غزل شمارهٔ 25

تجھ بغیر عدم کی نیند سے آنکھ نہیں کھل سکتی ۔ تیرے بغیر ہماری مستی محال ہے اور تیرے ساتھ ہماری نیستی ناممکن ہے ۔

ہمارا دل کائنات میں ہے یہ کائنات ہمارے دل میں ہے ۔ ہونٹ سی لے کیونکہ یہ گتھی نہیں سلجھ سکتی ۔ (یہ عقدہ حل نہیں کیا جا سکتا) ۔

میری بکھری بکھری نواؤں سے یاروں کا دل جل گیا (کیونکہ جو کچھ میں کہتا ہوں وہ ان کی فہم سے بالاتر ہے) ۔ مجھے اس نغمے نے تڑپا یا جو گایا نہیں جا سکتا ۔ (مسئلہ وحدت الوجود کو سمجھ تو سکتے ہیں لیکن لفظوں میں بیان نہیں کر سکتے) ۔

اے صبا شبنم کی بوند بوند چھڑکاوَ سے کیا ہو گا گل لالہ کے جگر کی تب و تاب کو زائل نہیں کیا جا سکتا (دنیا کی کوئی طاقت عشق کی آگ کو سرد نہیں کر سکتی) ۔

اے مسلمان تو دل اللہ سے لگا اور بادشاہوں سے مراد مت مانگ تاکہ اس بتخانے کی چوکھٹ پر ماتھا رگڑنے کی نوبت نہ آ سکے (جو شخص اللہ کو چھوڑ کر سلاطین کے دروازے پرر جاتا ہے وہ بت پرست ہو جاتا ہے اور مسلمان بتوں کو سجدہ نہیں کر سکتا ۔ ) ۔