بخش 8 - طاسین زرتشت: آزمایش کردن اهریمن زرتشت را

(اہرمن کہتا ہے کہ اے زرتشت) تیری وجہ سے میری مخلوق بانسری کی طرح نالہ و زاری کر رہی ہے ۔ تیری وجہ سے ہمارے لیے موسم بہار، موسم خزاں کی مانند ہو گیا ہے ۔

تو نے مجھے دنیا میں ذلیل و خوار کر دیا ہے تو نے اپنا نقش میرے خون سے رنگین کیا ہے ۔

تیرے جلوہ سینا کی وجہ سے حق زندہ ہے اور میری موت تیرے ید بیضا کے اندر ہے ۔

یزداں کے وعدے پر اعتبار کرنا یا بھروسا کرنا نادانی یا حماقت ہے ۔ اس یزداں کی آرزو کے مطابق زندگی کی راہ پر چلنا گمراہی ہے ۔

اس (یزداں ) کی گلابی رنگ کی شراب میں زہر ملے ہوئے ہیں ۔ اور وہ کٹہرا اور صلیب اس کے انعام ہیں ۔

حضرت نوح کے پاس دعا کے سوا کوئی اور چارہ نہ تھا ۔ اس بیچارے کی باتوں میں کوئی اثر نہ تھا (آخر بدعا سے اپنی قوم کو غرق کروا دیا) ۔

تو (اے زرتشت) آبادی چھوڑ دے اور کسی غار میں جا بیٹھ اور فرشتوں کے گروہ کے ساتھ صحبت اختیار کر ۔

تو اپنی ایک نگاہ سے خاک کو سونا بنا دے اور اپنی مناجات سے آسمانوں کو جلا دے ۔

تو بھی (حضرت موسیٰ) کلیم اللہ کی طرح پہاڑوں میں آوارہ چل پھر اور نظارے جلوہ ایزدی کی آگ سے خود کو نیم سوز کر لے ۔

پیغمبری سے ہاتھ اٹھا لے اس قسم کی ملا گیری چھوڑ دینی چاہیے ۔

ایک صلاحیتوں والا انسان گھٹیا لوگوں کے ساتھ رہ کر گھٹیا اور نا اہل بن جاتا ہے ۔ اس کی صلاحتیں ختم ہو جاتی ہیں اس کی فطرت اگر شعلہ بھی ہو تو خس و خاشاک بن جاتی ہے ۔

چونکہ نبوت، ولایت سے کم تر ہے اس لیے عشق کے مطابق پیغمبری دردِ سر ہے ۔

اے زرتشت تو اٹھ اور وحدت کے گھر میں جا بیٹھ، جلوت کو ترک کر اور خلوت نشین ہو جا ۔

نور ایک ایسا سمندر ہے جس کا ساحل تاریکی ہے ۔ اس کے سمندر کے اندر مجھ جیسا سیلاب ، طوفان پیدا نہیں ہوا ۔

میرے اندر بے قرار موجیں ہیں ۔ بھلا سیلاب کا ساحل کو غارت کرنے کے سوا اور کیا کام ہے

وہ بے رنگ نقش، جسے کسی نے نہیں دیکھا ، اہرمن کے خون کے سوا اور کسی چیز سے کھینچا نہیں جا سکتا ۔

اپنے آپ کو آشکارا کرنا ہی زندگی ہے ۔ اپنی ضرورت سے آزمانا ہی زندگی ہے ۔

مصائب کی آزمائش میں پڑ کر خودی زیادہ مضبوط ہوتی ہے ۔ یہاں تک کہ خودی خدا کا پردہ اٹھانے والی بن جاتی ہے ۔

حق کو دیکھنے والے آدمی نے حق کے سوا خود کو نہیں دیکھا ۔ وہ لا الہ کہتا اور خون میں تڑپتا ہے(وہ خود میں خدائی صفات پیدا کرتا ہے ) اور اس کے سوا کسی اور کو معبود تسلیم نہیں کرتا ۔

عشق کی آبرو خون میں تڑپنے سے ہے ۔ آرہ اور لکڑی اور رسی (پھانسی اور پھانسی کی رسی) اس کے لیے عیدیں ہیں ۔

حق کی راہ میں جو کچھ بھی پیش آئے وہ خوب ہے ۔ دوست (محبوب حقیقی) کی نامہربانیاں بھی مبارک ہیں ۔

میری آنکھ نے حق کا جلوہ اکیلے دیکھنا پسند نہ کیا، اس لیے کہ حسن کو انجمن کے بغیر دیکھنا غلطی ہے ۔

خلوت کیا ہےدرد و سوز اور آرزو کا نام ہے ۔ انجمن دیدار کا نام ہے جبکہ خلوت جستجو کی صورت ہے ۔

عشق خلوت میں ہو تو کلیم اللہ ہے اور جب وہ جلوت میں آتا ہے تو وہ شاہی پر فائز ہو جاتا ہے ۔

خلوت اور جلوت دونوں سوز و ساز کا کمال ہیں دونوں انکسار کے حالات و مقامات ہیں ۔

وہ خلوت کیا ہے وہ مندر اور آتش کدہ سے دور ہو جانا ہے ۔ یہ جلوت کیا ہے ، یہ بہشت میں اکیلے نہ جانے کی حالت ہے ۔

اگرچہ خلوت اور جلوت دونوں کے اندر خدا ہی ہے تاہم خلوت میں اس وصال کا آغاز اور جلوت انتہا ہے ۔

تو نے کہا ہے کہ پیغمبری دردِ سر ہے ۔ لیکن تجھے یہ معلوم نہیں کہ عشق جب کامل ہو جاتا ہے تو آدم گر بن جاتا ہے ۔

حق کی راہ میں قافلے کے ساتھ چلنا اچھی بات ہے ۔ جان کی طرح جہان کے اندر چلنا اور اچھی بات ہے ۔