بخش 5 - در حضور شاه همدان

(اے شاہِ ہمدان ) میں آپ سے خدا کے ایک بھید کا حل جاننا چاہتا ہوں ۔ خدا نے خود شیطان کو پیدا کیا اور ہم سے اطاعت چاہی ۔

برائی اور گناہ کو اس طرح آراستہ کرنا (دلفریب بنانا ) اور ہمارے عمل سے نیکی چاہنا (عجیب سی بات ہے ) ۔

میں آپ سے پوچھنا چاہتا ہوں کہ یہ جادوگری کیا ہے ۔ ایک برے ساتھی کے ساتھ جوا کھیلنے کا کیا مطلب ہے

ایک طرف یہ خاک کی مٹھی یعنی انسان اور دوسری طرف یہ گردش کرنے والا آسمان، آپ ہی فرمائیے کہ کیا اسے (خدا کو) یہ کام زیب دیتا ہے

ہمارے اعمال اور ہمارے افکار ہمارے لیے اذیت کا باعث ہیں ۔ چنانچہ دانتوں سے اپنے ہاتھ کاٹنا ہمارا کام ہے (اظہار حیرت ہے ) ۔

وہ انسان جو اپنے آپ سے باخبر ہے وہ نقصان سے بھی نفع پیدا کر لیتا ہے ۔

شیطان کے ساتھ بزم آرائی (دوستی) آدمی کے لیے جان کا عذاب ہے مگر شیطان کے ساتھ جنگ آدمی کے لیے جمال ہے ۔

اپنے آپ کو شیطان کے مقابلے میں لانا چاہیے ۔ تو (اے انسان ) تو سراپا تلوار ہے جبکہ شیطان سان ہے ۔

تو زیادہ تیز ہو (تلوار زیادہ تیز کر ) تا کہ دشمن (شیطان) پر تیرا وار بڑا سخت پڑے، کاری ہو ۔ ورنہ تو دونوں جہانوں میں سیاہ بخت رہے گا ۔

آسمان کے نیچے (اس دنیا میں ) آدمی، آدمی کو کھا رہا ہے اور ایک قوم دوسری قوم کو لوٹ رہی ہے ۔

میری جان خطہ کشمیر کے لوگوں کے حالات دیکھ کر سپند کے دانے کی طرح چٹخ رہی ہے ۔ اور میرے دل سے درد بھرے نالے اٹھتے ہیں ۔

کشمیری قوم ایک باریک بیں بہت سوجھ بوجھ والی دانشمند اور خوش شکل ہے، دنیا میں اس کی ہنرمندی ایک دلیل ہے ۔

اس کا پیالہ اس کے اپنے ہی خون سے لت پت ہے ۔ میری بانسری سے اسی کے حالات کی فریاد نکل رہی ہے ۔

جب سے یہ قوم خودی سے بے نصیب ہو گئی ہے وہ اپنے ہی وطن میں اجنبی بن کے رہ گئی ہے ۔

اس کے ہاتھوں کی مزدوری دوسروں کے ہاتھ میں ہے ۔ اس کے دریا کی مچھلی دوسروں کے کانٹے میں پھنسی ہوئی ہے ۔

دوسری قوموں کے قافلے (ترقی کی ) منزل کی طرف قدم بقدم چلے جا رہے ہیں لیکن اس (بدقسمت قوم) کا کام ناخوب بھی ہے اور ان گھڑت اور ناقص بھی ۔

غلامی سے اس کے جذبے ختم ہو گئے ہیں او ر اس کی تاک (انگور کی رگ ) کے اندر آگ بجھ گئی ہے ۔

تو کہیں یہ نہ سمجھ کہ یہ قوم ہمیشہ ایسی ہی رہی ہے اور اسی طرح اس نے ہمیشہ دوسروں کے آگے اپنی پیشانی رگڑی ہے ۔

وہ کبھی صف شکن بھی رہی ہے اور زبردست جانباز اور حوصلہ مند رہی ہے ۔

اس (کشمیر) کے برف پوش پہاڑ دیکھ اور یہاں کے درخت چنار کے آتشیں ہاتھ یعنی پتے دیکھ ۔

موسم بہار میں یہاں کے پتھروں سے لعل اگتے ہیں ۔ (لالہ کے سرخ رنگ کے پھول) یہاں کی مٹی سے رنگ کا ایک طوفان اٹھتا ہے ۔

