غزل شمارهٔ 13

مبارک ہے وہ شخص جس نے عقل کے لابس کو شراب کے شعلے سے جلا دیا (عقل کو عشق کی آگ سے جلا دے یعنی عقل کے بجائے عشق کی پیروی کر) اور گل لالہ کی طرح آگ ہی کو اپنی پونجی بنا لیا ۔

تو بھی پیالہ شراب سے چہرے کو گلستان (سرخ) بنا ۔ بہار نے تو اللہ والوں (زاہدوں ) سے خرقے نیلام کروا دیئے (وہ خرقہ فروشی کر کے شراب حاصل کر رہے ہیں جب زاہدوں نے توبہ توڑ دی ہے تو بھی شراب پی کر اپنے چہرہ پر سرخی پیدا کر لے) ۔

مفتی حرم کی محرومی پر میرا دل کڑھا (بہت جلا) کہ شراب خانے کے پیر نے اس کے فتویٰ کے عوض شراب کا پیالہ بھی نہ دیا ۔ (ارباب طریقت کی نظر میں فقہا کے فتاویٰ کی کوئی قدرومنزلیت نہیں کیونکہ یہ لوگ ارباب حکومت کو خوش کرنے کے لیے اور ان سے دنیاوی فوائد حاصل کرنے کے لیے ان کی مرضی کے مطابق فتویٰ دیتے ہیں ۔

میری بے اثر پکار سے سرود کی قیمت کا اندازہ نہ کر ۔ نغمے کی بجلی سے سکندر کی کھیتی جل سکتی ہے ۔ یعنی عشق کے سامنے سکندر اعظم کی عظیم الشان سلطنت کی بھی کوئی حقیقت نہیں ہے ۔

اے صبا! ویمر کے گلشن تک ہمارا سلام پہنچا دے کہ اس سرزمین کی خاک نے نکتہ وروں کی آنکھوں کو روشنی بخشی (ان کے دل و دماغ کو منور کر دیا)(اس شعر میں اقبال نے گوءٹے کی خدمت میں خراج تحسین پیش کیا ہے) ۔