غزل شمارهٔ 43

اگرچہ اس کے سر پر کوئی تاج اور کلاہ نہیں ہے مگر تیری گلی کا فقیر کسی بادشاہ سے کم نہیں ۔

جوان نیند کے رسیہ اور بوڑھے مردہ دل کسی کے سینے کو صبح کی آہ نصیب نہیں ۔ (افسوس! مسلمانوں میں کوئی شخص بھی طلوع آفتاب سے پہلے بیدار ہو کر تہجد نہیں پڑھتا یعنی خدا کی بارگاہ میں آہ و زاری نہیں کرتا ۔ اقبال کا عقیدہ ہے کہ آہ سحر گاہی کے بغیر دل میں سوز و گداز کا رنگ پیدا نہیں ہو سکتا) ۔ عطار ہو رومی ہو رازی ہو غزالی ہو کچھ ہاتھ نہیں آتا بے آہ سحر گاہی

اس بہانے سے طلب کے میدان میں پاؤں توڑ کے بیٹھ نہ رہ کہ ہمارے زمانے میں کوئی راستہ جاننے والا مرشد نہیں ہے (اگر تو تلاش کرے گا تو کوئی نہ کوئی مرشد یقینا مل جائے گا) ۔

کیا اپنے حال سے غافل بیٹھا ہے (اٹھ اور) کھوج وہ زمانہ جس کا حساب کسی ماہ و سال سے نہیں ہے ۔

اس پرانی سرائے میں عافیت کی آرزو رکھتا ہے کیا زندگی کی کشمکش پر تیری نظر نہیں ہے(دنیا میں وہی زندہ رہ سکتا ہے جو ہر وقت جدوجہد کرتا ہے) ۔

نامہ اعمال لکھنے والے فرشتے ہمارا گناہ کیا لکھیں گے ،تیری دنیا میں ہمارا نصیب بس ایک نظر ہی تو ہے اور کچھ نہیں (ہم تو تیری نگاہ ناز کے کشتہ ہیں یا ہم تو ایک نگاہ سے بے خود ہو گئے اور جب یہی ہوش نہ رہا تو گناہ یا ثواب کا سوال ہی پیدا نہیں ہوتا) ۔

اقبال کا دامن تھام لے کیونکہ وہ کسی خانقاہ کے خرقہ فروشوں میں سے نہیں ہے ۔ کئے ہیں فاش رموز قلندری میں نے کہ فکر مدرسہ و خانقاہ ہو آزاد (اقبال) ۔