بخش 1 - در میان ماه و نور آفتاب

چاند اور سورج کی روشنی کے درمیان کئی تہ بتہ پردے ہیں ۔

ہمارے سامنے کارکنانِ قضا و قدر نے سینکڑوں پردے لٹکا دیے ہیں اور ان میں آتشیں جلوے لپیٹ دیے ہیں ۔ یعنی جلووَ ں کو پیچ در پیچ بنا دیا گیا ۔

تا کہ کم سوزی سے دل زیادہ سوز والا بن جائے اور یہ سوز شاخ اور پتوں اور پھل کے لیے سازگار ٹھہرے ۔

اسکی تپش سے لالہ کے پھول کی رگوں میں خون ہے ندی اسکے رقص گردش سے پارے کی مانند بیقرار رہتی ہے ۔

اسی طرح جان پاک بھی مٹی سے پیدا ہوتی ہے اور جانِ پاک لا مکاں کی طرف دوڑتی ہے ۔

جان پاک کی راہ میں موت، دوبارہ زندہ ہونا اور حشر و موت تب و تاب کے سوائے اور کوئی سامان نہیں رکھتے۔

ترجمہ: میاں عبدالرشید

وہ (جان پاک) سینکڑوں نیلے آسمانوں کی فضا میں پیہم غوطے لگا کر باہر آتی رہتی ہے ۔

یہ (جانِ پاک) آپ ہی اپنا کعبہ اور آپ ہی اپنا ابراہیم ہے اور ذبیح اللہ (حضرت اسماعیل) کی طرح خود ہی اپنے سامنے سر تسلیم خم کرتی ہے ۔

اس کے سامنے یہ نو آسمان نو خیبر ہیں ۔ اس کا وار حیدر کے مقام سے ہے ۔

یہ ہر لمحہ کی جنگ اسے پاک کر دیتی ہے اور اسے مضبوط متحرک اور مستعد بناتی ہے ۔

وہ نور کی وسعتوں میں پرواز کرتی ہے ۔ اس کا پنجہ جبرئیل اور حور کو اپنی گرفت میں لینے والا بن جاتا ہے ۔

یہاں تک کہ وہ مازاغ البصر سے حصہ پا لیتی ہے اور عبدہ کے مقام کی نگران بن جاتی ہے ۔

میں نہیں جانتا کہ میرا مقام کہاں ہے ۔ اتنا جانتا ہوں کہ وہ دوستوں سے جدا ہے ۔

میرے اندر فوج اور لشکر کے بغیر جنگ جاری رہتی ہے ۔ اسے وہی دیکھ سکتا ہے جو میری طرح صاحب نگاہ ہو ۔

لوگ کفر اور دین کے درمیان اس جنگ سے بے خبر ہیں ۔ میری جان زین العابدین کی طرح تنہا ہے ۔

(اس دور میں ) منزل اور راستے سے کوئی بھی شخص آگاہ نہیں ۔ میری شاعری کے سوا راستے کا اور کوئی چراغ نہیں ہے ۔

جوان اور بوڑھے غفلت کے سمندر میں غرق ہیں ، صرف ایک مردِ فقیر (اقبال) جان بچا کر ساحل تک پہنچا ہے ۔ یعنی پوری قوم بری طرح غفلت کا شکار ہے ۔

میں (اقبال) نے اس حریم کے غفلت کے مکان کے پردے ہٹا دیے ہیں ۔ میں وصل سے ڈرتا ہوں جبکہ ہجر میں آہ و زاری کرتا ہوں ۔

اگر وصل سے شوق ختم ہو جائے تو خدا اس سے بچائے ۔ (اس سے بچو) وہ آ ہ و فغاں مبارک (بہتر) ہے جس کا کوئی اثر نہیں ہے ۔

راستہ چلنے والے کی جان کو اگر فراغت راس آ جائے تو وہ پھر راستے کا سراغ ہی نہیں لگاتا ۔

میں وہ دل رکھتا ہوں یا میرے سینے میں ایک ایسا دل ہے جو ذوقِ نظر کے سبب ہر پل ایک نئی دنیا کی آرزو میں رہتا ہے ۔

رومی نے جو میری جان کی کیفیات سے باخبر ہے کہا کیا تم کوئی اور جہان چاہتے ہو تو یہ لو ۔

عشق شطرنج کا کھلاڑی ہے اور ہم اس کے ہاتھ میں شطرنج کی گوٹ ہیں ۔ سامنے دیکھ اب ہم زہرہ کی حدود میں ہیں ۔

یہ ایسا جہان ہے جس کا خمیر پانی اور مٹی سے ہے ۔ کعبہ کی طرح یہ سیاہ رنگ کے غلاف میں ہے یعنی اس کی فضا تاریک ہے ۔

پردے کو جلا دینے والی اور پردہ ہٹا دینے والی نگاہ سے اس کی بادلوں اور دھند میں سے گزر جا ۔

وہاں تو پرانے خدایان باطل پائے گا ۔ میں ان میں سے ایک ایک کو خوب پہچانتا ہوں ۔

یہ پرانے خدا (یا بت ) ان ناموں سے مشہور تھے، بعل ، مردوخ، یعوق، نسر، فسر، رم، خن، لات، منات عسر اور غسر

یہ پرانے خدا اپنے زندہ ہونے پر آج کے دور کے مزاج کی دلیل لاتے ہیں جو ابراہیم جیسے بت شکن سے خالی ہے ۔ مطلب حضرت موسیٰ کلیم اللہ کی طرح تو دریائے نیل سے گزر جا اور خلیل کی طرح آگ کی طرف قدم بڑھا ۔