بخش 11 - محاورهٔ علم و عشق

علم میری نگاہ ساتوں ولایتوں (ساری کائنات) اور چاروں عناصر (آگ ، پانی، مٹی، ہوا) یعنی زمین و آسمان دونوں کی رازدار ہے ۔ زمانہ میرے پھندے میں پھنسا ہوا ہے ۔

خداوند نے میری آنکھیں اس رخ پہ کھولیں مجھے آسمان کے ادھر سے کیا کام ہے( میں آسمان کے نیچے جو جہان ہے اس سے باخبر ہوں ) ۔

میرے ساز سے سینکڑوں نغمے پھوٹتے ہیں ۔ میں اپنا ہر راز بازار میں پھینک آتا ہوں (عام کر دیتا ہوں ) ۔

ترے شعبدے سے دریا شعلہ زار ہے (دریا کے پانی میں شعلہ پیدا ہوتا ہے) ۔ ہوا آگ چھوڑتی ہے اور زہریلی ہے ۔ (اشارہ ہے ان بحری جہازون اور بم کے گولوں کی طرف جن کی بدولت پانی سے شعلے بلند ہوئے اور ہوا زہریلی ہو گئی) ۔

تو جب میرا دوست تھا تو نور تھا ۔ مجھ سے الگ ہوا تو اب تیرا نور بھی نار بن گیا ہے(تیرا وجود مفید ہونے کے بجائے مضر ہو گیا ۔ تباہ کن آلات حرب علم ہی کی بدولت عالم وجود میں آئے) ۔

تو نے خلوت خانہ لاہوت میں جنم لیا (جس کا تو آج منکر ہے) ۔ لیکن تو شیطان کے پھندے میں پھنس گیا ۔

آ اس خاکدان دنیا کو گلزار بنا دے ۔ بوڑھی دنیا کو پھر سے جوان کر دے ۔

آ میرے درد دل سے ایک ذرہ لے آسمان تلے ہمیشہ کی جنت بنا دے ۔

اے علم! اس حقیقت کو فراموش مت کر کہ ہم ازل کے دن سے دونوں ساتھی ہیں ۔ ہم ایک ہی نغمے کا اتار چڑھاوَ ہیں ۔ علم بے عشق اور عشق بے علم دونوں غیر مفید ہیں ۔ اس تصور کا مرشد رومی کا یہ شعر ہے ۔ علم را بر تن زنی مارے بود علم را بر دل زنی یارے بود