پہاڑ اور وادی میں بادلوں کے ٹکڑے اس طرح اڑتے پھرتے ہیں جیسے روئی دھنیئے کی کما ن سے دھنکی ہوئی روئی اڑتی ہے ۔

وہاں کے پہاڑ، دریا اور سورج کا وقت غروب (اتنا خوبصورت منظر پیش کرتے ہیں کہ ) میں نے وہاں خدا کو بے حجاب دیکھا ہے (اللہ تعالیٰ کا جمال بے نقاب نظر آتا ہے ) ۔

میں وہاں کے نشاط باغ میں بادِ نسیم کے ساتھ ادھر ادھر گھومتا رہا اور خوشی سے سرشار ہو کر مولانا رومی کی مثنوی کا پہلا شعر بشنوازنے گاتا رہا ۔ شعر یہ ہے،

وہاں شاخوں میں بیٹھے ایک پرندے نے مجھ سے کہا کہ اس بہار کی قیمت تو ایک کوڑی کے برابر بھی نہیں ہے ۔

لالہ کے پھول اگے اور نرگس شہلا پھوٹی، باد بہار نے اس سرزمین کا گریبان پھاڑ دیا ہے ۔

اس کے پہاڑوں اور ان کے درمیانی راستوں میں مدتوں سے چنبیلی کے ایسے پھول کھل رہے ہیں جو چاند کی روشنی سے بھی زیادہ پاکیزہ زیادہ چمکدار اور سفید تھے ۔

اس (وادی کشمیر ) میں مدتوں گلاب کے پھول کھلتے اور مرجھا جاتے رہے لیکن ہماری سرزمین سے کوئی اور شہاب الدین پیدا نہ ہوا ۔

صبح کے اس پرندے کے پر سوز نالہ نے میری جان میں نیا جوش پیدا کر دیا ہے ۔

وہاں میں نے ایک دیوانے کو خروش یا فریاد کرتے دیکھا اور اس کیفیت نے میرے صبر و جوش کی متاع ہی اڑا لی ( میں بیقرار ہو گیا ) ۔

تو ہمیں ہمارے حال پر چھوڑ دے اور ہم سے نالہ مستانہ کی توقع نہ رکھ ۔ تو پھول کی شاخ سے گزر جا کیونکہ یہ محض رنگ و بو کا جادو ہے ۔

تو کہتا ہے کہ شبنم لالہ کی پتیوں سے ٹپکتی رہی ہے ۔ ارے غافل یہ لالہ نہیں یہ تو ایک دل ہے جو ندی کے کنارے بیٹھا رو رہا ہے ۔

یہ پروں کی مٹھی کہاں اورر اس قسم کا نغمہ کہاں یہ تو غنی کی روح ہے جو آرزو کی موت پر ماتم کر رہی ہے ۔

اے بادِ صبا اگر جنیوا کی طرف تیرا گزر ہو تو وہاں ہماری طرف سے مجلس اقوام سے ہماری یہ بات کہنا ۔

کسان اور کھیت اور ندیاں اور کیاریاں انھوں نے بیچ دیں ۔ انھوں نے ایک قوم کو بیچ دیا اور کس قدر سستا بیچ دیا ۔ انگریز حکمرانوں نے اپنے لالچ اور مسلمانوں کو ذلیل و خوار کرنے کے لیے کشمیر کو ایک ہندو ڈوگرہ کے ہاتھ معمولی قیمت پر بیچ دیا تھا ۔

اے بیٹے میں تجھے ایک رمز کی بات بتاتا ہوں ، وہ یہ کہ جسم (بدن) سراسر مٹی ہے جبکہ جان ایک قیمتی موتی ہے ۔

روح کی خاطر بدن کو پگھلا دینا چاہیے، پاک روح اور خاک بدن میں تمیز کرنی چاہیے ۔

اگر تو جسم (بدن) سے اس کا کوئی ٹکڑا کاٹ لے تو بدن کا وہ ٹکڑا ہمیشہ کے لیے تیرے ہاتھوں سے نکل گیا ۔

لیکن وہ روح جو محبوب حقیقی کے جلوے میں محو و مست ہو جائے اگرتو اسے ہاتھ سے دے دے تو وہ پھر تیرے ہاتھ آ جائے گی (شہید زندہ ہیں ) ۔

