٹی مجھ سے اور تجھ سے بھی زیادہ زندہ ہے ۔

عشق ایک راز تھا جو اس نے صحرا پر رکھ دیا، یعنی وہ راز عیاں کر دیا ۔ تو نہیں جانتا کہ اس (ٹیپو) نے اپنی جان کس شوق و جذبہ سے قربان کی ۔ انگریزوں کے خلاف جہاد کرتے ہوئے شہید ہوا ۔

بدرو حنین کے خواجہ یعنی رسول اللہ کی نگاہ کے فیض سے کسی سلطان کا فقر جذب حسین کا ۔

سلطان (ٹیپو) اگرچہ اس ہفت روزہ (فانی) دنیا سے چلا گیا ہے لیکن اس کا ڈنکا ابھی تک دکن میں بج رہا ہے ۔

میرے الفاظ اور میرا بیان خام اور میری فکر نامکمل ہے، میں اس مقام کی بات کیسے بیان کر سکتا ہوں ۔

اس (انجمن سلاطین) کے جلووں سے فرشتے بھی صاحب بصارت ہیں وہ فرشتے اس سے زندہ و دانا اور بولنے والے اور باخبر ہیں ۔

وہ ایک ایسا محل ہے جسے در ودیوار فیروزہ سے بنے ہوئے ہیں ۔ نیلا آسمان اسکے پہلو میں ہے ۔

اس کی رفعت دنیاوی پیمانوں اور اندازوں سے بڑھ کر ہے اسے دیکھ کر سوچ کی حیرت گم ہو جاتی ہے ۔

اس محل کے وہ پھول وہ سرود سمن اور وہ شاخسار وہ سب اپنی لطافت کے لحاظ سے بہار کی تصویر ہیں ۔

ہر لمحہ پھولوں کی پتیاں اور درختوں کے پتے ظاہر ہونے کے ذوق سے نیا رنگ اختیار کرتے ہیں ۔

یہاں کی باد صبا کچھ اس قدر جادوگر ہے کہ پلک جھپکنے میں زرد رنگ سرخ رنگ ہو جاتا ہے ۔

یہاں ہر طرف چشمے موتی لٹا رہے ہیں ۔ اور بہشت میں پیدا شدہ پرندے خوب چہچہا رہے ہیں ۔

اس بلند محل کے اندر ایک ایسی بارگاہ ہے جس کے ذرے کی کمند میں آفتاب آیا ہوا ہے ۔

اس محل کی چھتیں اور دیواریں اور ستون سب عقیق سے بنے ہوئے ہیں ۔ اس کے فرش ریشم کے اور ان فرشتوں کے حاشیے بھی عقیق کے ہیں ۔

اس گھر کے دائیں بائیں حوریں زریں کمر بندوں کے ساتھ قطار قطار کھڑی ہیں ۔

انکے درمیان سونے کے تخت پر وہ بادشاہ بیٹھے ہوئے تھے جو جادہ و حشمت میں جمشید کی طرح اور فرد فال میں بہرام گور کی مانند تھے ۔

رومی نے جو حسن ادب کا آئینہ ہے بڑی ہی دلبری کے انداز میں ہونٹ کھولے،یعنی بولے ۔

اور کہا کہ یہ (زندہ رود) سرزمین مشرق کا ایک مرد شاعر ہے ۔ وہ کوئی شاعر ہے یا مشرق کا ساحر ہے یعنی میں اسے شاعر کہو ں یا ساحر (علامہ کے باعظمت شاعری کی طرف اشارہ ہے ) ۔

اس کی فکر لطیف اور اس کی جان دردمند ہے ۔ اس کے اشعار نے مشرق کے لوگوں کے دلوں میں سوز پیدا کر دیا ہے ۔

اے مشرق کے نکتہ دان خوش آمدید، اے کہ تجھے فارسی زبان ( میں شعر گوئی) زیب دیتی ہے ۔

ہم دونوں راز سے آگاہ ہیں تو جو کچھ ایران کے بارے میں جانتا ہے وہ بیان کر ۔

ایران نے بڑی مدت کے بعد اپنی آنکھیں خود پر کھولیں لیکن پھر وہ ایک جال کے پھندے میں پھنس گیا ۔

وہ یورپی شوخ و سنگ حسینوں کے ناز و ادا پر مرتا ہے (ان پر فریفتہ ہے) وہ خود ایک تہذیب کا خالق ہے لیکن انگریزوں کی پیروی میں لگا ہوا ہے ۔

اس ملک و نسب کے فریفتہ ایران کا اب یہی کام ہے کہ وہ ایران کے قدیم کافر بادشاہ شاہ پور کا ذکر تو فخر و ناز سے کرتا ہے لیکن اہل عرب کی تحقیر کرتا ہے ۔

اس کی زندگی واردات (نئے مشاہدات) سے خالی ہے اور وہ پرانی قبروں سے زندگی تلاش کرتا ہے ۔ پرانی قبروں سے مراد ایران کی قدیم کافرانہ تہذیب و ثقافت ہے ۔

اس نے وطن پرستی اختیار کر لی اور خود سے گزر گیا (اپنے آپ کو نظر انداز کر دیا ) ۔ اس نے رستم کو تو دل دے دیا لیکن حضرت علی حیدر کرار کو چھوڑ چکا ہے ۔

وہ فرنگ (یورپ) سے باطل نقش قبول کر رہا ہے اور اپنی داستان بھی اسی سے لے رہا ہے ۔

یزد جرد (اسلامی دور سے پہلے کے آخری بادشاہ) کے زمانے میں ایران پر بڑھاپا چھایا ہوا تھا اورا س کا چہرہ خون سرد کی وجہ سے بے رونق ہو چکا تھا ۔

اس کا دین و آئین اور نظام سب پرانے ہیں ۔ اس کی صبح کی روشنی اور رات کی تاریکی بھی پرانی ہے ۔

اس کی تاک کی صراحی میں شراب کی لہریں نہ تھیں اور اس کے خاک کے ڈھیر میں ایک چنگاری بھی نہ تھی ۔

یہاں تک کہ صحرائے عرب سے وہاں (ایران) ایک ہنگامہ برپا ہوا جس نے انہیں ایک نئی زندگی عطا کی ۔

اس قسم کا حشر خدا کی عنایات میں سے ہے کہ فارس (ایران) تو اب تک باقی ہے لیکن رومتہ الکبریٰ اب کہاں ہے (نہیں ہے) گویا اسلام کے باعث ایران زندہ ہے لیکن رومن سلطنت اسلام قبول نہ کرنے سے فنا ہو گئی ۔

وہ کہ جس کے جسم سے پاک جان نکل گئی یا نکل جاتی ہے تو وہ پھر قیامت برپا ہونے سے پہلے قبر سے نہیں اٹھتا ۔

عرب کے صحرا نشین مردوں نے ایران میں ایک نئی روح پھونکی، اس کے بعد وہ پھر اپنے ریگستان کو لوٹ گئے ۔

انھوں (عربوں ) نے ہماری زندگی کی تختی سے پرانی تحریر مٹا دی اور لوٹ گئے ۔ وہ ایران کے لیے نئے دور کا سازوسامان لائے اور چلے گئے ۔

افسوس کہ ایرانیوں نے عرب کے احسان کو نہ پہچانا اور فرنگیوں (انگریزوں ) کی آگ میں پگھل کر رہ گئے ۔