بخش 7 - طاسین گوتم: توبه آوردن زن رقاصهٔ عشوه فروش

پرانی شراب اور جوان معشوق کی کوئی اہمیت نہیں ہے اور اہل نظر کے نزدیک جنت کی حور بھی کوئی چیز نہیں ہے ۔

ہر وہ شے جسے تو مضبوط اور ہمیشہ رہنے والی سمجھتا ہے وہ گزر جانے والی ہے اسے فنا ہے ۔ یہ پہاڑ اور صحرا اور خشکی اور سمندر اور ساحل سب کی کوئی اہمیت نہیں ہے (ہر شے فانی ہے) ۔

اہل مغرب، یورپ کی دانش اور اہل مشرق کا فلسفہ ، یہ سب بت کدے ہیں اور بتوں کے طواف سے کچھ حاصل نہیں ہے ۔

تو اپنے آپ پر غور کر اور اس بیابان سے خوف زدہ ہوتے ہوئے نہ گزر، اس لیے کہ صرف تو باقی رہنے والا ہے اور دونوں جہانوں کا وجود کوئی چیز نہیں ہے ۔

وہ راہ جسے میں نے اپنی پلکوں کی نوک سے تراشا ہے اس میں منزل اور قافلہ اور اڑتی ہوئی ریت کوئی چیز نہیں ہے ۔

تو غیب سے گزر جا، اس لیے کہ یہ سب وہم و گمان ہے اور وہم و گمان کوئی چیز نہیں ہے ، جہان میں بستے ہوئے اس سے آزاد رہنا ضرور قابل قدر شے ہے ۔

وہ بہشت جو خدا نے تجھے عطا کی ہے وہ سب ہیچ ہے ۔ ہاں اگر وہ جنت تیرے عملوں کے باعث، جزا کی صورت میں تجھے ملی ہے تو وہ ضرور کوئی چیز ہے ۔

کیا تجھے آرام جاں کی خواہش ہے یاد رکھ کہ آرامِ جاں کوئی چیز نہیں ہے ۔ ہاں اپنے ساتھیوں کے غم میں شریک ہو کر آنسو بہانا ایک قابل قدر بات ہے ۔

نشیلی آنکھ اور غلط انداز اور گانا بجانا، سب اچھی باتیں ہیں لیکن ان سے بھی اچھی کوئی چیز ہے ۔

رخسار کا حسن کتنا ہی دلکش کیوں نہ ہو وہ ایک لمحہ ہے اور دوسرے لمحہ نہیں ۔ البتہ کردار و عمل اور خیالات کا حسن ضرور اہمیت رکھتے ہیں ۔

(رقاصہ کہتی ہے ) تو اس بیقرار دل کو کشمکش کا موقع یا اجازت نہ دے ۔ تو اپنے پیچدار گیسووَں میں ایک دو بل اور ڈال دے ۔

تیری وجہ سے میرے سینے میں وہ برق تجلی ہے کہ میں نے چاند اور سورج کو بھی انتظار کی تلخی سے دوچار کر دیا ہے ۔

ذوقِ دید نے دنیا میں بت گری کی رسم کی بنیاد رکھی، امیدوار جان کو عشق فریب دیتا ہے ۔

اس خاطر کہ میں دل جمعی سے کوئی نیا نغمہ چھیڑوں تو پھر سے سبزہ زار کے پرندے کو سبزہ زار کی طرف بھیج دے ۔

تو نے مجھے اگر بلند طبع سے نوازا ہے تو پھر میرے پاؤں سے زنجیر کھول دے تاکہ میں تیرے عطا کیے ہوئے بوریائی لباس کے عوض بادشاہ کی خلعت دے دوں ۔

اگر فرہاد نے پتھر پر تیشہ چلایا تو یہ کونسا مقامِ گفتگو ہے ۔ (قابل ذکر بات ہے ) کہ عشق تو اس سارے پہاڑی سلسلے کو کندھوں پر اٹھا لیتا ہے ۔