بخش 1 - خلافت آدم

دونوں جہانوں میں جہاں کہیں بھی عشق کے آثار ہیں وہاں ابن آدم عشق کے رازوں میں سے ایک راز ہے ۔

عشق کے راز کا تعلق ارحام سے نہیں ہے ۔ اس کا یعنی رازِ عشق کا سام اور حام اور روم و شام سے کوئی تعلق نہیں (عشق حسب و نسب اور رنگ و نسل کی قید سے آزاد ہے) ۔

وہ ایک ایسا ستارہ ہے جس کا مشرق و مغرب اور غروب سے کوئی تعلق نہیں ہے ۔ وہ کبھی غروب نہیں ہوتا اور اس کے مدار میں نہ شمال ہے اور نہ جنوب ہے ۔

اللہ تعالیٰ کا ارشاد کہ انی جاعل کے الفاظ اس کی تقدیر ہے اور زمین سے آسمان تک ہر شے کی تسخیر اس کی تفسیر ہے ۔ مطلب یہ کہ انسان اللہ تعالیٰ کا نائب اور اس لحاظ سے اس ذات کی صفات کا مظہر ہے ۔

موت اور قبر اور حشر و نشر اس (مردِ کامل) کے احوال ہیں اور اس جہان کا نور یعنی جنت اور آگ یعنی دوزخ اس کے اعمال ہیں ۔

وہ امام اور وہ نماز اور وہ کعبہ ہے وہ سیاہی ہے اور وہ کتاب ہے اور وہ قلم ہے ۔

اس کا غیب آہستہ آہستہ کے لیے ظہور بن جاتا ہے نہ اس کی اپنی کوئی حدود ہیں اور نہ اس کے ملک کی سرحدیں ہیں ۔

اس کے وجود ہی سے ممکنات کا اندازہ ہوتا ہے اس کا اعتدال ممکنات کی کسوٹی ہے ۔

میں اس کے ناپیدا کنار (بے کراں ) سمندر کے بارے میں کیا بات کروں ۔ اس کے دل میں زمانے اور نئے ادوار پوشیدہ ہیں (مردِ کامل کے دل کو بے کنار سمندر سے تشبیہ دی ہے ) ۔

وہ چیز جو آدم میں سما جاتی ہے وہ عالم ہے اور جو عالم میں نہیں سما سکتا وہ آدم ہے ۔

سورج اور چاند اس کی جلوت ہی سے نمایاں ہیں ۔ اس کی خلوت میں جبریل کا بھی گذر نہیں ہے ۔

آدم کا مقام آسمان سے بھی بلند تر ہے ۔ تہذیب کی اصل آدم کا احترام ہے ۔

اے زندہ و بیدار دل کیا تو جانتا ہے کہ زندگی کیا ہے حقیقی زندگی دوئی میں ایک کو دیکھنے یعنی کثرت میں وحدت دیکھنے کا نام ہے ۔

مرد اور عورت ایک دوسرے سے وابستہ ہیں ۔ دونوں شوق کی کائنات کے صورت گر ہیں ۔

عورت زندگی کی آگ کی حفاظت کرنے والی ہے ۔ اس کی فطرت زندگی کے رازوں کی تختی ہے ۔

عورت ہماری آگ کو اپنی جان پر لگاتی ہے ۔ اس کا جوہر خاک کو آدم یعنی آدمی بنا دیتا ہے ۔

اس کے ضمیر میں زندگی کے ممکنات ہیں ۔ اس کی تب و تاب سے زندگی ثبات پاتی ہے ۔

وہ عورت ایک ایسا شعلہ ہے جس سے بہت سی چنگاریاں نکلتی ہیں اس کے سوز کے بغیر جسم و جان صورت پذیر نہیں ہوتے ۔

ہماری توقیر عورت ہی کی سربلندی سے ہے ۔ ہم سب اس (ماں ) کی نقشبندی سے وجود میں آئے ہیں ۔

اگر حق تعالیٰ نے تجھے دیکھنے کی صلاحیت دی ہے تو تو پہلے خود پاک ہو اور پھر اس (ماں ) کی قدسیت کو دیکھ ۔ یعنی عورت کا وجود انسانوں کے لیے بڑا ہی لائق احترام و محبت ہے ۔

(اے جدید دور کے مسلمان ) تجھ سے عصر حاضر نے دین کی روشنی چھین لی ہے ۔ میں تجھ پر پردے کے رازوں کی بات واضح کرتا ہوں ۔

تخلیق کا ذوق بدن میں آگ کا ہونا ہے ۔ اس کی روشنی سے انجمن کی روشنی ہے ۔

جو کوئی بھی اس آگ سے حصہ پاتا ہے وہ اپنے سوز و ساز کا محافظ بن جاتا ہے ۔

وہ ہر وقت اپنے نقش پر نظر رکھتا ہے تاکہ اس کی تختی کوئی اور نقش اختیار نہ کر لے ۔

رسول اللہ ﷺ نے غارِ حرا میں خلوت اختیار فرمائی اور ایک مدت تک اپنے سوا کسی اور کو نہ دیکھا ۔

ہمارانقش قدرت کی طرف سے رسول اللہ کے دل میں ڈالا گیا آپکی خلوت کے اندر سے ایک نئی ملت ابھری ۔

تو خدا کا منکر تو ہو سکتا ہے لیکن رسول اللہ کی عظمت شان سے انکار ممکن نہیں ۔

خواہ تجھ میں حضرت موسیٰ کلیم اللہ کی سی روشن جان کیوں نہ ہو پھر بھی خلوت کے بغیر تیرے افکار بانجھ رہیں گے ۔

کم آمیزی سے تخیل بہت زندہ ہو جاتا ہے ، پہلے سے بھی زیادہ زندہ ، زیادہ تلاش کرنے والا اور اپنی تلاش کے مقصد کو زیادہ پانے والا بن جاتا ہے ۔

علم اور شوق دونوں زندگی کے مقامات میں سے ہیں ۔ ہر دو کا تعلق مشاہدات اور تجربات سے ہے ۔

علم تحقیق سے لذت حاصل کرتا ہے اور عشق تخلیق سے ۔

تحقیق کرنے والے (صاحب علم) کو جلوت (انجمن) پیاری ہے اور صاحب تخلیق کو خلوت عزیز ہے ۔

حضرت موسیٰ کی آنکھ نے اس ذات باری کے دیدار کی خواہش کی ۔ ان کی یہ خواہش سب تخلیق کی لذت کا کرشمہ تھا ۔

لن ترانی (تو مجھے ہرگز نہیں دیکھ سکتا، خدا کا جواب) میں بڑی گہری باتیں ہیں ۔ ذرا اس گہرے سمندر میں گم ہو جا ۔

جہاں کہیں بھی زندگی کے آثار بے پردہ ہیں ان کا سرچشمہ کائنات کے ضمیر کے اندر ہے ۔

تو آفاق کے ہنگاموں پر نظر ڈال اور خالق کائنات کو ظاہر ہونے کی زحمت نہ دے ۔

ہر نقش آفریں کی حفاظت خلوت سے ہے اس کی انگوٹھی کا نگینہ خلوت ہی ہے ۔