اس (روح) کا جوہر کسی بھی شے کی مانند نہیں ہے، وہ اگرچہ جسم کی قید میں ہے لیکن قید میں نہیں ہے ۔

اگر تو جان کی حفاظت کرے گا (بچا بچا کے رکھے گا ) تو یہ بدن میں مر جائے گی اور اگر اسے تو خدا کی راہ میں قربان کر دے تو وہ انجمن کی رونق بنے گی ۔

اے جوان مردجلوہ مستِ جان کیا ہے اے جوانمرد جان کو ہاتھ سے دے دینے سے کیا مراد ہے

جان دینا کیا ہے یہ اسے حق کے حوالے کرنا ہے اور پہاڑ کو اس کے سوزِ جاں سے پگھلا دینا ہے ۔

جلوہ مستی کیا ہے یہ خود (اپنے آپ) کو پا لینا ہے (خودی سے آگاہ ہونا ہے ) راتوں میں ستاروں کی طرح چمکنا ہے ۔

اپنے آپ کو نہ پانا گویا نابود ہو جانا ہے ، جبکہ اپنے آپ کو پا لینا خود کو اپنے سپرد کر دینا ہے ۔ خود کو زندگی عطا کرنا ہے ۔

جس نے خود (اپنے آپ) کو دیکھ لیا اور اپنے سوا کسی اور کو نہ دیکھا، اس نے اپنے قید خانے سے سامان باہر نکال لیا (قید سے آزاد ہو گیا ) ۔

وہ جلوہ بدمست جو خود کو دیکھتا ہے وہ ڈنگ یا زہر کو شہد سے بہتر سمجھتا ہے ۔

(اپنی معرفت سے آگاہ) انسان کی نگاہوں میں جان ہوا کی طرح سستی ہوتی ہے ۔ اس کے سامنے اس کا قیدخانہ (جسم) کانپتا ہے ۔

اس کا تیشہ پتھر کو بھی توڑ دیتا ہے، یہاں تک کہ وہ زمانے سے اپنا حصہ لے لیتا ہے (چھین لیتا ہے ) ۔

جب وہ جان سے گزر جاتا ہے (اللہ کی راہ میں جان قربان کر دیتا ہے ) تو اس کی جان اس کی جان بن جاتی ہے ورنہ اس کی جان اس کی دو ایک پل کی مہمان ہے یعنی عارضی و فانی ہے ۔

آپ نے برائی اور اچھائی (بدی اور نیکی ) کی حکمت کے بارے میں فرمایا ہے، اے پیر دانا ایک اور گہری بات بھی بیان فرمائیں ۔

آپ صاحبانِ معرفت و عرفان (معرفت پر نگاہ رکھنے والے) کے مرشد رہے ہیں اور بادشاہوں کے اسرار سے بھی آگاہ رہے ہیں ۔

ہم غریب ہیں اور حکمران ہم سے خراج مانگتا ہے، تخت و تاج کے اعتبار کی اصل کیا ہے (حیثیت کیا ہے )

مشرق اور مغرب میں بادشاہت کی اصل (حقیقت) کیا ہے یہ قوموں کی مرضی سے یا جنگ و جدل سے وجود پاتی ہے ۔

اے بلند مرتبہ شخص میں تجھے واضح طور پر (صاف صاف) بتاتا ہوں کہ دو آدمیوں کے علاوہ کسی اور کو خراج دینا حرام ہے ۔

یا تو وہ اولی الامر منکم ، جس کی شان ہے اور خدا کی یعنی قرآن کریم کی آیت اس سلسلے میں دلیل ہے ۔ یعنی صاحب اقتدار اہل ایمان ہو، رسول اللہ کا اطاعت گزار اور حضور کے فرمودہ اصولوں کے مطابق حکمرانی کرتا ہو، اور جو حکمران اسلامی نظریات سے بیگانہ ہو اسے حاکم نہیں ماننا چاہیے نہ خراج دینا چاہیے ۔

یا خراج کا حقدار وہ جواں مرد ہے جو باطل قوتوں کے خلاف طوفانی ہوا کی طرح اٹھے، جو شہر (کفار کا ملک) فتح کرنے والا ہو اور جو اپنے نفس امارہ کے خلاف جہاد کرنے والا ہو ۔

