بخش 2 - مجلس خدایان اقوام قدیم

تیز ہوا تھی، بادل رات کی طرح سیاہ جسکی تاریکی میں بجلی اپنی چمک بھی کھو چکی تھی ۔

وہ ہوا میں لٹکا ہو ایک سمندر تھا جس کا دامن تو پھٹا ہوا تھا لیکن اس میں سے موتی نہیں گرتے تھے ۔

اس کا ساحل ناپید تھا ۔ جبکہ اس کی موجیں گرم خیز تھیں ۔ یہ موجیں تیزی سے اٹھ رہی تھیں لیکن ہوا سے نہیں ٹکرا رہی تھیں ۔

رومی اور میں اس سیاہ سمندر میں کچھ اس طرح تھے جیسے ضمیر کے شبستان میں خیال ہو ۔

انھوں (رومی) نے تو بہت سے سفر دیکھے ہوئے تھے جبکہ میں نیا نیا مسافر بنا تھا ۔ اس صورت حال میں میری دونوں آنکھوں میں نظر بیقرار ہو گئی ۔

میں ہر لمحہ یہ کہتا تھا کہ میری نگاہ وہاں تک نہیں پہنچ رہی ۔ وہ دوسرا جہان جس کا ذکر آپ (رومی) نے کیا تھا وہ کہاں ہے مجھے نظر نہیں آتا ۔

یہاں تک کہ کوہسار کا نشان ظاہر ہوا ۔ ندی اور سبزہ زار نظر آ گئے ۔

یہاں کے پہاڑ اور صحرا ایسے تھے جن میں سینکڑوں بہاریں تھیں ۔ ان پہاڑوں سے آنے والی بادِ نسیم میں خوشبو رچی بسی تھی ۔

وہاں ایک طرح کے راگ الاپنے والے پرندوں کے نغمے تھے، وہ چشموں کا سلسلہ اور تازہ اگا سبزہ تھا ۔

اس فضا کے فیض سے جسم اور زیادہ پائیدار ہو گیا جبکہ بدن میں پاک جان خوب دیکھنے والی بن گئی ۔

میں نے ایک پہاڑی پر نظر ڈالی ۔ وہ پہاڑ اور وادی اور وہ دشت و در کا نظارہ سبھی مبارک یا دلکش تھے، بہت پیارا تھا ۔

وہ ایک ایسی خوبصورت وادی تھی جس میں کوئی نشیب و فراز نہ تھا، جسکی خاک کے سامنے آبِ خضر سراپا انکسار تھا ۔

اس وادی کے اندر پرانے زمانے کے باطل خدا تھے ۔ ان میں کوئی تو اہل مصر کا خدا تھا اور کوئی اہل یمن کا رب تھا ۔

کوئی عرب کے خداؤں میں سے تھا تو کوئی عراق والوں کا ۔ ایک وصل کا دیوتا تھا تو دوسرا فراق کا رب تھا ۔

یہ معبود اگر سورج کی نسل سے اور چاند کا داماد تھا تو وہ کوئی مشتری کی زوج پر نظر رکھے ہوئے یعنی مشتری کو چاہنے والا تھا ۔

وہ کوئی ایسا تھا جس کے ہاتھ میں دو دھاری تلوار تھی اور دوسرے کے گلے میں سانپ لپٹا ہوا تھا ۔

یہ سب اللہ پاک کے ذکر جمیل سے خوفزدہ تھے اور حضرت ابراہیم کی ضرب سے ملول تھے ۔

مردوخ نے کہا کہ آج کا انسان خدائے واحد سے بھاگ گیا (دور ہو گیا ہے) وہ کلیسا اور حرم سے نالہ و فریاد کرتے ہوئے دوڑ گیا ہے (مذہب سے بیگانہ ہو گیا ہے ) ۔

ذرا دیکھو کہ آج کا انسان اس خاطر کہ وہ اپنی سمجھ اور نظر میں اضافہ کرے ، گزرے ہوئے عہد کی طرف واپس آ رہا ہے ۔

آج وہ انسان پرانے آثار سے لذت حاصل کر رہا ہے ۔ وہ ہماری تجلیوں کی بات کر رہا ہے ۔

اس نے ایک اور افسانے کا باب کھولا اور خاکدان سے ہمارے لیے موافق ہوا آ رہی ہے ۔

یہ سن کر بعل دیوتا نے خوشی میں ایک گیت گایا او ر ان خدایان باطل پر ہمارے راز کھولے ۔