غزل شمارهٔ 52

پرانی شراب جس میں نشہ زیادہ ہوتا ہے اور جوان معشوق اہل نظر کے سامنے کوئی حیثیت نہیں رکھتے (اللہ کے ولیوں کی نظر میں حور اور جنت کوئی چیز نہیں ہے کیونکہ یہ لوگ ان باتوں سے بے نیاز ہوتے ہیں ) ۔

جس شے کو تو مضبوط ، پائیدار اور لافانی خیال کرتا ہے وہ بالاخر فنا ہو جاتی ہے ۔ اس لیے پہاڑ، صحرا، سمندر اور ساحل کی کوئی حیثیت نہیں ۔ تمام اشیاء فنا ہو جائیں گی ۔ قائم رہنے والی ذات صرف خالق کائنات ہے ۔

یورپ کی دانش (علم و حکمت ) اور اہل مشرق کا فلسفہ دونوں ہی بت خانہ ہیں اور بتوں کے طواف سے کوئی فائدہ نہیں ۔ (یورپ کے افکار و خیالات اور سائنسی معلومات سے انسان کائنات شناس تو ہو جاتا ہے لیکن خود شناس اور خدا شناس نہیں ہوتا ۔ خود شناسی کے لیے جذبہَ عشق کی ضرورت ہے) ۔

اپنے آپ پر غور کر اور اس زندگی کے بیاباں سے خوفزدہ ہو کر مت گزر ۔ کیونکہ تیری ہستی کی بدولت ہی دو جہاں کا وجود ہے ۔ تو کائنات کے لیے نہیں بلکہ کائنات تیرے لیے ہے ۔

اس راہِ عشق میں جو میں نے اپنی پلکوں کی نوک سے بنایا ہے ۔ منزل ، قافلہ اور اڑتی ہوئی ریت کی کوئی حیثیت نہیں ۔ وصلِ محبوب کے لیے عاشق جو راستہ بتاتا ہے وہ آسانی سے نہیں بنتا ۔ اس کے لیے پلکوں کی نوک سے راستہ کھودنا پڑتا ہے ۔ حد سے زیادہ محنت کرنا پڑتی ہے) ۔