بخش 3 - نغمهٔ بعل

انسان نے اس نیلے آسمان کو پھاڑ ڈالا (یعنی وہ ستاروں تک پہنچ گیا ) لیکن آسمان کے اس پار (لامکاں میں ) خدا کو نہ دیکھا ۔

انسان کے دل میں افکار کے سوا اور کیا ہے موج کی طرح ایک فکر اس میں سر اٹھاتا اور دوسرا بھاگ جاتا ہے (آج کا انسان صرف عقل کا بندہ ہے ، سوز و عشق اس کے نزدیک بھی نہیں آیا) ۔

اس کی جان محسوس (حواس خمسہ) سے قرار پاتی ہے ۔ ممکن ہے کہ گزرا ہوا زمانہ دورِ بت پرستی پھر واپس آ جائے ۔ وہ روحانیت کے بجائے مادہ پرستی سے دل لگائے ہوئے ہے ۔

مشرق کا مزاج شناس افرنگی سلامت رہے ۔ اسی نے ہمیں قبر سے باہر نکالا ہے

اے پرانے خداوَ یہ وقت ہے فائدہ اٹھانے کا وقت، فائدہ اٹھاوَ ۔

دیکھو وہ توحید کا حلقہ ٹوٹ چکا ہے ۔ اولادِ ابراہیم الست (عشق الہٰی ) کے ذوق سے محروم ہے ۔ (خدا پر ایمان رکھنے والے مسلمان بھی روحوں کی اس ہاں کو بھول گئے ہیں ) ۔

وہ مسلمان جو کبھی جبرئیل کی شراب سے مست تھے ان کی محفل منتشر پراگندہ ہو چکی اور ان کا جام ٹکڑے ٹکڑے ہو چکا ہے ۔

آزاد مرد اب اطراف کی بندشوں میں گرفتار ہے وہ وطن سے وابستہ ہو کر خدا کو چھوڑ رہا ہے ۔

ان کا خون بت پرستوں کے دبدبہ سے سرد ہو چکا ہے ۔ اس میں کوئی شک نہیں کہ پیر حرم نے زنار باندھ لیا ہے وہ غیر اسلامی عقیدوں کا شیدائی بن گیا ہے ۔

اے پرانے خداوَ یہ وقت ہے فائدہ اٹھانے کا وقت، فائدہ اٹھاوَ ۔

دنیا میں پھر ہماری خوشی کا دور واپس آ گیا ہے ۔ دین (اسلام) ملک اور نسب سے شکست کھا گیا ہے ۔ (مذہب کی بجائے ان کا سارا زور فرقہ بندی اور حسب نسب وغیرہ پر ہے ) ۔

رسول اللہ کے چراغ سے اب ڈرنے کی کوئی ضرورت نہیں رہی ۔ اس لیے کہ اب سینکڑوں بولہب اسے بجھانے کے لیے پھونکیں مار رہے ہیں ۔

اگرچہ لا الہ ( توحید ایزدی ) کی آواز آ رہی ہے جب توحید دل سے نکل گئی ہو وہ بھلا ہونٹوں پر کب تک رہے گی ۔

مغرب کے جادو نے شیطان کو زندہ کر دیا ہے ۔ خدا کا دن رات کے خوف سے زرد رو ہو گیا ہے ۔

اے پرانے خداوَ یہ وقت ہے فائدہ اٹھانے کا وقت، فائدہ اٹھاوَ ۔

اس کی گردن کو دین کے پھندے سے رہائی دلانی چاہیے ۔ ہمارا بندہ تو آزاد بندہ تھا (جو چاہتا تھا وہ کر لیتا تھا لیکن اسلام نے اسے کئی پابندیوں میں جکڑا ہوا ہے ۔ )

چونکہ نماز مسلمان کے لیے ایک بوجھ بن چکی ہے اس لیے ہم اس سے صرف ایک رکعت چاہتے ہیں اور وہ بھی سجدے کے بغیر ہو ۔

انسانی جذبات تو نغمے سے بلند ہوتے ہیں ، اس نماز کا کیا لطف جس میں کوئی راگ نہ ہو ۔

وہ خدا جسے غیب میں رہنا ہی پسند ہے اس سے وہ دیوتا کہیں اچھا ہے جو سامنے نظر آئے ۔

اے پرانے خداوَ یہ وقت ہے فائدہ اٹھانے کا وقت، فائدہ اٹھاوَ ۔