غزل شمارهٔ 10

(حق پھیلانے اور اس کی مدافعت کے لیے) کبھی کبھی دلیل اور اعجاز بیان پر بھی بھروسہ کرنا پڑتا ہے اور کبھی حق کا قیام تلوار اور نیزے کی طاقت سے بھی لیا جاتا ہے ۔

بعض اوقات ایسا بھی ہوتا ہے کہ خرقہ پوشوں کو تلوار اٹھانا پڑتی ہے اور حق کی راہ میں جان لٹانا پڑتی ہے ۔ اللہ کے عاشقوں کا حال بھی یہی ہے ۔ ضرورت پڑنے پر وہ بھی خانقاہوں سے نکل کر خدا کے دین کے لیے جان قربان کر دیتے ہیں ۔

جب جہان پرانا ہو جاتا ہے (خرابیوں سے بھر جاتا ہے) تو عاشقانِ الہٰی اسے پوری طرح جلا دیتے ہیں اور پھر وہ اسی پانی اور مٹی سے ایک نیا جہان تعمیر کر لیتے ہیں ۔

(یہ عاشقان الہٰی ) اپنا سارا سرمایہ ایک نگاہ کے بدلے میں دے دیتے ہیں ۔ یہ کیسی قوم ہے کہ گھاٹے کا سودا بھی کر لیتی ہے ۔ (مرد مومن اللہ کی راہ میں اس کی نظر کے ایک اشارے پر اپنا تن من دھن نثا رکر دیتے ہیں ) ۔

وہ جو انھوں نے (اللہ کے بندوں نے) ہوا کی موج سے ایک تنکے (بے بس انسان) کے ساتھ حسنِ سلوک کیا ۔ اس میں تعجب کی بات نہیں اگر وہ بھاری پہاڑوں (سرکش اور طاقتور لوگوں ) کے ساتھ بھی ایسا ہی رویہ رکھتے ہیں ۔ کیونکہ معاشرے کے دونوں طبقات ان کی نگاہِ مہربان سے فیض یاب ہوتے ہیں ۔

زندگی کے بازار میں عشق ایک دولت کی طرح ہے ۔ اسے (اہل دل) کبھی سستی فروخت کرتے ہیں اور کبھی اس کے دام بڑھ جاتے ہیں (کبھی یہ دولت بغیر کوشش کے حاصل ہو جاتی ہے اور کبھی سرکٹانے سے بھی نہیں ملتی) ۔

اے مسلمان! تجھے بیدار کرنے کے لیے میں نے آہ و زاری کی ہے ۔ وگرنہ عشق تو بغیر آہ و زاری کے بھی کیا جا سکتا ہے ۔ اسی لیے اس نے (شاعر نے) شاعری اپنائی ہے ۔