غزل شمارهٔ 18

(اے مسلمان) تو صبح کی تازہ و نرم و لطیف ہوا کی طرح اٹھ اور چلنا سیکھ لے ۔ گلاب و لالہ کے پھولوں کو پھر کھلانا شروع کر دے (اپنے آپ کو بیدار کر اور دوسروں کو بھی بیداری کا پیغام دے) ۔ اپنے دل کے غنچے میں پھر سے زندگی کی خلش پیدا کرنا سیکھ لے ۔

تو نے موٹا لباس زیب تن کیا تا کہ تو صوفی کہلائے اور بے ذوق ہی تڑپتا رہا اورر اس طرح تڑپتا رہا کہ کوئی مقام بھی حاصل نہ کر سکا (کیونکہ تیری تڑپ میں بناوٹ تھی) اہل عشق کی محفل میں نئے انداز سے تڑپنا سیکھ ۔

خدا کی معرفت سے نا آشنا اے انسان! تو اپنے دل کو دوبارہ اس (محبوب حقیقی) سے لگا لے ۔ اپنے آپ کا جائزہ لے کر اس کی معرفت حاصل کر اور غیروں کی طرف سے آنکھیں بند کر لے ۔ نئے انداز سے دیکھنے اور نہ دیکھنے کے طریقے سیکھ ۔

سانس کیا ہے (محبوب کا ) پیام ہے ۔ چاہے تو اسے سنا یا نہ سنااصل میں تیرے جسم میں (جلوہَ محبوب) تو عام ہے ۔ (اب یہ تیری نظروں کا کمال ہے) تو نے دیکھا یا نہ دیکھا (محبوب کے جلوے تو ہر سانس کے ساتھ تیرے جسم خاکی میں موجود ہیں ۔ انہیں دیکھنے کے لیے چشم بینا کی ضرورت ہے) ۔ اس لیے پھر سے دیکھنا اور پھر سے سننا سیکھ ۔

ہم (بے ہمت لوگ) عقاب کی آنکھ اور شبہاز کا دل نہیں رکھتے ۔ گھر کے (قیدی) پرندے کی طرح ہم لذت پرواز سے بھی محروم ہیں ( بے عمل ہو گئے ہیں ) ۔

دارا اور جمشید کے تخت راہ چلتے یونہی فروخت نہیں ہوتے (تخت حکومت تگ و دو کے بغیر حاصل نہیں ہوتے) یہ بھاری پہاڑ ہیں جو تنکوں کے عوض نہیں بیچتے (ان کے حصول میں جان کی بازی لگانا پڑتی ہے) اپنے خون دل سے پھر سے خریدنے کا فن سیکھ ۔

رونے سے کچھ حاصل نہیں ہوتا ۔ اس سے تقدیر نہیں بدلتی ۔ تیری زنجیر کا حلقہ جس نے تجھے تقدیر کے قفس میں قید کر رکھا ہے وہی ہے جو پہلے سے موجود ہے ۔ اس لیے نا امید ہونے کی ضرورت نہیں ۔ نئے انداز سے نالہ و شیون کے انداز سیکھ لے ۔

کیا تو جل کر راکھ ہو گیا ہے(بے عمل ہو گیا ہے)اگر ایسا ہے تو اپنے اس جلے ہوئے جگر سے ایک چنگاری لے ۔ اس چنگاری کو اپنے گرد لپیٹ کر پھیلا دے اور سرکنڈے کے سارے جنگل میں آگ لگا دے ۔ شعلہ کی طرح خشک گھاس پھونس میں دوڑنا پھر سے سیکھ ۔ (اب بھی تجھ میں عمل کی چنگاری موجود ہے ۔ اسے بروئے کار لا کر منزل مقصود حاصل کر لے) ۔