بندگی نامه

دنیا کو اپنی روشنی سے منور کرنے والے چاند نے خدا سے کہا میری روشنی رات کو دن کی مانند روشن کر دیتی ہے ۔

مجھے وہ دن یاد ہیں جب دن اور رات کی تمیز کے بغیر میں زمانے کے ضمیر میں سویا ہوا تھا ۔

میری حدود میں دور دور تک کوئی ستارہ روشن نہیں تھا ۔ میری فطرت میں کوئی گردش نہیں تھی ۔

نہ میرے نور سے بیابان اور وادیاں آئینہ پوش تھیں نہ میرے حسن کے جلووَں سے دریا میں مدوجزر کی کیفیت پیدا ہو رہی تھی ۔

یہ سوچ کر دل سے آہ نکلتی ہے اور اس وجود کی فریب اور فسوں پر افسوس ہوتا ہے ۔ اس چاندنی کے ہونے پر افسوس ہے ۔ مجھے وجود دیا گیا حالانکہ میں بھی ملک عدم میں کہیں آرام کر رہا ہوتا ۔

وجود میں آنے کے بعد میں نے سورج سے آب و تاب سیکھی اور خود میں نور پیدا کیا ۔ اور پھر اس نور سے مردہ مٹی کے گھر دنیا کو روشن کیا ۔

یہ مادی جہان علم و دانش کے باعث روشن تو ہے لیکن اس میں راحت و سکون کسی کے مقد ر میں نہیں کیونکہ اس کا چہرہ روشن ہونے کے باوجود غلامی سے داغدار ہے ۔

اس جہان کے لوگ مچھلی کی صورت میں کانٹے لگائے بیٹھے ہیں ۔ مکر و فریب سے ایک دوسرے کو لوٹ رہے ہیں ۔ یہاں کا آدم یزداں یعنی خدا کو مارنے اور آدم کی پوجا کرنے والا ہے ۔

چاند اپنی گفتگو جاری رکھتے ہوئے کہتا ہے کہ میں اپنے وجود سے پہلے اس مادی جہان اور لوگوں کے بارے میں بے خبر تھا ۔ اے خدا جب تو نے مجھے وجود دیا اور میں ا س جہان کے گرد گردش کرنے لگا مجھے اس طواف نے شرمندہ کر دیا ۔ کیونکہ مجھے یہاں انسانوں کے کارنامے دیکھ کر شرم محسوس ہو رہی تھی ۔

یہ جہان جان کے نور سے آشنا نہیں ہے ۔ یہاں کے لوگوں کو اپنی مادہ پرست روح کو روشن کرنے کے لیے خیال تک نہیں آتا اس لیے یہ جہان چاند اور سورج کے لائق نہیں ۔

یا پھر اے خدا اس جہان کو نیلی فضا میں چھوڑ دے اور کوئی نیا جہان بنا جو ہمارے نور کے قابل ہو یا پھر ہم سے قطع تعلق کر لے ۔

یا تو مجھے اس کی خدمت سے رہائی دے یا اس کی مٹی سے کوئی نیا آدم پیدا کر جو اپنے مقصدِ حیات کو پہچانتا ہو ۔

میری آنکھیں نیل آلودہ اندھی اور نابینا ہی اچھی ہیں یعنی اس جہان کو روشنی دینے والی قوت مجھ سے واپس لے لے ۔ اے خدا یہ خاکدان بے نور ہی بہتر ہے ۔

غلامی کے دور میں بدن میں دل مردہ ہوجاتا ہے ۔ اور غلامی سے روح بدن کا بوجھ بن جاتی ہے ۔

غلامی سے جوانی کے عالم میں ہی بڑھاپا طاری ہو جاتا ہے اور غلامی سے جنگل کا آزاد شیر وہ شیر بن جاتا ہے جس کے دانت گر جائیں ۔ غلامی میں بڑے بڑے بہادر بزدل بن جاتے ہیں ۔

