بخش 2 - حکومت الهی

بندہَ حق (مردِ حق) ہر مقام سے بے نیاز ہے ۔ نہ وہ کسی کا غلام ہے نہ کوئی اس کا غلام ۔

اس کے طور طریقے اور اس کا دین اور اس کا آئین سب خدا کی طرف سے ہیں ۔ اس کا برا اور بھلا اور کڑوا اور میٹھا سب اللہ کی طرف سے ہے ۔

خودبیں عقل دوسروں کی خیرخواہی سے بے خبر ہے ۔ وہ صرف اپنا مفاد دیکھتی ہے کسی اور کا فائدہ نہیں دیکھتی ۔

حق تعالیٰ کی وحی سب کے فائدے پر توجہ دیتی ہے ۔ اس کی نگاہ میں سب کا فائدہ اور بھلائی ہوتی ہے ۔

وحی حق صلح میں بھی اور جنگ میں بھی عدل و انصاف سے کام لیتی ہے ۔ وہ دوستی اور دشمنی میں نہ تو کسی کی رعایت کرتی ہے اور نہ کسی سے خوفزدہ ہوتی ہے ۔

حق کے سوا جب کوئی اور کسی کام کے کرنے کا یا نہ کرنے کا حکم دیتا ہے تو اس سے طاقتور ، کمزور پر قہر کرنے والا بن جاتا ہے ۔

آسمان تلے (دنیا) میں آمریت ، ظلم و جور سے قائم ہوتی ہے ۔ جو آمریت خدا کی حکمرانی سے ہٹ کر ہو وہ کافری ہے ۔

قہر و غضب ڈھانے والا مطلق العنان حکمران جو تجربہ کار ہے اپنے ارد گرد قوانین کا قلعہ بنا لیتا ہے ۔

تیز پنجوں اور شکار کو جلد پکڑنے والا نر باز امور حکومت میں ممولوں کو مشیر بنا لیتا ہے ۔

وہ قاہری کو شرع اور دستور کی صورت دیتا ہے (جو اس کا فریب ہوتا ہے ) اس کی مثال اس نابینا آدمی کی سی ہے جو کسی اندھے کو سرمہ دیتا ہے ۔

بادشاہوں کے دستور و آئین کا نتیجہ یہ ہوتا ہے کہ جاگیردار موٹے ہو جاتے ہیں جبکہ کسان بیچارہ (چرخے کے) تکلے کی مانند دبلا اور کمزور ہو جاتا ہے ۔

اہل مغرب کے جمہوری آئین پر افسوس ہے ۔ اہل مغرب (فرنگی) کے صور پھونکنے سے تو مردہ اور زیادہ مردہ ہو جاتا ہے ۔

جمہوری تماشا دکھانے والے یورپی مداریوں نے گردش کرنے والے آسمان کی مانند اپنی شطرنج کے تختہ قوموں کے مہرے رکھے ہوئے ہیں ۔

یورپی شاطر (شعبدہ باز) تو خزانے اکٹھے کرنے میں لگے ہوئے ہیں جبکہ دوسرے دکھ اٹھا رہے ہیں ۔ یہ ہر لمحہ ایک دوسرے کی گھات میں ہیں ۔

مجبوریوں کا راز کھل کر بیان کرنا چاہیے اور وہ راز یہ ہے کہ ہم تو مال و متاع ہیں اور یہ سب سوداگر ہیں ۔

سونے چاندی (مال و دولت) کی محبت نے ان کی آنکھوں سے نمی غائب کر دی ہے ۔ ہمدردی چھین لی ہے ۔ یہاں تک کہ ماؤں کے لیے اولاد گویا کندھوں کا بوجھ بن رہی ہے (مامتا بھی ختم ہو گئی ہے ) ۔

افسوس اس قوم پر جو پھل کے خوف سے درخت کے تنے کے اندر سے نمی کھینچ لیتی ہے ۔

تاکہ اس مضراب ، ساز سے کوئی سر پیدا نہ کرے ۔ وہ نہ پیدا ہونے والے بچوں کو وجود کے اندر ختم کر دیتے ہیں ۔

اگرچہ افرنگ (یورپ) رنگ رنگ کے انداز رکھتا ہے لیکن میں انہیں دیکھ کر صرف عبرت حاصل کرتا ہوں ۔

اے (وہ شخص) تو جو افرنگی کی بے جا قسم کی پیروی کا غلام بنا ہوا ہے اس سے آزاد ہو جا ۔ قرآن کریم کا دامن تھام اور صحیح معنوں میں آزاد ہو جا ۔