دشمنی کے دن (جنگ کے موقع پر) وہ اپنی قاہری (زبردست قوت) سے ملک فتح کرنے والا ہو اور صلح کے دن یعنی امن کے موقع پر وہ اپنے دلبرانہ طور طریقوں سے لوگوں کے دل جیتنے والا ہو، یعنی اس میں جلال اور جمال دونوں صفات ہوں ۔

ایران اور ہندوستان کو خریدا جا سکتا ہے مگر بادشاہت کسی سے نہیں خریدی جا سکتی ۔

اے ہنرمند نوجوان (زندہ رود) جام جمشید کسی نے شیشہ گر کی دکان سے نہیں خریدا ۔

اور اگر کوئی وہاں سے خرید بھی لیتا ہے تو وہ مال شیشے کے سوا کچھ نہ ہو سکا جس کا کام آخرکار ٹوٹنا ہے۔

ہندوستان کو آزادی کا یہ ذوق کس نے دیا شکار کو شکاری کا جنون کس نے دیا

(یہ ذوق) ان برہمن زادوں نے دیا جو زندہ دل ہیں ، جن کے حسین چہروں کے سامنے لالہ کا سرخ پھول بھی شرمسار ہے ۔

یہ تیز نگاہ اور تجربہ کار اور جفاکش ، محنتی ہیں ۔ اور ان کی نگاہ سے انگریز شور کرتے ہوئے واویلا مچا رہے ہیں ۔

ان کی اصل ہماری دامن گیر مٹی (کشمیر) سے ہے ۔ ان ستاروں کا مطلع (طلوع ہونا) ہمارا کشمیر ہے ۔

اگر تو (زندہ رود) ہماری خاک کو شعلے سے خالی سمجھتا ہے تو پھر ذرا اپنے اندر ہی نظر ڈال، یعنی تو بھی تو کشمیری ہے ۔ کیا تو نہیں چاہتا کہ کشمیر آزاد ہو ۔

یہ جو تجھ میں سارا سوز ہے یہ کہاں سے آیا ہے، یہ موسم بہار کی ہوا کے جھونکے کہاں سے اٹھے ہیں

یہ وہی ہوا ہے جس کی تاثیر سے ہمارے پہاڑ بڑے رنگ و بو پاتے ہیں ۔

کیا تجھے کچھ علم ہے کہ ایک روز ولر جھیل میں ایک موج نے دوسری موج سے کہا

ہم کب تک اس سمندر میں ایک دوسرے سے ٹکراتی رہیں گی ، تو اٹھ تا کہ ہم کچھ دیر ساحل سے سر ٹکرائیں ۔

ہماری پیدا کی ہوئی وہ پرانی ندی جس کا شور وادی، پہاڑ اور دمن میں ہے ۔

وہ ہر لمحہ خود کو راستے کے پتھروں سے ٹکراتی ہے، یہاں تک کہ وہ پہاڑ کی بنیاد تک کو کھو ددیتی ہے (پہاڑ کے اندر بھی راستہ بنا لیتی ہے ) ۔

وہ جوان جس نے شہر و بیابان اور وادی کو اپنی لپیٹ میں لے رکھا ہے ، اس کی پرورش سو ماؤں کے دودھ سے ہوئی ہے ۔

اس کا دبدبہ انسانوں کے لیے ایک قیامت کی حیثیت رکھتا ہے، جب اس میں سیلاب آتا ہے تو وہ بڑی تباہی مچاتا ہے ۔ یہ ہمارے اندر سے نکلا ہے کسی اور جگہ سے تو نہیں نکلا ۔ تو یہ سب کچھ کشمیر ہی کی بدولت ہے ۔ گویا کشمیر نہ ہوتا تو جہلم بھی نہ ہوتا ۔

ساحل کی حدود میں زندگی بسر کرنا غلطی ہے، ہمارا ساحل ہمارے راستے کا پتھر بنا ہو اہے ۔

ساحل سے موافقت کر لینا (کناروں کے اندر رہنا) ہمیشہ کی موت ہے، خواہ اے موج تو سمندر میں صبح و شام کیوں نہ لڑھکتی رہے، طوفان ہی کیوں نہ برپا کرتی رہے ۔

زندگی تو کوہ و دشت میں اپنی جولانیاں دکھانا ہے ، مبارک ہے وہ موج ہو ساحل سے باہر نکل گئی ۔

