غزل شمارهٔ 3

ہماری فکر ہر دم ایک نیا خدا (معبود، بت) تراشتی رہتی ہے ۔ ایک قید سے چھوٹی کہ دوسری میں گرفتار ہو گئی ۔

بام پر آ! منہ پر سے بے دھڑک نقاب اٹھا دے ۔ تیری گلی میں میرے جیسا کوئی اور آرزومند نہیں ہے ۔

بسکہ مجھے اپنی دیکھتی آنکھوں سے غیرت آتی ہے تیرے چہرے پر اپنی نگاہ سے ایک اور نقاب بن دیتا ہوں تاکہ میرے سوا تجھے کوئی اور نہ دیکھے ۔

ایک نگاہ، ایک دبی دبی سی مسکراہٹ ، ایک چمکتا آنسو محبت کے عہد و پیمان کے لیے کوئی اور حلف نہیں ہے ۔

مجھے عشق پر ناز ہے جس نے روز فراق کی بے تابی کے ذریعے میری جان کو تیرے درد کے ساتھ ایک اور پیو ند لگا دیا ۔

اے بہار کے پرندے نالہ سر کرنے میں تیرا دل اور کھل جائے تو میرے سینے کے حرم سے کچھ اور آگ لے جا ۔

تیموری بربط ٹوٹ گیامگر تیموری آہنگ برقرار ہے ۔ جو اب ایک اور سمر قند کے ساز سے پھوٹ رہا ہے (وسط ایشیا کے مسلمان پھر اٹھنے والے ہیں ) ۔

اے پیر حرم، اقبال کو کعبے میں راہ نہ دے (داخل ہونے کی اجازت نہ دے) وہ ہر لحظہ اپنی آستین میں ایک نیا بت چھپائے رکھتا ہے (اقبال نے اپنے نام کے پردہ میں دراصل پیر حرم کی غیر اسلامی طرز زندگی پر طنز کیا ہے ، پیر حرم سے پیشوایان دین بھی مراد ہے اور وہ طبقہ بھی جو اس وقت کعبہ پر مسلط ہے) ۔