غزل شمارهٔ 19

اے سوئے ہوئے نوخیز پھول، نرگس کی طرح آنکھیں کھولتے ہوئے اٹھ (جاگ) کیونکہ ہمارا گھر غموں (بے عملی) نے تباہ کر کے رکھ دیا ہے ۔

(اپنی آنکھیں کھول) چاہے چمن کے پرندے کی فریاد سے یا اذان کی آواز سے جاگ ۔ اور چاہے آگ جیسی گرم سانسیں رکھنے والوں کی گرمی کے شور سے جاگ ۔ کچھ نہ کچھ عمل کرنے کے لیے اپنی آنکھیں کھول ۔ غفلت کی گہری نیند سے جاگ، گہری نیند، گہری نیند سے جاگ، گہری نیند سے جاگ ۔

سورج نے طلوع ہو کر اپنے ماتھے کو صبح کے زیور سے سجا لیا ہے ۔ اور اس نے صبح کے کانوں میں اپنے خونِ جگر کا بند لٹکا دیا ہے (صبح ہو گئی ہے) ۔

بیابان اور پہاڑوں سے کاروانوں نے سامان سفر باندھ لیا ہے (سفر کے لیے تیار ہیں ) دنیا کو دیکھنے والی اے آنکھ تو بھی دنیا کے تماشے کے لیے اٹھ (سرگرم عمل ہو جا) ۔ غفلت کی گہری نیند سے جاگ، گہری نیند، گہری نیند سے جاگ، گہری نیند سے جاگ ۔

اہل مشرق سب کے سب راہ غبار (گرد) کی مانند ہیں ۔ پسماندہ ہیں وہ ایک خاموش فریاد اور بے اثر آہ کی مانند ہیں ۔

اس اہل مشرق کی مٹی کا ہر ذرہ ایسی آنکھ کی طرح ہے جس پر گرہ باندھ دی گئی ہو(اور اہل مغرب کی مکاری سمجھنے سے قاصر ہے) ۔ اہل مشرق ہندوستان، سمرقند، عراق اور ہمدان جہاں بھی ہیں اپنے حقوق اور اپنی روایات کی حفاظت کے لیے اٹھ کھڑے ہوں ۔ غفلت کی گہری نیند سے جاگ، گہری نیند، گہری نیند سدے جاگ، گہری نیند سے جاگ ۔

اے مشرق کے باسی تیری زندگی کا دریا وہ دریا ہے جس میں صحراؤں کی خاموشی اور سکون پایا جاتا ہے (تجھ میں عمل کی کوئی تحریک نہیں ) تیرا دریا، وہ دریا ہے جس کے پانیوں میں اضافہ تو نہیں ہوا، کمی ضرور ہوئی ہے ۔

تیرا دریا، طوفان، تلاطم اور خطرناک مگر مچھوں سے بے خبر ہے (تیری زندگی عمل کے طوفان سے خالی ہو چکی ہے)اس کے باوجود دریا کے پھٹے ہوئے سینے میں بہتی ہوئی لہر کی مانند اٹھ (متحرک ہو جا) گہری نیند، گہری نیند ، گہری نیند سے جاگ، گہری نیند سے جاگ ۔ (اے گہری نیند کے مزے لوٹنے والے آنکھیں کھول عمل کا وقت آ پہنچا) ۔

یہ باریک بات پوشیدہ رازوں کو کھولنے والی ہے کہ ملک اگر مٹی کا جسم ہے تو دین اس کی روح رواں ہے (دین اس کی رہنمائی کرتا ہے اور اسے زندہ رکھتا ہے) ۔

اگر جسم زندہ ہے اور روح بھی زندہ ہے تو پھر جسم اور روح میں تعلق قائم رہتا ہے جس طرح جسم کے بغیر روح اور روح کے بغیر جسم بے کار ہے ملک اور دین کا معاملہ بھی یہی ہے ۔ اس لیے دین کے نفاذ کے لیے خرقہ ، سجادہ اور شمشیر و سناں کے ساتھ کوشش کرنا ہو گی ۔ دینی اور روحانی ترقی کے لیے جہاں سادگی و فقر درکار ہیں وہاں کبھی کبھی تلوار کی بھی ضرورت ہوتی ہے ۔ اس لیے گہری نیند ، گہری نیند، گہری نیند سے جاگ، گہری نیند سے جاگ، گہری نیند سے جاگ ۔

اے مسلمان تو قانونِ فطرت کا امانتدار ہے تیرے پاس اللہ کی امانت (اس کا قانون ازل قرآن کی صورت میں موجود ہے) تو اس قانون فطرت کا دایاں بازو ہے ۔

تو اپنے اس امانت داری کے منصب کو بھول کر محض ایک خاکی جسم رہ گیا ہے ۔ اور زمان و مکان کی قید میں پھنس گیا ہے (اگر و اس قید سے رہائی حاصل کرنا چاہتا ہے تو یقین کی شراب پی لے اور وہم کے مندر کو خیر باد کہہ دے ۔ زندگی کی حقیقت تیرے ہاتھ آ جائے گی ۔ گہری نیند، گہری نیند، گہری نیند سے جاگ، گہری نیند سے جاگ

یورپ سے اور اس کی دل لبھانے والی رنگین فضاؤں سے خدا بچائے ۔ یورپ کے شیریں (فرہاد کی محبوبہ) کے حسنِ جہاں سوز اور پرویز کی طرح کی مکارانہ چالوں سے بھی خدا محفوظ رکھے ۔ (اہل یورپ اپنی مکارانہ تہذیب و ثقافت اور دین فروش علوم و فنون کے ذریعے اہلِ اسلام کو اپنی ظاہری چمک میں پھنسا چکے ہیں ) ۔

ساراجہاں فرنگیوں کی (فکری و سیاسی بورش) کی وجہ سے ویرانہ بن چکا ہے ۔ (چنگیز خان نے تو قتل عام کیا تھا اور شہر برباد کیے تھے) یورپ نے تو قلب و روح کی دنیا کو ویران کر دیا ہے ۔ ان کی تباہی و بربادی چنگیز خان کی بربریت سے کہیں بڑھ کر ہے (اے مسلمان) تو معمار حرم ہے اس لیے اب تیرے عمل کا وقت ہے ۔ تو اس جہان خراب کی از سر نو تعمیر کے لیے آگے بڑھ کیونکہ تیرے سوا جسم و روح کی تعمیر کوئی نہیں کر سکتا ۔ اس لیے گہری نیند، گہری نیند، گہری نیند سے جاگ، گہری نیند سے جاگ ۔