اے (زندہ رود) تو نے تو زندگی کی پیشانی کی لکیریں پڑھی ہیں اور اہل مشرق کو زندگی کا ہنگامہ دیا ہے (تجھے قوموں کی تقدیر کی پوری خبر ہے) ۔

اے کہ تو ایسی آہ رکھتا ہے جو جگر کو جلاتی ہے ، تو اس سے بے قرار ہے تو ہم تجھ سے زیادہ بے قرار ہیں ۔

اے کہ تجھ سے باغ کے پرندوں میں ہائے و ہو کا شور ہے، اور سبزہ تیرے آنسووَں سے وضو کرتا ہے ۔

اے کہ تیری طبع سے پھولوں کی کیاری کھل اٹھی، اے کہ تیری امید سے دوسری جانیں بھی پرامید ہو گئی ہیں ۔

قافلوں کے لیے تیری صدا بیداری اور کوچ کی گھنٹی ہے، پھر تو خطہ کشمیر کے لوگوں سے نا امید کیوں ہے

ان (اہل کشمیر) کے سینوں میں مردہ دل نہیں ہیں ، ان کا شعلہ (انگارہ) برف کے نیچے دب کر نہیں بجھا ۔

ذرا ٹھہر تاکہ تو دیکھے کہ ایک ملت (اہل کشمیر) صور کی آواز کے بغیر ہی قبروں کی مٹی سے اٹھنے والی ہے ۔ (وہ وقت قریب ہے جب اہل کشمیر غلامی سے نجات پا لیں گے ) ۔

اے صاحب نظر (زندہ رود) تو غم نہ کھا تو ایسی آہ کھینچ جو خشک و تر کو جلا دے ۔

اس نیلے آسمان کے نیچے بہت سے شہر ایک مرد درویش کے سوز دل سے جل اٹھے ہیں ۔

سلطنت پانی کے بلبلے سے بھی زیادہ نازک چیز ہے، اسے ایک پھونک سے ختم کیا جا سکتا ہے ۔

نوا (شاعری) ہی سے امتوں کی تقدیر بنائی جا سکتی ہے اور اسی شاعری ہی سے قوموں کو تباہ کیا جا سکتا ہے یا انکی تعمیر کی جا سکتی ہے ۔

اگرچہ تیرا نشتر کلام دلوں میں پیوست ہو چکا ہے لیکن جو کچھ تو ہے ویسا تجھے کسی نے نہیں دیکھا ۔

تیرا پردہ اگرچہ شاعری کے نغمے سے ہے ورنہ جو کچھ تو کہتا ہے وہ شاعری سے ماورا ہے ۔

تو بہشت میں (جہاں اس وقت زندہ رود رومی کے ساتھ ہے ) ایک نوائے مستانہ نیا ہنگامہ برپا کر دے ۔

تو نشہَ درویشی کے ساتھ موافقت کر اور مسلسل پی (مست رہ) جب تو اس نشہ میں پختہ ہو جائے تو اپنے آپ کو جمشید کی سلطنت کے مقابلے پر لے آ ۔

پوچھنے لگے کہ کیا ہمارا جہان تجھ سے موافقت کر رہا ہے میں نے کہا نہیں ، تو اس پر انھوں نے کہا کہ اس جہان کو درہم برہم کر دے ۔

میں نے شراب خانوں میں د یکھا ہے کہ وہاں کوئی بھی شایستہ مدِ مقابل نہیں ہے ۔ تو رستم دستاں کے ساتھ بیٹھ کر پی مغچوں کے ساتھ بیٹھ کر نہ پی ۔

اے لالہَ صحرائی تو اکیلا نہیں جل سکتا تو جگر میں حرارت پیدا کرنے والا اپنا یہ داغ آدمی کے سینے میں لگا ، پیدا کر ۔

تو اس کائنات کا سوزِ دروں ہے اور تو ہی اس کے خون کی حرارت ہے ۔ اگر تجھے اس بات پر یقین نہیں ہے تو پھر جہان کے بدن میں چیر ، پھاڑ ڈال کر دیکھ لے ۔

کیا عقل تیری چراغ ہے اگر ہے تو اسے کسی راہ گزر میں رکھ دے ۔

میں اپنے خون دل کا ایک ٹکڑا آنکھوں سے گرا رہا ہوں ، تو میرے بدخشاں کا ایک لعل اٹھا لے اور اسے اپنی انگوٹھی میں جڑ لے ۔