بخش 4 - زیارت امیر کبیر حضرت سید علی همدانی و ملا طاهر غنی کشمیری

رومی کی بات نے میرے دل میں سوز پیدا کر دیا ۔ آہ پنجاب کی وہ قدر و منزلت والی سرزمین ۔

بہشت میں دوستوں کی یاد کی گرمی نے مجھے بہت تڑپا دیا اور اس طرح میں نے بہشت میں پرانے غم خرید لیے یعنی پرانے غم تازہ ہو گئے ۔

اچانک اس گلشن (بہشت) میں حوضِ کوثر کے کنارے سے ایک دردمند صدا بلند ہوئی ۔

رومی نے کہا جو کچھ نظر آ رہا ہے اس سے دل لگا، اے بیٹے ، برخوردار جو کچھ گزر چکا ہے اس سے دل نہ لگا ۔

یہ رنگیں نوا شاعر طاہر غنی ہے جس کا فقر اندر سے بھی غنی (بے نیاز) ہے اور باہر سے بھی غنی ۔

یہ ہمیشہ مست رہنے والا (غنی) سید والا مقام کے حضور نغمہ الاپ رہا تھا ۔

یہ یعنی علی ہمدانی سادات کے سردار اور عجم کے سالار ہیں ۔ ان کے ہاتھ امتوں کی تقدیر کا معمار (تقدیر بنانے سنوارنے والے) ہیں ۔ ان کی تبلیغ سے اہل کشمیر اسلام میں شامل ہوئے اور ان کی تقدیر سنور گئی ۔

جب امام غزالی نے اللہ ہو کا سبق لیا تو انھوں نے ان (ہمدانی) کے خاندان کے بزرگوں سے ذکر و فکر کی تعلیم پائی تھی ۔

اس جنت نظیر کشور (کشمیر) کے وہ مرشد تھے اور امیروں اور درویشوں کے وہ مشیر تھے ۔

اس خطہَ کشمیر کو اس دریا آستین (فیاض) شاہ ہمدانی نے علم اور صنعت اور تہذیب و دین عطا کیا ۔ ( ان کے ساتھ ایران سے آئے ہوئے صنعت کاروں نے کشمیریوں کو قالین سازی، خطاطی، پارچہ بانی اور نقاشی وغیرہ کے ہنر سکھائے اور اسلامی تہذیب و ثقافت سے آشنا کیا ) ۔

انھوں (ہمدانی) نے کشمیریوں کو نادر اور دل پذیر ہنر سکھا کر کشمیر کو برصغیر میں چھوٹا ایران بنا دیا ۔

ان (ہمدانی) کی ایک نگاہ سو گرہیں کھولتی ہے یعنی (مشکلیں حل کرتی ہے ) تو بھی اٹھ اور ان کے تیر کو دل میں راہ دے ۔