غزل شمارهٔ 36

یہ جہان اندھا ہے اور دل کے آئینے کی صفائی سے غفلت میں پڑا ہوا ہے (اس دل کے آئینے میں نہ صرف خارجی جہاں کا عکس موجود ہے بلکہ معرفت حق بھی جلوہ گر ہو سکتی ہے) لیکن جہان کی توجہ تو خارجی اسباب پر ہے اور جو آنکھ کہ باطن کو دیکھنے والی بن گئی اسے معلوم ہو گیا کہ دل کیا چیز ہے ۔

اندھیری رات ہے اور راستہ پیچیدہ ہے اور اس راستہ پر چلنے والا دورِ حاضر کا مسلمان یقین کی دولت سے محروم ہے ۔ امیرِ کارواں کے لیے ایسے بے یقین مسافر کو پیچیدہ راستوں سے منزلِ مقصود تک لے جانا بہت مشکل ہے ۔

ناقص عشق والا رقیب مست ہے، عاشق مست ہے ۔ اور قاصد بھی مستی کی کیفیت میں ہے یہ تینوں اس لیے مست ہیں کہ مجبوریوں کی تحریر کئی کجاوے رکھتی ہے ۔ کئی پہلو رکھتی ہے ہر کوئی محبوب کی بات سے اپنے مطلب کی بات نکال رہا ہے اور اسی میں مست ہے ۔

(دورِ جدید کی تہذیب، ثقافت اور علم و دانش کی وجہ سے ) میرا دل کبھی مومن کی طرح پختہ ایمان رکھتا ہے اور کبھی کافر کی طرح بے یقینی کا شکار ہو جاتا ہے ۔ اے مسلمانو مجھے بتاوَ میں کیا تدبیر کروں کہ بے یقینی کی حالت سے نکل کر تمہارے جیسا بن جاؤں کیونکہ میرا واسطہ ایسے دل سے آ پڑا ہے جو بے یقینی کا شکار ہے ۔

بعض اوقات ایسا بھی ہوتا ہے کہ طوفان بھی کشتی کو ساحل تک پہنچانے کا کام کر دیتا ہے کہ سمندر کی لہروں کے ایک تلاطم نے میری کشتی کو بھی ساحل پر پھینک دیا ہے ۔ بعض اوقات ناموافق حالات سے بھی زندگی سنور جاتی ہے ۔

میں اس بات سے بے خبر ہوں کہ دریا کی موجوں کو چشم بینا پرکھنے والی آنکھ کس نے بخشی ہے کہ موتیوں کو تو بحفاظت اپنی تہ میں رکھتی ہے اور ٹھیکریوں کو کنارے پر پھینک دیتی ہے (دنیا کی ہر چیز فطرت کے احکامات کے تحت کام کر رہی ہے) ۔

میرے اندر جو سوزِ عشق موجود ہے وہ میری کھیتی (میرے مخاطب لوگوں کو) نصیب میں نہیں ۔ (عوام الناس نے میرے پیغام کو بے کار سمجھا ہے ۔ ) میں نے صحرا کی مٹی میں اکسیر کا کام کیا (اپنے پیغام کا بیج بویا لیکن سب بے کار گیا ۔

اگر تیرے دل میں کوئی نیا جہان ہے (نئے افکار و خیالات ) ہیں تو ان سے کوئی ایسا علاج دریافت کر جو عہد حاضر کا زخم خوردہ لوگوں کے زخموں کا مداوا کر سکے ۔ کیونکہ اہلِ یورپ کے پاس ان کا کوئی علاج نہیں ۔ وہ تو خود زخمی پڑے ہیں (یورپ نے مختلف نظام ہائے زندگی کو آزما لیا ہے ۔ اب تیرے مسلمان کے پاس ہی وہ حتمی علاج موجود ہے ۔ وہ ساری دنیا کو عطا کر دے ۔