بخش 5 - نمودار شدن درویش سودانی

پانی کے اندر بجلی بے قراری کی حالت میں چمکی ، پانی کے اندر موجیں اٹھیں اور آپس میں ٹکرا کر پانی میں مل گئیں ۔

جنت کی طرف سے ایک خوشبو آئی اور اس مصری درویش کی روح ظاہر ہوئی ۔

اس کے سوز سے سیپی میں موتی پگھل کر رہ گیا ۔ کچز کے سینے میں پتھر پگھل گیا ۔ (اس کے سوز سے کچز کے سینے کے اندر جو پتھر کا دل تھا وہ بھی یوں پگھل گیا جیسے صدف کے اندر گوہر پگھل جائے) ۔

مہدی نے کہا اے کچز اگر تو نظر رکھتا (صاحبِ بصیرت) ہے تو ایک درویش کی خاک کا انتقام دیکھ (تو نے میری قبر کھود کر میری لاش کو رسوا کیا ) ۔

آسمان نے تیری لاش کو قبر بھی نہ دی ۔ تیری قبر شور سمندر ہی میں بنی (تو سمندر میں مرا اور تیری لاش کو زمین بھی نصیب نہ ہوئی ) ۔

پھر اس کی آواز گلے میں اٹک گئی اور اس کے ہونٹوں سے جگر کو پگھلا دینے والی ایک آہ نکلی ۔

وہ (مہدی) پھر بولا کہ اے روح عرب بیدار ہو اور اپنے بزرگوں کی طرح نئے نئے زمانے تخلیق کر ۔

اے فواد (مصر) اے فیصل (عراق) اور اے ابن سعود تم کب تک دھوئیں کی طرح خود میں بل کھاتے رہو گے ۔

اپنے سینے میں وہ سوز دوبارہ پیدا کرو جو کبھی پہلے تھا اب جا چکا ہے ۔ گیا ہوا زمانہ دنیا میں پھر واپس لاوَ ۔

اے سرزمین مکہ تو پھر کوئی خالد پیدا کر اورر ایک بار پھر توحید کا راگ گا ۔

تیرے صحرا کے کھجور کے درخت اور بلند ہوں ۔ کیا تیرے اندر سے کوئی اور یا دوسرا فاروق پیدا نہیں ہو سکتا

اے سیاہ فام مومنو ں کی دنیا (افریقہ) مجھے تجھ سے ہمیشہ قائم رہنے والی خوشبو آ رہی ہے ۔

تم (اہل مصر و سوڈان) کب تک جہد و عمل کے ذوق کے بغیر زندگی (بسر کرو گے) اور کب تک اپنی تقدیر غیروں کے ہاتھ میں دیے رہو گے ۔

تم کب تک اپنے مقام حاصل نہ کرو گے تمہارے ان حالات سے میری ہڈیاں سمندر میں بانسری کی طرح نالہ کناں ہیں ۔

کیا تم مصیبتوں سے ڈرتے ہو رسول اللہ ﷺ کی یہ حدیث مبارکہ نہیں سنی ہے کہ مرد کے لیے مصیبت کا دن روزِ صفا ہے ۔ (مومن کے لیے جہاد کا دن پاکی نفس کا دن ہوتا ہے ،وہ ہر گناہ سے پاک ہو جاتا ہے )

ساربان دوست تو مدینہ منورہ میں پہنچے ہوئے ہیں اور ہم نجد میں ہیں ۔ وہ حدی کہاں ہے جو ہماری اونٹنی کو وجد میں لائے ۔

بادل برسا اور زمین سے سبزہ اگ آیا ہے ہو سکتا ہے کہ اونٹنی کی رفتار سست ہو جائے ۔

درد جدائی سے میری جان فریاد کر رہی ہے تو (ساربان) وہ راستہ اختیار کر جہاں سبزہ کم ہو ۔

اونٹنی تو سبزے میں مست ہے جبکہ میں اپنے دوست کے خیال میں مست ہوں ۔ اونٹنی کی باگ ڈور تیرے ہاتھ میں ہے اور میری مہار محبوب کے ہاتھ میں ہے ۔

بارش کے پانی نے صحرا میں راستے بنا لیے ہیں ۔ اور پہاڑوں پر کھجور کے درختوں کے پتے دھل گئے ہیں ۔

دیکھو وہ سامنے ٹیلے کی چوٹی پر دو ہرن ایک دوسرے کے پیچھے ٹیلے کی چوٹی سے نیچے آ رہے ہیں ۔

ان ہرنوں نے کچھ دیر صحرا کے چشمے سے پانی پیا پھر راستہ چلنے والے مسافر کی طرف دیکھا ۔

نمی کی وجہ سے صحرا کی ریت ریشمی کپڑے کی طرح نرم ہو گئی ہے ۔ اس اونٹنی کے لیے راستہ دشوار نہیں رہا ۔

آسمان پر بادل تیتر کے پروں کی طرح رنگ رنگ کے بدلیوں کے حلقے بنائے ہوئے ہیں ۔ میں بارش سے ڈرتا ہوں کہ ہم ابھی منزل سے دور ہیں ۔

اے ساربان دوست تو مدینہ منورہ میں ہے اور ہم نجد میں ہیں ۔ وہ حدی کہاں ہے جو ہماری اونٹنی کو وجد میں لے آئے تاکہ ہم جلد مدینہ پہنچ کر محبوب کا دیدار کریں ۔