بخش 6 - صحبت با شاعر هندی برتری هری

وہاں (بہشت میں ) محلوں اور خیموں میں مقیم حوروں کے لیے میری غزل (جو میں نے وہاں گائی) مکمل سوز کی دعوت بن گئی ۔

ان (حوروں ) میں سے ایک نے خیمے سے سر باہر نکالا اور ایک دوسری نے بالاخانہ سے چہرہ نکال کر مجھے دیکھا ۔

میں نے اس بہشت جاوداں میں رہنے والے ہر دل کو اس خاکدان یعنی ہندوستان کا درد و غم دیا ۔

پاک فطرت پیر (مولانا رومی) زیر لب مسکرائے اور بولے ، اے ہند میں پیدا ہونے والے جادوگر (زندہ رود) ۔

تو ذرا اس ہندی شاعر کو دیکھ جس کے فیض نگاہ سے شبنم کا قطرہ موتی بن جاتا ہے ۔

وہ ایک نکتہ سنج ہے جس کا نام برتری ہے، اس کی فطرت بہار کے بادل کی سی ہے ۔

اس نے چمن سے نئے نئے کھلے غنچے (نئی کھلی کلیوں ) کے سوا اور کچھ نہیں چنا ۔

وہ ایک بادشاہ ہے جو شاعر بھی ہے اور اس کی شاعری قدرومنزلت کی حامل ہے، اور فقیر بھی اس کا مقام و مرتبہ بلند ہے ۔

وہ اپنے انوکھے اور نادر فکر سے خوبصورت نقش بناتا ہے، اس کے دو یعنی چند لفظوں میں جہان معنی پوشیدہ ہوتا ہے ۔

وہ زندگی کے کارخانے سے باخبر ہے، وہ خود جمشید اور اس کی شاعری جام جم (جمشید کا پیالہ جس میں سے دنیا نظر آتی تھی) ہے ۔

ہم اس کی مذکورہ ، خوبیوں کو مدنظر رکھتے ہوئے تعظیم کے لیے کھڑے ہو گئے ۔ پھر اس کے ساتھ صحبت آراستہ کی ۔

اے (برتری ہری) کہ تو نے بڑی دل نواز گہری باتیں کی ہیں اور اہل مشرق تیری گفتار سے دانائے راز (رازوں سے باخبر ) ہو گئے ہیں ۔

ذرا یہ تو مجھے بتایئے کہ شعر میں سوز کہاں سے یا کیونکر پیدا ہوتا ہے، یہ بتا کہ آیا وہ خودی سے پیدا ہوتا ہے یا خدا کی طرف سے آتا ہے

کوئی نہیں جانتا کہ دنیا میں شاعر کہاں ہے ۔ اسکا راگ نغمہ کے اونچے نچلے سروں کے پردے میں نہاں رہتا ہے ۔

ایسا شاعر جس کے پہلو، سینے میں بے قرار دل ہوتا ہے وہ خدا کے حضور بھی بے قرار رہتا ہے ۔

ہماری جان میں لذت جستجو سے پیدا ہوتی ہے اور شعر میں سوز آرزو ہی کے مقام سے پیدا ہوتا ہے ۔

اے (زندہ رود) تو جو شاعری کی انگور کے شراب سے ہمیشہ مست رہتا ہے ، اگر تجھے آرزو کا یہ مقام حاصل ہو جائے ۔

تو اس دنیا میں دو ایک شعروں سے بہشت کے حوروں کے دل چھینے یا جیتے جا سکتے ہیں ۔

میں نے اہل ہند کو بے قرار دیکھا ہے، اب یہ وقت ہے کہ حق تو حق کا راز کھل کر یا واضح طور پر بیان کر دے ۔

(اے اہل ہند) تمہارے یہ تنک مایہ خدا (مادی اشیا) پتھر اور اینٹوں سے بنے ہوئے ہیں ان سے بڑھ کر اور ایک بلند ہستی (خدا) ہے جو دیر و کنشت سے دور ہے ۔

جو سجدہ ذوق عمل کے بغیر ہو گا وہ خشک بھی ہے اور کہیں نہیں پہنچاتا، زندگی سر تا پا کردار ہے خواہ اچھا ہو یا برا ۔

میں تجھ سے ایک ایسی بات کھل کر کہتا ہوں جسے ہر کوئی نہیں جانتا، وہ بندہ بہت اچھا جس نے یہ بات دل کی تختی پر لکھ لی ۔

یہ جہان جو تو دیکھ رہا ہے خدا کے اثر سے نہیں ہے ۔ چرخہ تو تیرا ہے اور وہ دھاگا بھی تیرا ہے جو تو نے چرخے کے تکلے پر کاتا ہے ۔ گویا اس دنیا میں جو بھی اچھائی برائی ہے وہ خود انسان کے اپنے اعمال کا نتیجہ ہے ۔

تو مکافاتِ عمل کے آئین کے آگے سجدہ کر، اس لیے کہ یہ دوزخ اور برزخ اور بہشت سب عمل ہی سے پیدا ہوتے ہیں ۔ بقول علامہ ، عمل سے زندگی بنتی ہے جنت بھی جہنم بھی یہ خاکی اپنی فطرت میں نہ نوری ہے نہ ناری ہے