غزل شمارهٔ 29

(اے ربِ کائنات) ایک خوش الحان پرندہ ہو یا شکار کرنے والا ایک باز ۔ دونوں تیری ہی قدرت کے شاہکار ہیں ۔ اس زندگی میں نو ر اور نار کے جو راستے نظر آتے ہیں وہ بھی تیری ہی تخلیق ہیں (ہر چیز میں تیرے ہی جلوے نمایاں ہیں ) ۔

اس مٹھی بھر خاک میں جو روشن دل ہے وہ تیری قدرت کے نظارے کر رہا ہے ۔ یہ اس چاند کی مانند ہے جو رات کی ڈولی میں سفر کرتا ہے ۔ یعنی میرا یہ دل اگرچہ ایک تاریک بدن میں قید ہے پھر بھی یہ سارے جہان کی سیر کر رہا ہے ۔

میرے سارے افکار خواہ وہ دل میں ہیں یا میری زبان پر تیری ہی وجہ سے ہیں ۔ اب اگر تو اس سمندر سے موتی نکالے یا نہ نکالے یہ تیری مرضی پر منحصر ہے ۔

میں تو وہی مشتِ غبار ہوں جو کسی جگہ بھی نہیں پہنچتی ۔ میری حیثیت کچھ بھی نہیں ۔ یہ گل لالہ اور بہار کے بادلوں میں نمی تیری ہی وجہ سے ہے ۔

تو ہی تو اس جہان کا اصل مصور ہے ۔ ہم تو محض قلم کار ہیں اس قلم میں نقش و نگار پیدا کرنے والا تو خالق کائنات ہے جو کچھ میرے سامنے ہو رہا ہے اور جو کچھ مستقبل میں ہوگا سب کا سب تو ہی ہے ۔

مجھے اس جہان اور اہل جہان سے بہت سی شکایتیں ہیں ۔ لیکن میں انہیں زبان پر نہیں لاتا ۔ کیونکہ میں اس بات سے باخبر ہو چکا ہوں کہ محبت عداوت، مکاری اور دوستی سب کچھ تیری وجہ سے ہے ۔ اس لیے شکوہ و شکایت فضول ہے ۔