بخش 4 - فرو رفتن به دریای زهره و دیدن ارواح فرعون و کشنر را

پیر روم نے جو صاحب ذکر جمیل ہیں اور ان کی ضرب میں حضرت ابراہیم خلیل اللہ کی ضرب کا سا دبدبہ ہے ۔

انھوں نے یہ غزل مستی کی حالت میں یا عالم مستی میں گائی جسے سن کر ہر پرانا خدا سجدے میں گر گیا ۔

گزشتہ اور آئندہ پر پھر سے نظر دوڑانی چاہیے ۔ ہاں اٹھ کہ ایسے سب امور کے بارے میں دوبارہ سوچنے کی ضرورت ہے ۔

عشق نے زمانے کی اونٹنی پر اپنا کجاوہ باندھ لیا ہے ۔ کیا تو عاشق ہے اگر تو واقعی عاشق ہے تو پھر تجھے چاہیے کہ تو صبح اور شام کو اپنی سواری بنائے ۔

ہمارے پیر نے کہا جہان کسی ایک روش پر مستقل طور پر قائم نہیں رہتا، اس کے اچھے اور برے سے چشم پوشی کرنی چاہیے ۔ اس کی پسند اور ناپسند کی پرواہ نہیں کرنی چاہیے ۔

اگر تو ترکِ دنیا کر کے اس (خدا) کا خواہش مند ہے تو پھر اس کے لیے تجھے پہلے اپنے سر سے گزر جانا چاہیے یعنی اپنے سر کی خیر منانا چاہیے ۔

میں نے اپنے پیر سے کہا کہ میرے دل میں بہت سے لات و منات جیسے بت بسے ہوئے ہیں ۔ اس پر اس نے کہا کہ اس بت کدے کو تباہ کر دینا چاہیے ۔

پھر وہ مجھ سے کہنے لگے کہ اے بیٹے اٹھ تاکہ ہم اپنا سفر جاری رکھیں ، تو اے بیٹے میرے دامن کے سوا کسی اور کا دامن نہ تھام ۔

(جب آگے بڑھے تو) ایک ایسا کوہستان نظر آیا جو کلیم (حضرت موسیٰ) کے بغیر تھا اور جو برف کی وجہ سے یوں لگ رہا تھا جیسے چاندی کا ڈھیر لگا ہو ۔

اس کے پیچھے ہیرے کے سے رنگ کا ایک سمندر تھا جس کا اندر اس کے باہر سے زیادہ ظاہر تھا ۔

نہ تو کسی موج کے باعث اور نہ سیلاب سے اس میں کوئی خلل واقع ہو رہا تھا ۔ اس کے مزاج میں لافانی سکون تھا ۔

یہ زور مست سرکشوں کا مقام ہے جو غائب کے منکر تھے اور صرف حاضر کے پرستار تھے ۔

ان میں ایک کا تعلق مشرق سے ہے یعنی فرعون اور دوسرے کا تعلق مغرب سے ہے یعنی لارڈ کچز ، یہ دونوں اپنی زندگی میں مردانِ حق سے برسرِ پیکار رہے ۔

ان میں سے ایک کی گردن پر حضرت موسیٰ کی لکڑی یعنی عصا نے ضرب لگائی (مراد فرعون) اور دوسرا جو ایک درویش کی تلوار سے دو ٹکڑے ہوا یعنی لارڈ کچز (درویش سے مراد مہدی سوڈانی ہے ) ۔

یہ دونوں فرعون تھے ۔ ایک بڑا ایک چھوٹا ۔ یہ دونوں دریا کی آغوش میں پیاسے مرے ۔

ہر کسی کو موت کی تلخی سے آشنا ہونا پڑتا ہے، ہر کسی کو ایک روز مرنا ہے ۔ لیکن جابر لوگوں کی موت خدا کی نشانیوں میں سے ہوتی ہے ۔

تو میرے پیچھے چلتا آ اور کسی سے خوف نہ کھا ۔ اپنا ہاتھ میرے ہاتھ میں دے اور کسی سے نہ ڈر ۔

میں موسیٰ کی طرح دریا کا سینہ چیر دوں گا اور تجھے دریا کی تہ تک لے جاؤں گا ۔

سمندر نے ہمارے لیے اپنا سینہ کھول دیا یا پھر وہ کوئی ہوا تھی جو پانی دکھائی دے رہی تھی ۔

اس سمندر کی گہرائی میں ایک رنگ و بو سے عاری وادی تھی ایسی وادی جس کی تاریکی تہ بہ تہ تھی (جس کے اندر تاریکی کے پردے پڑے ہوئے تھے) ۔