غلامی سے مجلس کی وحدت ٹکڑے ٹکڑے ہو جاتی ہے یہ اس سے اور وہ اور سے جھگڑنے لگتا ہے ۔ لوگ آپس میں ایک دوسرے کے دشمن بن جاتے ہیں ۔ ملت کئی گروہوں میں بٹ جاتی ہے ۔

ملت بکھر جاتی ہے ۔ ایک سجدے میں ہوتا ہے اور دوسرا قیام میں ہوتا ہے ۔ ہر ایک کی اپنی اپنی رائے ہوتی ہے ایسی ملت کے لوگوں کا کاروبار بے امام نماز کی طرح ہوتا ہے ۔

ہر فرد دوسرے فرد کے ساتھ تو تو میں میں کر رہا ہوتا ہے اور ہر وقت ہر فرد کسی نہ کسی نئے درد کا شکار ہو جاتا ہے ۔

غلامی کی وجہ سے مردِ حق زنار پوش کافر ہو جاتا ہے ۔ غلامی سے اس کا موتی بے چمک، بے برکت اور بے قیمت ہو جاتا ہے ۔

اس غلام کی زندگی کی شاخ موسمِ خزاں کے بغیر ہی پتوں سے خالی ہو جاتی ہے اور اس کی جان میں سوائے موت کے خوف کے اور کچھ باقی نہیں رہتا ۔

غلام میں لذت کی حس ختم ہو جاتی ہے اس لیے زہر کو شربت سمجھ کر پی جاتا ہے اور وہ ایک بے موت مردہ ہوتا اور اپنی نعش کندھوں پر اٹھائے پھرتا ہے ۔

وہ زندگی کی عزت لٹا چکا ہوتا ہے وہ گدھوں کی طرح تنکے اور جو کھاتا پھرتا ہے ۔ غلامی میں اس کی پسند یا ناپسند کو عمل دخل نہیں ہوتا ۔

ایسے غلام شخص کی زندگی کے آسان اور مشکل مرحلوں پر غور کر ۔ اور اس کی زندگی کے ماہ و سال جس طرح گزرے ہیں یا گزر رہے ہیں انہیں دیکھ تمہیں یقین ہو جائے گا کہ غلام کی زندگی کتنی تلخ ہوتی ہے ۔

اس غلام کے دن ایک دوسرے کا ماتم کر رہے ہیں اور رفتار میں گھڑی کی ریت کی طرح ہیں ۔ ریت کی گھڑی کی طرح سست رفتار ہیں ۔

ایک بنجر زمین جو بچھووَں کے ڈنک سے کانٹوں میں بدل گئی ہو اس میں جو چونٹیاں ہوں وہ ازدھے کو کاٹتی ہوں اور بچھووَں کی شکاری ہوں ۔

اس کی گرم اور تیز ہوا چاہے دوزخ کی آگ کی نسل سے ہو ۔ اس کی ابلیسی کشتی پار لگانے کے لیے موافق ہوائیں چلتی ہوں ۔

چاہے اس میں ایسی ہوا ہو جس میں آگ لپٹی ہوئی ہو اور اس آگ میں چاہے شعلہ کے اندر شعلہ بھرا ہوا ہو ۔

ایسی آگ جس کو بل کھاتے ہوئے دھوئیں کی تلخی نے ڈھانپا ہوا ہو ۔ ایسی آگ جو بجلی یا بادل کی کڑک والی یا دریا کے طوفان کے شور والی ہو ۔

ایسی آگ جس کے پہلو میں سانپ آپس میں لڑ رہے ہوں ۔ ایسے سانپ جن کے پھن زہر ٹپکاتے ہوں ۔

اس کا شعلہ کٹ کھنے کتے کی طرح لپکتا ہو وہ ڈرانے والا، دہکتی حرارت والا اور مردہ روشنی والا ہے ۔

بلاؤں کے ایسے بیابان میں سو سال بسر کرنا غلامی کے ایک دم سے زیادہ بہتر شمار کرنا ۔