پیر رومی نے سورہَ طہٰ کی تلاوت کی اور سمندر کی تہ سے چاند ابھر آیا (چاندنی پھیل گئی) ۔

اس روشنی میں جو کچھ نظر آیا وہ دھلے ہوئے سبزہ سے خالی اور ٹھنڈے پہاڑ تھے، انکے اندر دو حیران اور پریشان آدمی پھر رہے تھے ۔

پہلے انھوں نے رومی کی طرف ایک نظر دیکھا پھر وہ آپس میں ایک دوسرے کی طرف دیکھنے لگے ۔

فرعون نے کہا یہ صبح یعنی صبح کی روشنی اور یہ نور کی ندی یہ صبح اور یہ نور و ظہور کہاں سے آیا ہے

جو کچھ بھی چھپا ہوا ہے وہ اس نور سے ظاہر ہو جاتا ہے ۔ اس نور کی بنیاد یدِ بیضا سے ہے ۔

افسوس میں نے عقل اور دین کی نقدی ہار دی ۔ میں نے اس نور کو دیکھا بھی لیکن میں اسے پہچان نہ سکا ۔

اے دنیا دارو میری طرف دیکھو اور اے نقصان اٹھانے والو میری طرف دیکھو (میرے عبرتناک انجام سے سبق حاصل کرو) ۔

افسوس اس قوم پر جو حرص و ہوس سے اندھی ہو گئی ہے ۔ وہ قبر کی مٹی سے بھی لعل و گہر لے جاتی ہے(انگریزوں نے فرعون کا مقبرہ کھو د کر اس سے زرد جواہر اور قیمتی اشیا غائب کر لی تھیں ) ۔

وہ مجسمے جو ان کے عجائب خانہ میں پڑے ہیں اس کے خاموش ہونٹوں پر ایک افسانہ ہے ۔

وہ بادشاہت کے انجام کی خبر دیتے ہیں ۔ وہ اندھوں کو آنکھیں عطا کرتے ہیں ۔

بادشاہت کی تقدیر کیا ہے وہ ہے پھوٹ ڈالنا اور نفاق کی تدبیر سے اپنی حکومت کا استحکام تلاش کرنا (انگریز نے یہی ابلیسی پالیسی اپنائی ہے ) ۔

ایسا برا طرز عمل سکھانے کے سبب ملک کی تقدیر بری ہو جاتی ہے اور ملک کی تقدیر زیادہ باطل اور انتشار کا شکار ہو جاتی ہے ۔ ملک تباہ و برباد ہو جاتا ہے اور رعایا پریشان ہو جاتی ہے ۔

اگر میں (فرعون) حضرت موسیٰ کو پھر دیکھ لوں تو میں ان سے ایک آگاہ دل کی خواہش کروں ۔

نورِ جاں کے بغیر حکمرانی خام ہے ، خام اور یدِ بیضا کے بغیر ملوکیت حرام ہے ۔

حاکمیت محکوموں (رعایا) کی کمزوری کے باعث قوت پکڑتی ہے ۔ اس کی جڑ محروموں کی محرومی سے قوی ہوتی ہے ۔

تاج (بادشاہت کا وجود) خراج لینے اور رعایا کے خراج دینے پر مبنی ہے ۔ اس سے پتھر جیسا قوی انسان بھی شیشے کی طرح نازک یا کمزور ہو جاتا ہے ۔

فوج ، قید خانہ اور زنجیریں سب رہزنی ہیں ۔ حقیقی حاکم وہی ہے جو ان اشیاء سے بے نیاز ہے ۔

انگریزوں کا مقصد بلند ہے ۔ انھوں نے لعل و گہر کی خاطر (فرعونوں کی) کوئی قبر نہیں کھودی ۔ (لارڈ کچز نے چونکہ خرطوم فتح کیا تھا اس لیے حکومت انگلستان نے اسے لارڈ آف خرطوم کا خطاب دیا تھا جسے عربی میں ذوالخرطوم کہا جاتا ہے ۔ )

مصر اور فرعون اور (حضرت موسیٰ ) کلیم کی سرگزشت آثار قدیمہ سے دیکھی جا سکتی ہے ۔

علم و حکمت تو صرف رازوں کے ظاہر کرنے کا نام ہے ۔ بغیر جستجو کے جو حکمت ہے وہ تو بس ذلیل و رسوا ہے ۔

ہماری قبر کو تو علم و حکمت نے کھولا تھا (یعنی آثار قدیمہ نے ہماری قبریں کھودیں تھیں ) لیکن مہدی سوڈانی کی قبر کے اندر کیا تھا (فرعون کی یہ بات ایک لحاظ سے خبیث کچز کے منہ پر تھپڑ ہے ) ۔